ಚೀನೀಯರ ವಿರುದ್ಧ ಹರಿಹಾಯ್ದ ಶೋಯಿಬ್‌ ಅಖ್ತರ್‌

ಕರಾಚಿ: ಪ್ರಾಣಿಗಳ ಮಾಂಸವನ್ನು ಹಸಿಯಾಗಿ ತಿಂದು ತೇಗುವ ಚೀನಿಗರ ವಿರುದ್ಧ ಪಾಕಿಸ್ಥಾನದ ಮಾಜಿ ವೇಗಿ ಶೋಯಿಬ್‌ ಅಖ್ತರ್‌ ಅಕ್ರೋಶ ವ್ಯಕ್ತಪಡಿಸಿದ್ದಾರೆ.

ತನ್ನ ಅಧಿಕೃತ ಯೂಟ್ಯೂಬ್‌ ಚಾನೆಲ್‌ನಲ್ಲಿ ಮಾತನಾಡಿರುವ ಅಖ್ತರ್‌ “ನೀವು ಎಲ್ಲವನ್ನು ಎಲ್ಲಿಯೂ ತಿನ್ನಲು ಸಿದ್ಧವಾಗಿದ್ದೀರಿ. ಏಕೆ ಹೀಗೆಲ್ಲ ಮಾಡುತ್ತೀರಿ? ಬಾವಲಿ, ನಾಯಿ, ಬೆಕ್ಕಿನ ಮಾಂಸವನ್ನು ಹಸಿಯಾಗಿಯೇ ತಿನ್ನುತ್ತೀರಿ. ರಕ್ತ, ಮೂತ್ರವನ್ನು ಕುಡಿಯುತ್ತೀರಿ. ಇದನ್ನೆಲ್ಲ ನೀವು ಏಕೆ ಮಾಡುತ್ತೀರಿ ಎನ್ನುವುದೇ ಅರ್ಥವಾಗುತ್ತಿಲ್ಲ. ನಾನು ಚೀನಿಗರ ವಿರೋಧಿಯಲ್ಲ. ಆದರೆ ಪ್ರಾಣಿಗಳ ಜತೆ ಅವರು ನಡೆದುಕೊಳ್ಳುತ್ತಿರುವ ವಿಚಾರ ತೀವ್ರ ಬೇಸರವಾಗುತ್ತದೆ. ಅದು ನಿಮ್ಮ ಸಂಸ್ಕೃತಿ ಭಾಗವೇ ಆಗಿರಬಹುದು, ಆದರೆ ಮನುಷ್ಯತ್ವ ಮರೆತು ನೀವು ಈ ರೀತಿ ಪ್ರಾಣಿಗಳನ್ನು ಹತ್ಯೆ ಮಾಡುವುದರಿಂದ ಯಾವುದೇ ಲಾಭವಾಗದು, ವಿನಾಷಕಾರಿ ಕಾಯಿಲೆಗಳು ಹಬ್ಬುವ ಸಾಧ್ಯತೆ ಇದೆ’ ಎಂದು ಹೇಳಿದ್ದಾರೆ.

“ವೈರಸ್‌ ಎಲ್ಲೆಡೆ ಹಬ್ಬುತ್ತಿದೆ, ನಿಧಾನವಾಗಿ ಭಾರತಕ್ಕೂ ತಲುಪುತ್ತಿದೆ. ಅಲ್ಲಿ 130 ಕೋಟಿಗೂ ಹೆಚ್ಚು ಜನರಿದ್ದಾರೆ. ಅವರೆಲ್ಲ ಸುರಕ್ಷಿತವಾಗಿರಲಿ ಎಂದು ದೇವರಲ್ಲಿ ಪ್ರಾರ್ಥಿಸುತ್ತೇನೆ’ ಎಂದೂ ಅಖ್ತರ್‌ ಹೇಳಿದ್ದಾರೆ.