ಶಿವರಾಜ್‌ ಕುಮಾರ್‌ ಅಭಿನಯದ 124ನೇ ಚಿತ್ರ “ನೀ ಸಿಗೋವರೆಗೂ’ ಚಿತ್ರದ ಮುಹೂರ್ತ ಇತ್ತೀಚೆಗಷ್ಟೇ ನಡೆದಿದೆ. ಇದರ ಬೆನ್ನಲ್ಲೇ ಅವರ ಮತ್ತೂಂದು ಚಿತ್ರ ಘೋಷಣೆಯಾಗಿದೆ. ಅದು “ಸತ್ಯಮಂಗಳ’.
ಇದು ಶಿವರಾಜ್‌ಕುಮಾರ್‌ ಅವರ ಹೊಸ ಚಿತ್ರ. ಲೋಹಿತ್‌ ಈ ಸಿನಿಮಾ ನಿರ್ದೇಶಕರು. “ಮಮ್ಮಿ’, “ದೇವಕಿ’ ಚಿತ್ರಗಳನ್ನು ನಿರ್ದೇಶಿಸಿರುವ ಲೋಹಿತ್‌ ಈಗ ಶಿವರಾಜ್‌ ಕುಮಾರ್‌ ಅವರಿಗೆ “ಸತ್ಯಮಂಗಳ’ ಸಿನಿಮಾ ಮಾಡಲು ಹೊರಟಿದ್ದಾರೆ. ಈ ಚಿತ್ರವನ್ನುಕೃಷ್ಣ ಸಾರ್ಥಕ್‌ ನಿರ್ಮಿಸುತ್ತಿದ್ದಾರೆ. ಈಗಾಗಲೇ “ಬೈರಾಗಿ’ ಚಿತ್ರವನ್ನು ನಿರ್ಮಿಸಿರುವ ಕೃಷ್ಣ ಸಾರ್ಥಕ್‌ ಅವರು ಈಗ ಶಿವಣ್ಣ ಜೊತೆ ಮತ್ತೂಂದು ಚಿತ್ರ ಮಾಡುತ್ತಿದ್ದಾರೆ.
ಚಿತ್ರದ ಬಗ್ಗೆ ಮಾತನಾಡುವ ನಿರ್ಮಾಪಕ ಕೃಷ್ಣ ಸಾರ್ಥಕ್‌, “ಶಿವಣ್ಣ ಜೊತೆ ಮತ್ತೂಮ್ಮೆ ಸಿನಿಮಾ ಮಾಡುವ ಅದೃಷ್ಟ ನಮಗೆ ಸಿಕ್ಕಿದೆ. ಕಥೆ ತುಂಬಾ ಹೊಸದಾಗಿದೆ. ಒನ್‌ ಲೈನ್‌ ಕಥೆ ಕೇಳಿಯೇ ಶಿವಣ್ಣ ಇಷ್ಟಪಟ್ಟಿದ್ದಾರೆ. ಶಿವಣ್ಣ ಅವರ ಕೆರಿಯರ್‌ನ ಪ್ರಮುಖ ಸಿನಿಮಾಗಳಲ್ಲಿ ನಮ್ಮ ಬ್ಯಾನರ್‌ ನ ಈ ಎರಡು ಸಿನಿಮಾಗಳು ಕೂಡಾ ಸೇರಿಕೊಳ್ಳಲಿವೆ. ನಿರ್ದೇಶಕ ಲೋಹಿತ್‌ ಮಾಡಿರುವ ಕಥೆಯಲ್ಲಿ ಸಾಕಷ್ಟು ಹೊಸತನವಿದೆ. ಮುಂದಿನ ವರ್ಷ ಚಿತ್ರ ಆರಂಭವಾಗಬಹುದು’ ಎನ್ನುವುದು ನಿರ್ಮಾಪಕ ಕೃಷ್ಣ ಸಾರ್ಥಕ್‌ ಮಾತು.
ಶಿವರಾಜ್‌ ಕುಮಾರ್‌ ಅವರ ಸಿನಿಮಾ ನಿರ್ದೇಶಿಸಲು ಅಣಿಯಾಗಿರುವ ನಿರ್ದೇಶಕ ಲೋಹಿತ್‌, “ಇದೊಂದು ಆ್ಯಕ್ಷನ್‌ ಕಮರ್ಷಿಯಲ್‌ ಸಿನಿಮಾ. ಚಿತ್ರದಲ್ಲಿ ಹೈವೋಲ್ಟೇಜ್‌ ಆ್ಯಕ್ಷನ್‌ ಇದೆ. ಜೊತೆಗೆ ಚಿತ್ರದಲ್ಲಿ ಭಾವನೆಗಳಿಗೆ ಹೆಚ್ಚಿನ ಮಹತ್ವವಿದೆ. ಫ್ಯಾನ್ಸ್‌ ಜೊತೆ ಫ್ಯಾಮಿಲಿ ಆಡಿಯನ್ಸ್‌ಗೂ ಈ ಚಿತ್ರ ಇಷ್ಟವಾಗಲಿದೆ’ ಎನ್ನುತ್ತಾರೆ.
ಅಂದಹಾಗೆ, “ಸತ್ಯಮಂಗಳ’ ಕಾಡಿನ ಹೆಸರು ಎಂಬುದು ಎಲ್ಲರಿಗೂ ಗೊತ್ತೇ ಇದೆ. ಇನ್ನು, ಈ ಚಿತ್ರದ ಬಹುತೇಕ ಭಾಗದ ಚಿತ್ರೀಕರಣ ಕಾಡಿನಲ್ಲೇ ನಡೆಯಲಿದೆ.
