ಅಭಿಮಾನಿಯ ಆರೋಗ್ಯ ವಿಚಾರಿಸಿದ ಶಿವರಾಜ್‌ ಕುಮಾರ್‌

ಮೈಸೂರು: ಅಪಘಾತದಲ್ಲಿ ಕಾಲು ಕಳೆದುಕೊಂಡು ತಮ್ಮನ್ನು ಕಾಣಲು ಹಪಹಪಿಸುತ್ತಿದ್ದ ಅಭಿಮಾನಿಯ ಮನೆಗೆ ತೆರಳಿ ಆರೋಗ್ಯ ವಿಚಾರಿಸುವ ಮೂಲಕ ನಟ ಡಾ.ಶಿವರಾಜ್‌ ಕುಮಾರ್‌ ಮಾನವೀಯತೆ ಮೆರೆದಿದ್ದಾರೆ.

ವಿದ್ಯಾರ್ಥಿ ಉಲ್ಲೇಖ್‌, ಶಾಲೆ ಮುಗಿಸಿ ಮನೆಗೆ ತೆರಳಲು ನಗರ ಬಸ್‌ ನಿಲ್ದಾಣದಲ್ಲಿ ಬಸ್‌ ಹತ್ತುವಾಗ ಚಾಲಕ ಮತ್ತು ನಿರ್ವಾಹಕರ ನಿರ್ಲಕ್ಷ್ಯದಿಂದ ಕೆಳಬಿದ್ದ ಆತನ ಮೇಲೆ ಬಸ್‌ ಹರಿದ ಪರಿಣಾಮ ಕಾಲು ಕಳೆದುಕೊಂಡಿದ್ದಾನೆ.

ಆಸ್ಪತ್ರೆಯಲ್ಲಿದ್ದಾಗಲೇ ಉಲ್ಲೇಖ್‌, ತನ್ನ ನೆಚ್ಚಿನ ನಟ ಶಿವರಾಜ್‌ ಕುಮಾರ್‌ ಅವರನ್ನು ನೋಡಬೇಕು ಎಂಬ ಆಸೆ ವ್ಯಕ್ತಪಡಿಸಿದ್ದ. ಈ ವಿಚಾರ ತಿಳಿದ ಶಿವರಾಜ್‌ ಕುಮಾರ್‌ ಅವರು, ಶನಿವಾರ ನಗರದ ಸರಸ್ವತಿಪುರಂನಲ್ಲಿರುವ ಉಲ್ಲೇಖ್‌ ಮನೆಗೆ ತೆರಳಿ,

ಆರೋಗ್ಯ ವಿಚಾರಿಸಿ, ಜೀವನದಲ್ಲಿ ಒಮ್ಮೊಮ್ಮೆ ಇಂತಹ ಅನಿರೀಕ್ಷಿತ ಘಟನೆಗಳು ಒದಗಿಬರುತ್ತವೆ. ಎಲ್ಲವನ್ನೂ  ಧೈರ್ಯವಾಗಿ ಎದುರಿಸಿ ಮುನ್ನಗ್ಗಬೇಕು ಎಂದು ಕಿವಿಮಾತು ಹೇಳಿದರು. ತನ್ನ ನೆಚ್ಚಿನ ನಟ ತಮ್ಮ ಮನೆಗೇ ಬಂದು ಭೇಟಿ ಮಾಡಿದ ಬಗ್ಗೆ ಉಲ್ಲೇಖ್‌ ಹರ್ಷ ವ್ಯಕ್ತಪಡಿಸಿದ್ದಾನೆ.