ಶಿವಸೇನೆ ಕಾಂಗ್ರೆಸ್‌ ಜತೆ ಸೇರಬಹುದು: ಚವಾಣ್‌

ಔರಂಗಾಬಾದ್‌: ಶಿವಸೇನೆಗೆ  ವಿರೋಧ ಪಕ್ಷದಲ್ಲಿ ಸೇರ್ಪಡೆಗೊಳ್ಳುವ ಇಚ್ಛೆ ಇದ್ದರೆ, ಪಕ್ಷವು  ಮೊದಲಿಗೆ  ಎನ್‌ಡಿಎ ಮೈತ್ರಿಕೂಟ ತೊರೆದು ಆಡಳಿತದಿಂದ ಹೊರಬರಬೇಕು ಎಂದು  ಕಾಂಗ್ರೆಸ್‌ ನಾಯಕ ಹಾಗೂ ಮಹಾರಾಷ್ಟ್ರ ಮಾಜಿ ಮುಖ್ಯಮಂತ್ರಿ ಪೃಥ್ವೀರಾಜ್‌ ಚವಾಣ್‌  ಅವರು ಬುಧವಾರ ಹೇಳಿದ್ದಾರೆ. 

ಒಂದು ವೇಳೆ ಕಾಂಗ್ರೆಸ್‌ ಕೇಂದ್ರ ನೇತೃತ್ವವು ಈ ವಿಷಯದ ಕುರಿತು  ಒಪ್ಪಿಗೆ ನೀಡಿದರೆ ಶಿವಸೇನೆ ಹಾಗೂ ಕಾಂಗ್ರೆಸ್‌ ನಡುವೆ  ಔಪಚಾರಿಕ ಮೈತ್ರಿ ಮಾಡಿಕೊಳ್ಳಬಹುದು ಎಂದು ಚವಾಣ್‌ ತಿಳಿಸಿದ್ದಾರೆ.

ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಚವಾಣ್‌ ಅವರು, ಶಿವಸೇನೆ ಹಾಗೂ ಬಿಜೆಪಿ ಜತೆಯಾಗಿ ಆಡಳಿತದಲ್ಲಿದೆ.   ಆದರೆ ಈ ಎರಡು ಪಕ್ಷಗಳು  ಬೇರೆ ಬೇರೆಯಾಗಿ,  ಶಿವಸೇನೆ ವಿರೋಧ ಪಕ್ಷದ ಜತೆ ಬರುವುದಾದರೆ  ನಾವು  ಈ ವಿಷಯದ ಕುರಿತು ವಿಚಾರ ನಡೆಸಬಹುದು ಎಂದು ಹೇಳಿದ್ದಾರೆ. ಈ ಮೈತ್ರಿಕೂಟಕ್ಕಾಗಿ ಪ್ರಸ್ತಾವ‌ವನ್ನು  ದಿಲ್ಲಿಗೆ  ಕಳುಹಿಸಲಾಗುವುದು ಎಂದಿದ್ದಾರೆ. ಈ ಹಿಂದೆ ಬಿಜೆಪಿ ಹಾಗೂ ಶಿವಸೇನೆ  ಬೇರೆ ಬೇರೆಯಾಗಿ ಲೋಕಸಭೆ ಹಾಗೂ ವಿಧಾನಸಭೆ ಚುನಾವಣೆಯಲ್ಲಿ  ಸ್ಪರ್ಧಿಸುವುದಾಗಿ ತೀರ್ಮಾನಿಸಿದ್ದವು.