ಅಂತಾರಾಷ್ಟ್ರೀಯ ಟೆನಿಸ್‌ ಸಂಸ್ಥೆ ವಿರುದ್ಧ ಶರಪೋವಾ ವಾಗ್ಧಾಳಿ

ಲಂಡನ್‌: ಉದ್ದೀಪನ ಪರೀಕ್ಷೆಯಲ್ಲಿ ಸಿಕ್ಕಿಬಿದ್ದು ಕಳೆದ ವರ್ಷ ನಿಷೇಧಕ್ಕೆ ಒಳಗಾಗಿದ್ದ ರಷ್ಯಾದ ಖ್ಯಾತ ಟೆನಿಸ್‌ ಆಟಗಾರ್ತಿ ಮರಿಯಾ ಶರಪೋವಾ ವಾಪಸ್‌ ಟೆನಿಸ್‌ ಅಂಗಳಕ್ಕೆ ಇಳಿಯಲು ಸಜ್ಜಾಗಿದ್ದಾರೆ. 

ಏ.24 ರಂದು ಸ್ಟಟ್‌ಗರ್ಟ್‌ ಕೂಟದಲ್ಲಿ ಅವರು ಪಾಲ್ಗೊಳ್ಳಲಿದ್ದಾರೆ. ಇದು ನಿಷೇಧದ ಅವಧಿ ಮುಗಿದ ಬಳಿಕದ ಮೊದಲ ಪಂದ್ಯ. ಈ ಬೆನ್ನಲ್ಲೇ ಅವರು ಅಂತಾರಾಷ್ಟ್ರೀಯ ಟೆನಿಸ್‌ ಒಕ್ಕೂಟ (ಐಟಿಎಫ್) ವಿರುದ್ಧ ಹರಿಹಾಯ್ದಿದ್ದಾರೆ. ಮೆಲ್ಡೋನಿಯಂ ನಿಷೇಧ ಕುರಿತಂತೆ ಐಟಿಎಫ್ ಸೂಕ್ತ ರೀತಿಯಲ್ಲಿ ಮುನ್ನೆಚ್ಚರಿಕೆ ನೀಡಿಲ್ಲ. ಯಾವೊಬ್ಬ ಅಧಿಕಾರಿಯೂ ವಿವಾದ ಬಳಿಕ ನನ್ನನ್ನು ಸಂಪರ್ಕಿಸಿಲ್ಲ. ಈ ವಿಷಯದ ಕುರಿತಾಗಿ ಜಾಗೃತಿ ಮೂಡಿಸಿಲ್ಲ, ಚರ್ಚೆ ನಡೆಸಿಲ್ಲ ಎಂದು ಅವರು ಐಟಿಎಫ್ ವಿರುದ್ಧ ವಾಗ್ಧಾಳಿ ನಡೆಸಿದ್ದಾರೆ. 

2016ರಲ್ಲಿ ಆಸ್ಟ್ರೇಲಿಯಾ ಓಪನ್‌ ವೇಳೆ ಶರಪೋವಾ ಉದ್ದೀಪನ ಮದ್ದು ಸೇವಿಸಿದ್ದರು. ಇದು ದೊಡ್ಡ ಸುದ್ದಿಯಾಗಿತ್ತು. ಸ್ವತಃ ಇದನ್ನು ಶರಪೋವಾ ಮಾಧ್ಯಮಗೋಷ್ಠಿಯಲ್ಲಿ ಮೆಲ್ಡೋನಿಯಂ ಸೇವಿಸಿರುವುದನ್ನು ಒಪ್ಪಿಕೊಂಡಿದ್ದರು. ಮೆಲ್ಡೋನಿಯಂ ಸೇವಿಸಲು ಅನುಮತಿ ಇತ್ತು. ಹಠಾತ್‌ ಆಗಿ ಇದನ್ನು ನಿಷೇಧಿಸಲಾಗಿದೆ. ಇದರಲ್ಲಿ ತನ್ನ ತಪ್ಪಿಲ್ಲ ಎಂದು ಶರಪೋವಾ ಅಂಗಲಾಚಿದ್ದರು. 2 ವರ್ಷ ನಿಷೇಧಕ್ಕೆ ಒಳಪಟ್ಟರು.ಕೆಲ ದಿನಗಳ ನಂತರ ಈ ನಿಷೇಧ ಶಿಕ್ಷೆಯನ್ನು 15 ತಿಂಗಳಿಗೆ ತಗ್ಗಿಸಲಾಗಿತ್ತು.