ಮಗಳಿಗೆ ಜನ್ಮ, ಸೆರೆನಾಗೆ ಮರುಜನ್ಮ!

ನ್ಯೂಯಾರ್ಕ್‌: ಮಗಳು ಒಲಿಂಪಿಯಾಗೆ ಜನ್ಮ ನೀಡುವಾಗ ಬಹುತೇಕ ಸಾಯುವ ಸ್ಥಿತಿಗೆ ತಲುಪಿದ್ದೆ, ಈಗಲೂ ಅಪಾಯದಿಂದ ಪಾರಾಗಿಲ್ಲ ಎಂದು ಖ್ಯಾತ ಟೆನಿಸ್‌ ಆಟಗಾರ್ತಿ ಸೆರೆನಾ ವಿಲಿಯಮ್ಸ್‌ ಹೇಳಿದ್ದಾರೆ.

ಪತ್ರಿಕೆಯೊಂದಕ್ಕೆ ನೀಡಿದ ಸಂದರ್ಶನದಲ್ಲಿ ಪ್ರತಿಕ್ರಿಯಿಸಿದ ಸೆರೆನಾ, “ಒಲಿಂಪಿಯಾಗೆ ಜನ್ಮ ನೀಡುವ ವೇಳೆ ನನ್ನ ಶ್ವಾಸಕೋಶದಲ್ಲಿ ರಕ್ತಹೆಪ್ಪುಗಟ್ಟಿತ್ತು. ಇದರಿಂದ 6 ವಾರಗಳ ಕಾಲ ತೀವ್ರ ಸಂಕಟ ಅನುಭವಿಸಿದೆ. ಬಳಿಕ ಚೇತರಿಸಿಕೊಂಡೆ. 2011ರಲ್ಲೂ ಇಂಥದೇ ಒಂದು ಸಮಸ್ಯೆ ಆಗಿತ್ತು. ಆಗ ಕೂಡ ರಕ್ತ ಹೆಪ್ಪುಗಟ್ಟುವ ಸಮಸ್ಯೆ ಕಾಡಿತ್ತು. ಕಾಲಿಗೆ ಗಾಜಿನ ಚೂರು ತಾಗಿದ ನೋವು ಜೋರಾಯಿತು. 

ಮೊದಲೇ ರಕ್ತಹೆಪ್ಪುಗಟ್ಟಿದ ಸಮಸ್ಯೆಗೆ ಒಳಗಾಗಿದ್ದ ನನಗೆ ಇದರಿಂದ ಚೇತರಿಸಿಕೊಳ್ಳಲು ಸುಮಾರು 12 ತಿಂಗಳು ಬೇಕಾಯಿತು. ಇದಾದ ಬಳಿಕ ಹೊಟ್ಟೆಯಲ್ಲೂ ರಕ್ತಹೆಪ್ಪುಗಟ್ಟಿರುವುದನ್ನು ವೈದ್ಯರು ಪತ್ತೆಹಚ್ಚಿರು. ಬಳಿಕ ಅವರ ಅಕ್ಕರೆಯ ಚಿಕಿತ್ಸೆಯ ನೆರವಿನಿಂದ ಚೇತರಿಸಿಕೊಂಡೆ. ಎಲ್ಲ ಸಂದರ್ಭದಲ್ಲೂ ವೈದ್ಯರು ನನ್ನ ವಿಷಯದಲ್ಲಿ ಹೆಚ್ಚಿನ ಜಾಗರೂಕತೆ ತೆಗೆದುಕೊಂಡಿದ್ದಾರೆ. ಅವರಿಲ್ಲದಿರುತ್ತಿದ್ದರೆ ಇಂದು ನಾನಿಲ್ಲಿ ಇರುತ್ತಿರಲಿಲ್ಲ’ ಎಂದು ಹಿಂದಿನ ಘಟನೆಗಳನ್ನು ನೆನಪಿಸಿಕೊಂಡರು.