ಡಬ್ಲ್ಯುಟಿಟಿ ಕಂಟೆಂಡರ್‌: ಕ್ವಾರ್ಟರ್‌ಫೈನಲ್‌ನಲ್ಲಿ ಸಥಿಯನ್‌ಗೆ ಸೋಲು

ಝಾಗ್ರೆಬ್‌ (ಕ್ರೊವೇಶಿಯ): ಭಾರತದ ಟಿಟಿಪಟು ಜಿ. ಸಥಿಯನ್‌ ಜ್ಞಾನಶೇಖರನ್‌ ಇಲ್ಲಿ ನಡೆಯುತ್ತಿರುವ ಡಬ್ಲ್ಯುಟಿಟಿ ಕಂಟೆಂಡರ್‌ ಕೂಟದ ಪುರುಷರ ಸಿಂಗಲ್ಸ್‌ ಕ್ವಾರ್ಟರ್‌ಫೈನಲ್‌ ಪಂದ್ಯದಲ್ಲಿ ಸೋತು ಹೊರಬಿದ್ದಿದ್ದಾರೆ.

ವಿಶ್ವದ 34ನೇ ರ್‍ಯಾಂಕಿನ ಸಥಿಯನ್‌ ಚೈನೀಸ್‌ ತೈಪೆಯ ಚುಯಾಂಗ್‌ ಚಿಹ್‌-ಯುಯಾನ್‌ ಅವರೆದುರು 7-11, 9-11, 5-11 ಗೇಮ್‌ಗಳಿಂದ ಸೋಲನ್ನು ಕಂಡರು. ಇದು ಸಥಿಯನ್‌ ಅವರಿಗೆ ನಿರಾಶಾದಾಯಕ ಫ‌ಲಿತಾಂಶವಾಗಿದೆ. ಅವರು ಈ ಹಿಂದಿನ ಪಂದ್ಯದಲ್ಲಿ ಹಾಲಿ ಯುರೋಪಿಯನ್‌ ಚಾಂಪಿಯನ್‌ ಡಾರ್ಕೊ ಜಾರ್ಜಿಕ್‌ ಅವರನ್ನು 6-11, 12-10, 11-9, 12-10 ಗೇಮ್‌ಗಳಿಂದ ಸೋಲಿಸಿ ಅಚ್ಚರಿಯ ಫ‌ಲಿತಾಂಶಕ್ಕೆ ಕಾರಣರಾಗಿದ್ದರು.

ಆಬಳಿಕ ಅವರು 16ರ ಹರೆಯದ ಚೀನದ ಚೆನ್‌ ಯುವಾನ್ಯು ಅವರನ್ನು 11-9, 11-7, 12-10 ಗೇಮ್‌ಗಳಿಂದ ಸೋಲಿಸಿ ಕ್ವಾರ್ಟರ್‌ಫೈನಲಿಗೇರಿದ್ದರು.