ಕನ್ನಡದ “ಕೆಜಿಎಫ್’ ಭಾರತೀಯ ಚಿತ್ರರಂಗದಲ್ಲಿ ದೊಡ್ಡ ಸಂಚಲನ ಮೂಡಿಸಿದ ಚಿತ್ರ. ಈಗ “ಕೆಜಿಎಫ್ 2′ ಚಿತ್ರ ಬರುತ್ತಿರುವುದು ಗೊತ್ತೇ ಇದೆ. ಈ ಚಿತ್ರವನ್ನು ಯಶ್‌ ಅವರ ಅಪಾರ ಅಭಿಮಾನಿಗಳು ಕಾತುರದಿಂದ ಎದುರು ನೋಡುತ್ತಿದ್ದಾರೆ. ಚಿತ್ರದಲ್ಲಿ ಬಾಲಿವುಡ್‌ ನಟ ಸಂಜಯ್‌ದತ್‌ ಇರೋದು ಗೊತ್ತೇ ಇದೆ. ಈಗಾಗಲೇ ಅವರು ಅಧೀರ ಪಾತ್ರ ಮಾಡುತ್ತಿದ್ದು, ಅವರ ಫ‌ಸ್ಟ್‌ಲುಕ್‌ ರಿಲೀಸ್‌ ಆಗಿತ್ತು. ಆದರೆ, ಇದೀಗ ಸಂಜಯ್‌ದತ್‌ ಅವರ ಇನ್ನೊಂದು ಲುಕ್‌ ಲೀಕ್ ಆಗಿದ್ದು, ಅದೀಗ ಸಾಮಾಜಿಕ ತಾಣದಲ್ಲಿ ಸಿಕ್ಕಾಪಟ್ಟೆ ವೈರಲ್ ಆಗಿದೆ.
“ಕೆಜಿಎಫ್ 2′ ಚಿತ್ರದಲ್ಲಿ ಅಧೀರ ತುಂಬಾನೇ ಕುತೂಹಲ ಮೂಡಿಸಿರುವ ಸಿನಿಮಾ. ಯಶ್‌ ಮುಂದೆ ಖಡಕ್‌ ವಿಲನ್‌ ಆಗಿ ಸಂಜಯ್‌ದತ್‌ ಅಬ್ಬರಿಸಲಿದ್ದಾರೆ. ಸಂಜಯ್‌ದತ್‌ ಅಭಿಮಾನಿಗಳೂ ಸಹ ಅವರ ಪಾತ್ರವನ್ನು ನೋಡಲು ತುದಿಗಾಲ ಮೇಲೆ ನಿಂತಿದ್ದಾರೆ. ಅಧೀರನ ಪಾತ್ರದ ಮೊದಲ ಪೋಸ್ಟರ್‌ ರಿಲೀಸ್‌ ಮಾಡಿತ್ತಾದರೂ, ಅದರಲ್ಲಿ ಸಂಪೂರ್ಣ ಅವರ ಲುಕ್‌ ಹೇಗಿದೆ ಅನ್ನೋದು ಗೊತ್ತಿರಲಿಲ್ಲ. ಆದರೆ, ಇದೀಗ ಸಾಮಾಜಿಕ ತಾಣಗಳಲ್ಲಿ ಅಧೀರನ ಲುಕ್‌ವೊಂದು ವೈರಲ್ ಆಗಿದೆ. ಸಂಜಯ್‌ ದತ್‌ ಅವರ ಹೊಸ ಗೆಟಪ್‌ ನೋಡಿದವರು ಮತ್ತಷ್ಟು ಖುಷಿಯಲ್ಲಿದ್ದಾರೆ.
ಉದ್ದವಾದ ಕೂದಲು, ಜೊತೆಗೆ ತಲೆಗೊಂದು ಟ್ಯಾಟೂ, ಬಿಳಿ ದಾಡಿ ಬಟ್ಟಿರುವ ಲುಕ್‌ವೊಂದು ಲೀಕ್ ಆಗಿದೆ. ಆದರೆ, ಇದು “ಕೆಜಿಎಫ್ 2′ ಚಿತ್ರದ ಫೋಟೋನಾ? ಎಂಬ ಪ್ರಶ್ನೆಯೂ ಇದೆ. ಅನೇಕರು ಇದು ಅಧೀರ ಗೆಟಪ್‌ ಎನ್ನುತ್ತಿದ್ದಾರೆ. ಆದರೂ, ಈ ಫೋಟೋ ಹೇಗೆ ಲೀಕ್ ಆಯ್ತು ಅನ್ನೋದೇ ಗೊತ್ತಿಲ್ಲ. ಸದ್ಯದ ಮಟ್ಟಿಗೆ ಚಿತ್ರತಂಡಕ್ಕೆ ಈ ಫೋಟೋ ಲೀಕ್ ಆಗಿದ್ದು, ತಲೆನೋವಾಗಿ ಪರಿಣಮಿಸಿದೆ.
ಅದೇನೆ ಇರಲಿ, ಸಂಜಯ್‌ದತ್‌ ಅವರು ಒಳ್ಳೆಯ ವಿಲನ್‌ ಪಾತ್ರಕ್ಕಾಗಿ ಎದುರು ನೋಡುತ್ತಿರುವಾಗಲೇ “ಕೆಜಿಎಫ್ 2′ ಚಿತ್ರದ ಅಧೀರ ಪಾತ್ರ ಸಿಕ್ಕಿದೆ. ಅದೊಂದು ಅದ್ಭುತ ಪಾತ್ರ ಎಂದು ಸಂಜಯ್‌ದತ್‌ ಹೇಳಿಕೊಂಡಿದ್ದರು. ಇನ್ನು, ಇಡೀ ಚಿತ್ರರಂಗ ಕಾಯುತ್ತಿರುವ “ಕೆಜಿಎಫ್ 2′ ಚಿತ್ರ ಅ.23ರಂದು ಬಿಡುಗಡೆಯಾಗಲಿದೆ ಎಂದು ಅನೌನ್ಸ್‌ ಮಾಡಲಾಗಿತ್ತು. ಈ ಲಾಕ್‌ಡೌನ್‌ ನಂತರ ಸಿನಿಮಾ ಮುಂದಕ್ಕೆ ಹೋಗುತ್ತೋ ಇಲ್ಲವೋ ಕಾದು ನೋಡಬೇಕಿದೆ.
