ದುಬೈ: 2010ರಲ್ಲಿ ವಿವಾಹವಾಗಿ 4 ವರ್ಷದ ಗಂಡು ಮಗುವಿನ ಪೋಷಕರಾಗಿರುವ ಪಾಕ್‌ ಕ್ರಿಕೆಟಿಗ ಶೋಯಿಬ್‌ ಮಲಿಕ್-ಭಾರತದ ಟೆನಿಸ್‌ ತಾರೆ ಸಾನಿಯಾ ಮಿರ್ಜಾ ದಾಂಪತ್ಯ ಜೀವನ ಸದ್ಯದಲ್ಲೇ ಅಂತ್ಯವಾಗಲಿದೆಯಾ? ಹೀಗೊಂದು ಸುದ್ದಿ ಹರಿದಾಡುತ್ತಿದೆ. ಇದಕ್ಕೆ ಸಾನಿಯಾ ಮಿರ್ಜಾ ಅವರ ಸಾಮಾಜಿಕ ತಾಣದ ಕೆಲ ಪೋಸ್ಟ್‌ಗಳು. ಹಾಗೆಯೇ ಟೀವಿ ಕಾರ್ಯಕ್ರಮವೊಂದರಲ್ಲಿ ಶೋಯಿಬ್‌ ನೀಡಿದ ಹೇಳಿಕೆಯೇ ಕಾರಣ.
ಹಾಗೆ ನೋಡಿದರೆ ಎರಡೂ ತೀರಾ ಗಂಭೀರ ಸಂಗತಿಗಳೇನಲ್ಲ. ಆದರೆ ತಾರೆಯರು ಸಾಮಾಜಿಕ ತಾಣಗಳ ಮೂಲಕ ತಮ್ಮ ಅಂತರಂಗದ ತಳಮಳವನ್ನು ಸೂಕ್ಷ್ಮವಾಗಿ ಬಿಚ್ಚಿಡುತ್ತಾರೆ. ಇದರಿಂದ ಇವನ್ನು ಗಂಭೀರವಾಗಿಯೇ ಪರಿಗಣಿಸಿ, ಇಬ್ಬರೂ ಬೇರಾಗಬಹುದಾ ಎಂದು ಊಹಿಸಲಾಗುತ್ತಿದೆ.
ಇದನ್ನೂ ಓದಿ:ಹಿಂದೂ ವಿಚಾರದಲ್ಲಿ ಕಾಂಗ್ರೆಸ್ಸಿಗರ ಮನಸ್ಥಿತಿ ಏನೆಂದು ಗೊತ್ತಾಗುತ್ತಿದೆ: ದೊಡ್ಡನಗೌಡ ಪಾಟೀಲ
ಇತ್ತೀಚೆಗೆ ದುಬೈನ ಹೋಟೆಲೊಂದರಲ್ಲಿ ದಂಪತಿಯ 4 ವರ್ಷದ ಪುತ್ರ ಇಜಾನ್‌ ಹುಟ್ಟಿದಹಬ್ಬವನ್ನು ಆಚರಿಸಲಾಗಿತ್ತು. ಆ ಸಂದರ್ಭದಲ್ಲಿ ಶೋಯಿಬ್‌ ಮಲಿಕ್ ಚಿತ್ರಗಳನ್ನು ಇನ್ಸ್ಟಾಗ್ರಾಮ್‌ ಮೂಲಕ ಹಂಚಿಕೊಂಡಿದ್ದರು. ಸಾನಿಯಾ ತಮ್ಮ ಬಳಿಯಿರುವ ಯಾವುದೇ ಚಿತ್ರಗಳನ್ನು ಹಂಚಿಕೊಳ್ಳದೇ ತಣ್ಣಗಿದ್ದರು. ಸಾನಿಯಾ ಇತ್ತೀಚೆಗೆ ತಮ್ಮ ಮಗನೊಂದಿಗಿರುವ ಚಿತ್ರವೊಂದನ್ನು ಪ್ರಕಟಿಸಿ, “ನನ್ನನ್ನು ಅತಿ ಕಠಿಣ ದಿನಗಳಿಂದ ಹೊರತರುವ ಗಳಿಗೆಗಳು’ ಎಂದು ಬರೆದುಕೊಂಡಿದ್ದರು. ಹೀಗೆಯೇ ಹೃದಯ ಒಡೆದಿದೆ ಎಂಬಂತೆಯೂ ಬರೆದಿದ್ದರು.
ಪಾಕಿಸ್ತಾನಿ ಟೀವಿ ಕಾರ್ಯಕ್ರಮ ಆಸ್ಕ್ ದಿ ಪೆವಿಲಿಯನ್‌ನಲ್ಲಿ ಶೋಯಿಬ್‌ ಮಲಿಕ್ ಪಾಲ್ಗೊಂಡಿದ್ದಾಗ, ತನಗೆ ಸಾನಿಯಾ ಮಿರ್ಜಾ ಟೆನಿಸ್‌ ಅಕಾಡೆಮಿಗಳು ಎಲ್ಲಿವೆ ಎಂದೇ ಗೊತ್ತಿಲ್ಲ. ನಾನಲ್ಲಿಗೆ ಹೋಗಿಯೂ ಇಲ್ಲ ಎಂದಿದ್ದರು. ಇದರ ಬಗ್ಗೆಯೂ ವಿವಾದಗಳಾಗಿದ್ದವು. ಆದರೆ ಈ ಬಗ್ಗೆ ಇಬ್ಬರೂ ಏನನ್ನೂ ಮಾತನಾಡಿಲ್ಲ.
