ಲಾಸ್‌ಏಂಜಲೀಸ್‌: ಪ್ರಸಕ್ತ ಸಾಲಿನ ಗ್ರ್ಯಾಮಿ ಪ್ರಶಸ್ತಿಗಳನ್ನು ಕೊಡಮಾಡಲಾಗಿದ್ದು, ವಿಶ್ವಸಂಗೀತ ವಿಭಾಗದಲ್ಲಿ ಚೀನಾ- ಅಮೆರಿಕ ಸಂಗೀತಗಾರ ಯೋ-ಯೋ-ಮಾ ಅವರಿಗೆ ಪ್ರಶಸ್ತಿ ಲಭಿಸಿದೆ. ಈ ತಂಡದಲ್ಲಿದ್ದ ಭಾರತದ ತಬಲಾ ವಾದಕ ಸಂದೀಪ್‌ ದಾಸ್ ಅವರಿಗೂ ಈ ಗೌರವ ಪ್ರಾಪ್ತಿಯಾಗಿದೆ. ಖ್ಯಾತ ಸಿತಾರ್‌ ವಾದಕ ಪಂಡಿತ್‌ ರವಿಶಂಕರ್‌ ಪುತ್ರಿ ಅನುಷ್ಕಾ ಶಂಕರ್‌ ಸತತ 6ನೇ ಬಾರಿಗೆ ಪ್ರತಿಷ್ಠಿತ ಗೌರವದಿಂದ ವಂಚಿತರಾಗಿದ್ದಾರೆ. ಪ್ರಶಸ್ತಿ ಸ್ವೀಕರಿಸಿ ಮಾತನಾಡಿದ ಸಂದೀಪ್‌ ದಾಸ್ ಅವರು, ಇಂಥ ಕಾರ್ಯಕ್ರಮಗಳಿಂದ ನಮಗೆ ನೇರವಾಗಿ ಪ್ರಭಾವ ಬೀರುತ್ತದೆ. ವಿಶ್ವದ ಹಲವು ರಾಷ್ಟ್ರಗಳಿಂದ ಕಾರ್ಯಕ್ರಮದಲ್ಲಿ ಭಾಗವಹಿಸಲು ಸಾವಿರಾರು ಮಂದಿ ಬಂದಿರುತ್ತಾರೆ. ಅವರ ಮಾತುಗಳು ಪ್ರೋತ್ಸಾಹದಾಯಕವಾಗಿರುತ್ತವೆ ಎಂದಿದ್ದಾರೆ. ಇನ್ನುಳಿದಂತೆ ಇಂಗ್ಲಿಷ್‌ ಸಂಗೀತ ವಿಭಾಗದಲ್ಲಿ ಈ ಬಾರಿ ಬ್ರಿಟಿಷ್‌ ಗಾಯಕಿ 28ರ ಪ್ರಾಯದ ಗಾಯಕಿ ಅಡೆಲ್‌ ಅವರಿಗೆ ಪ್ರಶಸ್ತಿ ಲಭಿಸಿದೆ. ಆಲ್ಬಂ ಆಫ್ ದಿ ಇಯರ್‌, ರೆಕಾರ್ಡ್‌ ಆಫ್ ದಿ ಇಯರ್‌, ಸಾಂಗ್‌ ಆಫ್ ದಿ ಇಯರ್‌ ಸೇರಿ ಎಲ್ಲಾ ಐದು ವಿಭಾಗಗಳ ಪ್ರಶಸ್ತಿಗಳನ್ನು ಅಡೆಲ್‌ ಅವರೇ ಬಾಚಿಕೊಂಡಿದ್ದಾರೆ.
