ಜೂ.15ರವರೆಗೆ ಸ್ಯಾಮ್ಸಂಗ್‌ ಉತ್ಪನ್ನಗಳ ವಾರೆಂಟಿ ಅವಧಿ ವಿಸ್ತರಣೆ  

ಹೊಸದಿಲ್ಲಿ: ಗ್ರಾಹಕರಿಗೆ ನೆರವಾಗುವ ಕ್ರಮವೊಂದರಲ್ಲಿ ಸ್ಯಾಮ್ಸಂಗ್‌ ಇಂಡಿಯಾ ಕಂಪೆನಿ ತನ್ನ ಉತ್ಪನ್ನಗಳ ವಾರೆಂಟಿ ಅವಧಿಯನ್ನು ಜೂ.15ರವರೆಗೆ ವಿಸ್ತರಿಸಿದೆ.

ಇದರಿಂದ ಮಾ.20ರಿಂದ ಮೇ 31ರವರೆಗಿನ ಅವಧಿಯಲ್ಲಿ ವಾರೆಂಟಿ ಮುಕ್ತಾಯವಾಗಲಿರುವ ಉತ್ಪನ್ನಗಳ ವಾರೆಂಟಿಗೆ ಪ್ರಯೋಜನವಾಗಲಿದೆ.

ಲಾಕ್‌ಡೌನ್‌ ಅವಧಿಯಲ್ಲಿ ಗ್ರಾಹಕರಿಗೆ ಉತ್ಪನ್ನಗಳು ಹಾಳಾಗಿದ್ದರೆ ಅವುಗಳನ್ನು ವಾರೆಂಟಿಗೆ ಅನ್ವಯವಾಗಿ ಸರಿಪಡಿಸಲು ಸಾಧ್ಯವಾಗಿರಲಿಲ್ಲ. ಈ ಕಾರಣದಿಂದ ವಾರೆಂಟಿ ವಿಸ್ತರಿಸಲಾಗಿದೆ. ಇದನ್ನು ಸ್ಯಾಮ್ಸಂಗ್‌ನ ವೆಬ್‌ಸೈಟ್‌ನಲ್ಲಿ ಪ್ರಕಟಿಸಲಾಗಿದೆ.

ವಾರೆಂಟಿ ವಿಸ್ತರಣೆಯ ಅನುಕೂಲಗಳು ಟಿ.ವಿ., ಸ್ಮಾರ್ಟ್‌ಫೋನ್‌, ರೆಫ್ರಿಜರೇಟರ್‌, ಟ್ಯಾಬ್ಲೆಟ್‌ ಇತ್ಯಾದಿ ಗ್ರಾಹಕ ಸರಕುಗಳಿಗೆ ಅನ್ವಯಿಸಲಿದೆ. ಸದ್ಯ ಕಂಟೈನ್‌ಮೆಂಟ್‌ ಝೋನ್‌ಗಳಲ್ಲಿರುವ ಸರ್ವೀಸ್‌ ಸೆಂಟರ್‌ಗಳು ಇನ್ನೂ ಕಾರ್ಯನಿರ್ವಹಿಸುತ್ತಿಲ್ಲ. ಆದರೆ ಸೇವಾ ಲಭ್ಯತೆಯ ಆಧಾರದ ಮೇಲೆ ರಿಪೇರಿ ಸೇವೆಗಳನ್ನು ಪಡೆದುಕೊಳ್ಳಬಹುದು ಎಂದು ಸ್ಯಾಮ್ಸಂಗ್‌ ಹೇಳಿದೆ. ವಾರೆಂಟಿ ಅವಧಿಯನ್ನು ಸ್ಯಾಮ್ಸಂಗ್‌ ಇಂಡಿಯಾ ವಿಸ್ತರಣೆ ಮಾಡುತ್ತಿರುವುದು ಇದು ಎರಡನೇ ಬಾರಿಯಾಗಿದೆ.