ಹೊಸ ಕಟ್ಟಡದಲ್ಲಿ ಮಾದರಿಯಾಗಿ ರೂಪುಗೊಳ್ಳುತ್ತಿದೆ ಸಖಿ

ಮಹಾನಗರ : ನಗರದಲ್ಲಿರುವ ದ.ಕ ಜಿಲ್ಲಾ “ಸಖಿ-ಒನ್‌ಸ್ಟಾಪ್‌ ಸೆಂಟರ್‌’ಗೆ ಹೊಸ ಕಟ್ಟಡ ಸಿದ್ಧಗೊಂಡಿದ್ದು ಈ ಕೇಂದ್ರವು ರಾಜ್ಯಕ್ಕೆ ಮಾದರಿಯೆಂಬಂತೆ ರೂಪುಗೊಳ್ಳುತ್ತಿದೆ.

ದೌರ್ಜನ್ಯಕ್ಕೊಳಗಾದ ಮಹಿಳೆಯರಿಗೆ ಒಂದೇ ಸೂರಿನಡಿ ವೈದ್ಯಕೀಯ, ಕಾನೂನು ಸಹಿತ ವಿವಿಧ ನೆರವು ಒದಗಿಸುವ ಸಖೀ ಕೇಂದ್ರವು 2019ರ ಜ. 26ರಿಂದ ಸರಕಾರಿ ಲೇಡಿಗೋಶನ್‌ ಸರಕಾರಿ ಆಸ್ಪತ್ರೆಯ ಕಟ್ಟಡದಲ್ಲಿ ಆರಂಭ ಗೊಂಡಿತ್ತು. ಇದೀಗ ಲೇಡಿ ಗೋಶನ್‌ ಆಸ್ಪತ್ರೆಯ ಆವರಣದಲ್ಲೇ ಇರುವ ನೂತನ ಎಂಸಿಎಚ್‌ ಕಟ್ಟಡದ ಎರಡನೇ ಅಂತಸ್ತಿನಲ್ಲಿ ಪ್ರತ್ಯೇಕವಾಗಿ ಸೇವೆ ಒದಗಿಸಲು ಸಿದ್ಧಗೊಳ್ಳುತ್ತಿದೆ.

ಹೊಸ ಕಟ್ಟಡದಲ್ಲಿ ಕೌನ್ಸೆಲಿಂಗ್‌, ಕನ್ಸಲ್ಟೆನ್ಸಿ, ಕಚೇರಿ, ಆಡಳಿತಾಧಿಕಾರಿ ಕೊಠಡಿ, ವಾರ್ಡ್‌, ಲಿವಿಂಗ್‌, ಕಿಚನ್‌ ಸಹಿತ ಒಟ್ಟು 8 ಕೊಠಡಿಗಳು, 5 ಬೆಡ್‌ಗಳಿವೆ. ಅಂದಾಜು 48 ಲ.ರೂ. ವೆಚ್ಚದಲ್ಲಿ ಇದನ್ನು ಸಿದ್ಧಗೊಳಿಸಲಾಗುತ್ತಿದೆ. ದೌರ್ಜನ್ಯ ಕ್ಕೊಳಗಾದ ಮಹಿಳೆಯರಿಗೆ ದಿನದ 24 ಗಂಟೆಗಳ ಕಾಲವೂ ವೈದ್ಯಕೀಯ ನೆರವು ನೀಡಲಾಗುತ್ತದೆ. ಅಲ್ಲದೆ ದಿನದ 24 ಗಂಟೆ ಕೂಡ ಕಾನೂನು ನೆರವಿಗೆ ನ್ಯಾಯವಾದಿಗಳು ಲಭ್ಯರಿರುತ್ತಾರೆ. ಪೊಲೀಸರು, ಆಪ್ತ ಸಮಾಲೋಚಕರ ಸೇವೆಯೂ ಲಭ್ಯವಿದೆ.

ಇನ್ನಷ್ಟು ಪೂರಕ ವ್ಯವಸ್ಥೆ
ಹೊಸ ಕಟ್ಟಡದಲ್ಲಿ ವಿಶಾಲ ಸ್ಥಳಾವಕಾಶವಿರುವುದರಿಂದ ಇನ್ನಷ್ಟು ಉತ್ತಮ ಸೇವೆ ಒದಗಿಸಲು ಸಾಧ್ಯ ವಾಗಲಿದೆ. ಇದಕ್ಕೆ ಪೂರಕವಾಗಿ ಆರೋಗ್ಯ ಶಿಕ್ಷಣ, ವೀಡಿಯೋ ಕಾನ್ಫರೆನ್ಸ್‌ ಮೊದಲಾದವುಗಳಿಗೆ ಅಗತ್ಯ ಸೌಕರ್ಯ ಒದಗಿಸಿಕೊಡಲು ಯೋಜನೆ ಹಾಕಿಕೊಳ್ಳ ಲಾಗಿದೆ. ಜಿಲ್ಲಾಡಳಿತ, ಆರೋಗ್ಯ, ಮಹಿಳಾ ಮತ್ತು ಮಕ್ಕಳ ಕಲ್ಯಾಣ ಇಲಾಖೆ, ಪೊಲೀಸ್‌ ಇಲಾಖೆ ಮತ್ತು ಕೆಎಂಸಿ ವೈದ್ಯರನ್ನೊಳಗೊಂಡ ಸಮನ್ವಯ ಸಮಿತಿಯ ಸಲಹೆಗಳೊಂದಿಗೆ ಕೆಲಸಗಳು ನಡೆಯುತ್ತಿವೆ ಎಂದು ಸರಕಾರಿ ಲೇಡಿಗೋಶನ್‌ ಆಸ್ಪತ್ರೆ ವೈದ್ಯಕೀಯ ಅಧೀಕ್ಷಕ ಡಾ| ದುರ್ಗಾಪ್ರಸಾದ್‌ ಅವರು ತಿಳಿಸಿದ್ದಾರೆ.

ದಕ್ಷಿಣಕನ್ನಡ