ಮಾಸ್ಕೋ : ಕನಿಷ್ಠ 30 ಮಂದಿಗೆ ಮಾದಕ ದ್ರವ್ಯ ತಿನ್ನಿಸಿ, ಕೊಂದು ಬಳಿಕ ಅವರನ್ನು ತಿಂದು ಮುಗಿಸಿದ ಅತ್ಯಮಾನುಷ ಭೀಭತ್ಸಕರ ಕೃತ್ಯ ಎಸಗಿದ ರಶ್ಯನ್‌ ದಂಪತಿಯನ್ನು ಬಂಧಿಸಲಾಗಿದೆ.
ಸಿಡ್ನಿ ಮಾರ್ನಿಂಗ್‌ ಹೆರಾಲ್ಡ್‌ ನಲ್ಲಿ ಪ್ರಕಟವಾಗಿರುವ ವರದಿಯ ಪ್ರಕಾರ ರಶ್ಯದ ಈ ರಾಕ್ಷಸೀ ಪ್ರವೃತ್ತಿಯ ದಂಪತಿ ತಮ್ಮ ಅಮಾಯಕ ಬಲಿಪಶುಗಳಿಗೆ ಹೈ ಡೋಸೆಜ್‌ ಡ್ರಗ್‌ ತಿನ್ನಿಸಿ ಅವರು ಜೀವಂತವಿರುವಾಗಲೇ ಅವರ ಚರ್ಮವನ್ನು ಸುಲಿದು, ಅವರ ಅಂಗಾಂಗಗಳನ್ನು ಡೀಪ್‌ ಫ್ರೀಜರ್‌ನಲ್ಲಿ ದಾಸ್ತಾನು ಇರಿಸಿ ಬಳಿಕ ತಿನ್ನುತ್ತಿದ್ದರು.
ರಶ್ಯದ ಈ ಬಂಧಿತ ರಕ್ಕಸ ದಂಪತಿಯನ್ನು ನತಾಲಿಯಾ ಬಕ್ಷೀವಾ ಮತ್ತು ದಿಮಿತ್ರಿ ಬಕ್‌ಶೀವ್‌ ಎಂದು ಗುರುತಿಸಲಾಗಿದೆ. ಇವರನ್ನು ರಶ್ಯದ ಕ್ರಸ್ನದೋರ್‌ ಎಂಬಲ್ಲಿ ಸೆರೆ ಹಿಡಿಯಲಾಯಿತು.
ಈ ರಕ್ಕಸ ದಂಪತಿಯನ್ನು ಸೆರೆ ಹಿಡಿಯುವುದಕ್ಕೆ ನಗರದ ರಸ್ತೆಯೊಂದರಲ್ಲಿ ಬಿದ್ದಿದ್ದ ಮೊಬೈಲ್‌ ಫೋನ್‌ ಸುಳಿವು ನೀಡಿತು. ಆ ಮೊಬೈಲ್‌ನಲ್ಲಿ ಮನುಷ್ಯರ ಅಂಗಾಂಗಗಳನ್ನು ವ್ಯಕ್ತಿಯೊಬ್ಬ ತಿನ್ನುತ್ತಿದ್ದ ಫೋಟೋಗಳು ಇದ್ದವು. ಈ ಮೊಬೈಲ್‌ ಫೋನ್‌ ಮೂಲಕವೇ ರಕ್ಕಸ ದಂಪತಿಯ ಜಾಡನ್ನು ಪೊಲೀಸರು ಪತ್ತೆ ಹಚ್ಚಿದರು.
ಬಿಬಿಸಿ ವರದಿ ಪ್ರಕಾರ ಈ ದಂಪತಿ ತಾವು ಕನಿಷ್ಠ 30 ಮಂದಿಗೆ ಡ್ರಗ್‌ ತಿನ್ನಿಸಿ, ಚರ್ಮ ಸುಲಿದು, ಕೊಂದು, ಅವರ ಅಂಗಾಂಗಗಳನ್ನು ತಿಂದಿರುವುದಾಗಿ ಪೊಲೀಸರಲ್ಲಿ ತಮ್ಮ ಅಪರಾಧವನ್ನು ಒಪ್ಪಿಕೊಂಡಿದ್ದಾರೆ.
ವಿಶೇಷವೆಂದರೆ ಈ ದಂಪತಿ ಮಿಲಿಟರಿ ನೆಲೆಯೊಂದರಲ್ಲಿ ಕೆಲಸ ಮಾಡುತ್ತಿತ್ತು ಎಂಬುದು ಗೊತ್ತಾಗಿದೆ.
