RSS ಅಪ್ರತಿಮ ದೇಶ ಭಕ್ತರ ಸಂಘಟನೆ : ಸಚಿವ ಸಿ.ಸಿ.ಪಾಟೀಲ

ಗದಗ: ಆರ್.ಎಸ್.ಎಸ್ ಕೋಟ್ಯಂತರ ಜನರಿಗೆ ದೇಶ ಸೇವೆ ಮತ್ತು ಆಪತ್ತಿನ ಪರಿಸ್ಥಿತಿಯಲ್ಲಿ ನೆರವಾಗುವ ಬಗ್ಗೆ ಬೋಧಿಸುತ್ತಿದೆಯೇ ವಿನಃ ವಂಶಪಾರಂಪರ್ಯ, ಕುಟುಂಬ ರಾಜಕಾರಣವನ್ನು  ಅಲ್ಲ ಎಂದು ಲೋಕೋಪಯೋಗಿ ಸಚಿವ ಸಿ.ಸಿ.ಪಾಟೀಲ ಅವರು ಮಾಜಿ ಸಿಎಂ ಎಚ್.ಡಿ.ಕುಮಾರಸ್ವಾಮಿ ಹೇಳಿಕೆಗೆ ತಿರುಗೇಟು ನೀಡಿದ್ದಾರೆ.

ಈ ಕುರಿತು ಪತ್ರಿಕಾ ಹೇಳಿಕೆ ನೀಡಿರುವ ಅವರು, ರಾಜಕೀಯ ಲಾಭ ಹಾಗೂ ಕೆಲವರ ತುಷ್ಟೀಕರಣಕ್ಕಾಗಿ ಆರ್‌ಎಸ್‌ಎಸ್‌ನ್ನು ಟೀಕಿಸುವುದು ಚಾಳಿಯಾಗಿದೆ. ಈಗ ರಾಜ್ಯದಲ್ಲಿ ಎರಡು ವಿಧಾನಸಭಾ ಕ್ಷೇತ್ರಗಳಿಗೆ ಉಪಚುನಾವಣೆ ಎದುರಾಗುತ್ತಿರುವುದರಿಂದ ಮಾಜಿ ಸಿಎಂ ಎಚ್.ಡಿ.ಕುಮಾರಸ್ವಾಮಿ ಕೂಡಾ ಅದೇ ಚಾಳಿಯನ್ನು ಮುಂದುವರಿಸಿದ್ದಾರೆ ಎಂದು ಲೇವಡಿ ಮಾಡಿದರು.

ಆರ್.ಎಸ್.ಎಸ್. ಸೇವಾ ಮನೋಭಾವವನ್ನು ಈ ಮಾಜಿ ಪ್ರಧಾನಿ ಎಚ್.ಡಿ.ದೇವೇಗೌಡರು ಮುಕ್ತ ಕಂಟದಿಂದ ಪ್ರಶಂಸಿಸಿದ್ದರು ಎಂಬುದು ಮೆಲುಕು ಹಾಕಿರುವ ಸಚಿವರು, ಆರೆಸ್ಸೆಸ್ ಅಪ್ರತಿಮ ದೇಶ ಭಕ್ತರ ಸಂಘಟನೆ. ಸಂಘಟನೆಯಲ್ಲಿ ಕೋಟ್ಯಂತರ ಜನರು ಸ್ವಯಂ ಸೇವಕರಾಗಿ ಕೆಲಸ ಮಾಡುತ್ತಿದ್ದಾರೆ. ಎಷ್ಟೋ ಜನರು ಸಕ್ರಿಯ ರಾಜಕಾರಣಕ್ಕೆ ಇಳಿದಿಲ್ಲ. ಯಾವುದೇ ಚುನಾವಣಾ ಕಣಕ್ಕೂ ಇಳಿದಿಲ್ಲ. ಅಧಿಕಾರಕ್ಕಾಗಿ ಗಂಟು ಬಿದ್ದಿಲ್ಲ ಎಂಬುದು ಕುಮಾರಸ್ವಾಮಿ ಅವರಿಗೆ ಅರ್ಥವಾಗಬೇಕಿತ್ತು ಎಂದು ಕುಟುಕಿದ್ದಾರೆ.