ವಿಂಬಲ್ಡನ್‌: ಫೆಡರರ್‌ ಮುನ್ನಡೆ

ಲಂಡನ್‌: ರೋಜರ್‌ ಫೆಡರರ್‌ ಮತ್ತು ನೊವಾಕ್‌ ಜೊಕೋವಿಕ್‌ ಹೆಚ್ಚು ಪರಿಶ್ರಮ ಪಡದೇ ವಿಂಬಲ್ಡನ್‌ ಟೆನಿಸ್‌ ಕೂಟದಲ್ಲಿ ಮೊದಲ ಸುತ್ತು ದಾಟಿದ್ದಾರೆ. ಅವರಿಬ್ಬರ ಎದುರಾಳಿಗಳು ಗಾಯದ ಸಮಸ್ಯೆಯಿಂದ ಪಂದ್ಯ ತ್ಯಜಿಸಿರುವುದು ಇದಕ್ಕೆ ಕಾರಣವಾಗಿದೆ. ಇದೇ ವೇಳೆ ಮೂರು ಸೆಟ್‌ಗಳ ಹೋರಾಟದಲ್ಲಿ ಜಯ ಸಾಧಿಸಿದ ಕ್ಯಾರೋಲಿನ್‌ ವೋಜ್ನಿಯಾಕಿ ಕೂಡ ಮುನ್ನಡೆದಿದ್ದಾರೆ.

ದಾಖಲೆ ಎಂಟನೇ ವಿಂಬಲ್ಡನ್‌ ಪ್ರಶಸ್ತಿಯ ನಿರೀಕ್ಷೆ ಇಟ್ಟುಕೊಂಡಿರುವ ಫೆಡರರ್‌ ಉತ್ತಮ ಆರಂಭ ಪಡೆದಿದ್ದರು. ಮೊದಲ ಸೆಟ್‌ನ ಎಂಟನೇ ಗೇಮ್‌ನಲ್ಲಿ ತನ್ನ ಬಾಳ್ವೆಯ 10 ಸಾವಿರದ ಏಸ್‌ ಸಿಡಿಸಿದ್ದ ಫೆಡರರ್‌ 6-3, 3-0 ಸೆಟ್‌ಗಳಿಂದ ಮುನ್ನಡೆಯಲ್ಲಿದ್ದಾಗ ಅವರ ಎದುರಾಳಿ ಅಲೆಕ್ಸಾಂಡರ್‌ ಡೊಲ್ಗೊಪೊಲೋವ್‌ ಗಾಯದ ಸಮಸ್ಯೆಯಿಂದ ಪಂದ್ಯ ತ್ಯಜಿಸಿದರು.  ವಿಂಬಲ್ಡನ್‌ನಲ್ಲಿ 85ನೇ ಪಂದ್ಯ ಗೆದ್ದು ದಾಖಲೆ ಮಾಡಿರುವ ಫೆಡರರ್‌ ಇಲ್ಲಿ ಪ್ರಶಸ್ತಿ ಗೆಲ್ಲುವ ಫೇವರಿಟ್‌ಗಳಲ್ಲಿ ಒಬ್ಬರಾಗಿದ್ದಾರೆ.

ಕಳೆದ ಜನವರಿಯಲ್ಲಿ ಅನಿರೀಕ್ಷಿತವಾಗಿ ಆಸ್ಟ್ರೇಲಿಯನ್‌ ಓಪನ್‌ ಜಯಿಸಿದ್ದ ಫೆಡರರ್‌ ಆವೇ ಅಂಗಣದ ಟೆನಿಸ್‌ ಕೂಟಗಳಿಂದ ದೂರ ಉಳಿದಿದ್ದರು. ಇದೀಗ ವಿಂಬಲ್ಡನ್‌ನಲ್ಲಿ ಆಡುತ್ತಿರುವ ಅವರು 2012ರ ಬಳಿಕ ಮೊದಲ ಬಾರಿ ಪ್ರಶಸ್ತಿ ಗೆಲ್ಲುವ ಗುರಿ ಇಟ್ಟುಕೊಂಡಿದ್ದಾರೆ.

ಮೂರು ಬಾರಿಯ ವಿಂಬಲ್ಡನ್‌ ಚಾಂಪಿಯನ್‌ ಜೊಕೋವಿಕ್‌ ಸ್ಲೋವಾಕಿಯದ ಮಾರ್ಟಿನ್‌ ಕ್ಲಿಝನ್‌ ವಿರುದ್ಧ 6-3, 2-0 ಸೆಟ್‌ಗಳಿಂದ ಮುನ್ನಡೆಯಲ್ಲಿದ್ದಾಗ ಕ್ಲಿಝನ್‌ ಗಾಯದ ಸಮಸ್ಯೆಯಿಂದ ಪಂದ್ಯ ತ್ಯಜಿಸಿದರು. ಮುಂದಿನ ಸುತ್ತಿನಲ್ಲಿ ಜೊಕೋವಿಕ್‌ ಜೆಕ್‌ ಗಣರಾಜ್ಯದ ಆ್ಯಡಂ ಪಾವ್ಲಸೆಕ್‌ ಅವರನ್ನು ಎದುರಿಸಲಿದ್ದಾರೆ.

ಮೊದಲ ಮಗುವಿನ ನಿರೀಕ್ಷೆಯಲ್ಲಿರುವ ಸೆರೆನಾ ವಿಲಿಯಮ್ಸ್‌ ಈ ಕೂಟದಿಂದ ಹಿಂದೆ ಸರಿದ ಕಾರಣ ವನಿತೆಯರ ವಿಭಾಗದ ಪ್ರಶಸ್ತಿ ಗೆಲ್ಲಲು ಎಲ್ಲರಿಗೂ ಮುಕ್ತ ಅವಕಾಶವಿದೆ. 2016ರ ಆಸ್ಟ್ರೇಲಿಯನ್‌ ಮತ್ತು ಯುಎಸ್‌ ಓಪನ್‌ ಚಾಂಪಿಯನ್‌ ಆ್ಯಂಜೆಲಿಕ್‌ ಕೆರ್ಬರ್‌ ಗೆಲ್ಲುವ ಫೇವರಿಟ್‌ಗಳಲ್ಲಿ ಸೇರಿದ್ದಾರೆ.

ಅಗ್ರ ಶ್ರೇಯಾಂಕದ ಕೆರ್ಬರ್‌ ಅಮೆರಿಕದ ಅರ್ಹತಾ ಆಟಗಾರ್ತಿ ಐರಿನಾ ಫಾಲ್ಕೋನಿ ಅವರನ್ನು 6-4, 6-4 ಸೆಟ್‌ಗಳಿಂದ ಕೆಡಹಿದರೆ ಮಾಜಿ ನಂಬರ್‌ ವನ್‌ ಕ್ಯಾರೋಲಿನ್‌ ವೋಜ್ನಿಯಾಕಿ ಅವರು ಟಿಮಿಯಾ ಬಾಬೋಸ್‌ ಅವರನ್ನು 6-4, 4-6, 6-1 ಸೆಟ್‌ಗಳಿಂದ ಕೆಡಹಿ ಮುನ್ನಡೆದರು. ಇನ್ನೊಂದು ಪಂದ್ಯದಲ್ಲಿ ಮಾಜಿ ಫ್ರೆಂಚ್‌ ಓಪನ್‌ ಚಾಂಪಿಯನ್‌ ಗಾರ್ಬಿನ್‌ ಮುಗುರುಜಾ ರಶ್ಯದ ಏಕ್ತರೀನಾ ಅಲೆಕ್ಸಾಂಡ್ರೋವಾ ಅವರನ್ನು 6-2, 6-4 ಸೆಟ್‌ಗಳಿಂದ ಉರುಳಿಸಿದರು.

ಆಸ್ಟ್ರೀಯದ ಎಂಟನೇ ಶ್ರೇಯಾಂಕದ ಡೊಮಿನಿಕ್‌ ಥೀಮ್‌ ಅವರು ವಾಸೆಕ್‌ ಪೊಸ್ಪಿಸಿಲ್‌ ಅವರನ್ನು 6-4, 6-4, 6-3 ನೇರ ಸೆಟ್‌ಗಳಿಂದ ಸೋಲಿಸಿದರೆ 2010ರ ವಿಂಬಲ್ಡನ್‌ ರನ್ನರ್‌ ಅಪ್‌ ಥಾಮಸ್‌ ಬೆರ್ಡಿಶ್‌ ಅವರು ಜೆರೆಮಿ ಚಾರ್ಡಿ ಅವರನ್ನು 6-3, 3-6, 7-6 (7-4), 6-4 ಸೆಟ್‌ಗಳಿಂದ ಪರಾಭವಗೊಳಿಸಿದರು.