ಲೆಜೆಂಡ್ ರೋಜರ್ ಫೆಡರರ್‌ ಗೆ ವಿಂಬಲ್ಡನ್ ನಲ್ಲಿ ಸೋಲಿನ ಆಘಾತ

ಲಂಡನ್‌: ದಂತಕಥೆ ರೋಜರ್‌ ಫೆಡರರ್‌ಗೆ 21ನೇ ಗ್ರ್ಯಾನ್‌ ಸ್ಲ್ಯಾಮ್ ಗೆಲ್ಲುವ ಅವಕಾಶ ತಪ್ಪಿದೆ. ಅವರು ಕ್ವಾರ್ಟರ್‌ ಫೈನಲ್‌ನಲ್ಲಿ ಹ್ಯುಬರ್ಟ್‌ ಹರ್ಕಾಜ್‌ ವಿರುದ್ಧ 3-6, 6-7, 0-6ರಿಂದ ಸೋತು ಹೋಗಿದ್ದಾರೆ.

ಮಹಿಳಾ ಸಿಂಗಲ್ಸ್‌ ನಲ್ಲಿ ವಿಶ್ವ ನಂ.1 ಆಟಗಾರ್ತಿ ಆ್ಯಶ್ಲೆ ಬಾರ್ಟಿ ಗೆದ್ದು ವಿಂಬಲ್ಡನ್‌ ಸೆಮಿಫೈನಲ್‌ ಪ್ರವೇಶಿಸಿದ್ದಾರೆ. ಅವರು ಟೊಮ್ಲಾನೊವಿಕ್‌ ವಿರುದ್ಧ 6-1, 6-3 ಅಂತರದಿಂದ ಗೆದ್ದರು. ಆ್ಯಶ್ಲೆ ಬಾರ್ಟಿ 2011ರಲ್ಲಿ ವಿಂಬಲ್ಡನ್‌ ಬಾಲಕಿಯರ ಚಾಂಪಿಯನ್‌ ಆಗಿದ್ದರು. ಇನ್ನೊಂದು ಸೆಮಿಫೈನಲ್‌ನಲ್ಲಿ ಬೆಲರೂಸ್‌ನ ಅರಿನಾ ಸಬಲೆಂಕಾ ಮತ್ತು ಚೆಕ್‌ ಗಣರಾಜ್ಯದ ಕ್ಯಾರೋಲಿನಾ ಪ್ಲಿಸ್ಕೋವಾ ಮುಖಾಮುಖೀ ಆಗಲಿದ್ದಾರೆ.

ಜೊಕೊ ಉಪಾಂತ್ಯಕ್ಕೆ: ವಿಶ್ವ ನಂ.1 ಆಟಗಾರ ಸರ್ಬಿಯದ ನೊವಾಕ್‌ ಜೊಕೊವಿಚ್‌ ಪುರುಷರ ಸಿಂಗಲ್ಸ್‌ ನಲ್ಲಿ ನೇರ ಸೆಟ್‌ಗಳ ಜಯ ಸಾಧಿಸಿ ಸೆಮಿ ಫೈನಲ್‌ಗೇರಿದ್ದಾರೆ. ಅವರು ಮಾರ್ಟನ್‌ ಫುಕ್ಸೋವಿಕ್ಸ್‌ ಎದುರು 6-3,6-4,6-4ರಿಂದ ಗೆದ್ದರು.

ಸಾನಿಯಾ-ಬೋಪಣ್ಣಗೆ ಸೋಲು: ಇನ್ನು ಮಿಶ್ರ ಡಬಲ್ಸ್‌ನಲ್ಲಿ ಭಾರತದ ಸಾನಿಯಾ ಮಿರ್ಜಾ-ರೋಹನ್‌ ಬೋಪಣ್ಣ ಜೋಡಿ ತೀವ್ರ ಹೋರಾಟ ನಡೆಸಿಯೂ ಸೋತುಹೋಯಿತು. ಈ ಜೋಡಿ 16ರ ಘಟ್ಟದಲ್ಲಿ 3-6, 6-3, 9-11ರಿಂದ ಆಂಡ್ರೆಜಾ ಕ್ಲೆಪಕ್‌-ಜಾನ್‌ ಜೂಲಿಯೆನ್‌ ರೋಜರ್‌ ಜೋಡಿಯೆದುರು ಸೋಲನುಭವಿಸಿತು