ಹೊಂಡಮಯ ಮಾರ್ಗೋಳಿ- ಕಳಂಜಿ-ಆನಗಳ್ಳಿ ರಸ್ತೆ

ಬಸ್ರೂರು: ಬಸ್ರೂರು ಗ್ರಾ.ಪಂ. ವ್ಯಾಪ್ತಿಯ ಮಾರ್ಗೋಳಿಯಿಂದ ಸಾಗುವ 3 ಕಿ.ಮೀ. ಉದ್ದದ ರಸ್ತೆಯ ಉದ್ದಕ್ಕೂ ಹೊಂಡ ಬಿದ್ದಿದ್ದು ಸಂಚಾರಕ್ಕೆ ಅಯೋಗ್ಯವಾಗಿದೆ. ಮಾರ್ಗೋಳಿಯಿಂದ ರೈಲ್ವೆ ಸೇತುವೆ ವರೆಗೆ ಈ ರಸ್ತೆ ಬಸ್ರೂರು ಗ್ರಾ.ಪಂ. ವ್ಯಾಪ್ತಿಗೆ ಬರುತ್ತದೆ ಬಳಿಕ ರಸ್ತೆ ಕಳಂಜಿಯ ಮೂಲಕ ಆನಗಳ್ಳಿಗೆ ಸಾಗುತ್ತದೆ. ಅದು ಆನಗಳ್ಳಿ ಗ್ರಾ.ಪಂ. ವ್ಯಾಪ್ತಿಗೆ ಒಳಪಡುತ್ತದೆ. 1.5 ಕಿ.ಮೀ. ಉದ್ದದ ಈ ರಸ್ತೆಗೆ ಜಲ್ಲಿ ಹಾಕಲಾಗಿದ್ದು ಡಾಮರು ಹಾಕದ್ದರಿಂದ ಜಲ್ಲಿ ಕಲ್ಲುಗಳು ಎದ್ದು ಬಂದಿವೆ. ಇದರ ತುರ್ತು ರಿಪೇರಿ ಮಾಡಬೇಕೆಂದು ಗ್ರಾಮಸ್ಥರು ಆಗ್ರಹಿಸಿದ್ದಾರೆ.

ಮಾರ್ಗೋಳಿ ಶನೀಶ್ವರ ದೇವಸ್ಥಾನದಿಂದ ಅರ್ಧ ಕಿ.ಮೀ. ಉದ್ದದ ರಸ್ತೆಗೆ ಶಾಸಕರ ಅನುದಾನದಡಿ ಕಾಂಕ್ರೀಟ್‌ ಹಾಕಲಾಗಿದೆ. ಮುಂದಿನ ರಸ್ತೆಯ ಹೊಂಡಕ್ಕೆ ಮಳೆಗಾಲದಲ್ಲಿ ಕಲ್ಲು, ಮಣ್ಣು ಹಾಕಿ ಮುಚ್ಚಿದ್ದೇವೆ. ಪ್ರಸ್ತುತ ಇರುವ ಹೊಂಡಗಳನ್ನು ಗ್ರಾ.ಪಂ.ನ ಲಭ್ಯ ಅನುದಾನದಡಿ ಮುಚ್ಚಲಾಗುವುದು ಎಂದು ಬಸ್ರೂರು ಗ್ರಾ.ಪಂ. ಪಿಡಿಒ ನಾಗೇಂದ್ರ ಹೇಳಿದ್ದಾರೆ.