SA vs Pak, 2nd Test: ರಿಕಲ್ಟನ್‌ ದ್ವಿಶತಕ, ದಕ್ಷಿಣ ಆಫ್ರಿಕಾ ಬೃಹತ್‌ ಮೊತ್ತ

ಕೇಪ್‌ಟೌನ್‌: ಆರಂಭಕಾರ ರಿಯಾನ್‌ ರಿಕಲ್ಟನ್‌ ಅವರ ಅಮೋಘ ದ್ವಿಶತಕ, ನಾಯಕ ಟೆಂಬ ಬವುಮ ಮತ್ತು ವಿಕೆಟ್‌ ಕೀಪರ್‌ ಕೈಲ್‌ ವೆರೇಯ್ನ ಅವರ ಆಕರ್ಷಕ ಶತಕ ಸಾಹಸದಿಂದ ಕೇಪ್‌ಟೌನ್‌ನಲ್ಲಿ ನಡೆಯುತ್ತಿರುವ ಪಾಕಿಸ್ತಾನ ವಿರುದ್ಧದ  2ನೇ ಟೆಸ್ಟ್‌ನಲ್ಲಿ ದಕ್ಷಿಣ ಆಫ್ರಿಕಾ 615 ರನ್‌ ಪೇರಿಸಿದೆ.

ರಿಕಲ್ಟನ್‌ 259 ರನ್‌ ಬಾರಿಸಿದರು (343 ಎಸೆತ, 29 ಬೌಂಡರಿ, 3 ಸಿಕ್ಸರ್‌). ಇದು ದಕ್ಷಿಣ ಆಫ್ರಿಕಾ ಟೆಸ್ಟ್‌ ಇತಿಹಾಸದಲ್ಲಿ ದಾಖಲಾದ 4ನೇ ಸರ್ವಾಧಿಕ ವೈಯಕ್ತಿಕ ಗಳಿಕೆ. ಇಂಗ್ಲೆಂಡ್‌ ಎದುರಿನ 1999ರ ಡರ್ಬನ್‌ ಟೆಸ್ಟ್‌ನಲ್ಲಿ 275 ರನ್‌ ಹೊಡೆದ ಗ್ಯಾರಿ ಕರ್ಸ್ಟನ್‌ ಅಗ್ರಸ್ಥಾನಿಯಾಗಿದ್ದಾರೆ. ಟೆಂಬ ಬವುಮ 106, ವೆರೇಯ್ನ ಸರಿಯಾಗಿ 100 ರನ್‌ ಹೊಡೆದರು.

ಪಾಕಿಸ್ತಾನ ಕುಸಿತಕ್ಕೆ ಸಿಲುಕಿದ್ದು, 24 ರನ್ನಿಗೆ 3 ವಿಕೆಟ್‌ ಕಳೆದುಕೊಂಡು ದಿನದಾಟ ಮುಂದುವರಿಸುತ್ತಿದೆ.