ಕೃಷಿ, ಗ್ರಾಮೀಣ ಕಾರ್ಮಿಕರ ಚಿಲ್ಲರೆ ಹಣದುಬ್ಬರ ಏರಿಕೆ

ನವದೆಹಲಿ: ಕೃಷಿ ಮತ್ತು ಗ್ರಾಮೀಣ ಕಾರ್ಮಿಕರ ಚಿಲ್ಲರೆ ಹಣದುಬ್ಬರವು ಜನವರಿ ತಿಂಗಳಲ್ಲಿ ಕ್ರಮವಾಗಿ ಶೇ.5.49 ಮತ್ತು ಶೇ.5.74ಕ್ಕೇರಿದೆ. ಕೆಲವು ಆಹಾರ ವಸ್ತುಗಳ ದರ ಏರಿಕೆಯಿಂದಾಗಿ ಹಣದುಬ್ಬರವೂ ಹೆಚ್ಚಳವಾಗಿದೆ ಎಂದು ಸರ್ಕಾರದ ಅಧಿಕೃತ ಅಂಕಿಅಂಶ ತಿಳಿಸಿದೆ.

2021ರ ಡಿಸೆಂಬರ್‌ನಲ್ಲಿ ಕೃಷಿ ಕಾರ್ಮಿಕರ ಗ್ರಾಹಕ ದರ ಸೂಚ್ಯಂಕ ಹಣದುಬ್ಬರ ಮತ್ತು ಗ್ರಾಮೀಣ ಕಾರ್ಮಿಕರ ಹಣದುಬ್ಬರ ಕ್ರಮವಾಗಿ ಶೇ.4.78 ಮತ್ತು ಶೇ.5.03ಕ್ಕೇರಿತ್ತು. 2021ರ ಜನವರಿಯಲ್ಲಿ ಇದು ಶೇ.2.17 ಮತ್ತು ಶೇ.2.35ಕ್ಕೇರಿತ್ತು ಎಂದೂ ಕಾರ್ಮಿಕ ಸಚಿವಾಲಯ ಬಿಡುಗಡೆ ಮಾಡಿರುವ ವರದಿ ಹೇಳಿದೆ.

ಪ್ರಸಕ್ತ ವರ್ಷದ ಜನವರಿ ತಿಂಗಳ ಆಹಾರ ಹಣದುಬ್ಬರ (ಕೃಷಿ ಕಾರ್ಮಿಕರ) ಶೇ.4.15, ಗ್ರಾಮೀಣ ಕಾರ್ಮಿಕರ ಆಹಾರ ಹಣದುಬ್ಬರ ಶೇ.4.33 ಆಗಿದೆ. ಹಿಂದಿನ ತಿಂಗಳಲ್ಲಿ ಅದು ಕ್ರಮವಾಗಿ ಶೇ.2.99 ಮತ್ತು ಶೇ.3.17 ಆಗಿತ್ತು. ಕಳೆದ ವರ್ಷದ ಇದೇ ಅವಧಿಯಲ್ಲಿ ಆಹಾರ ಹಣದುಬ್ಬರ ಶೇ.1.02 ಮತ್ತು ಶೇ.1.22ರಲ್ಲಿತ್ತು.