ಹುಬ್ಬಳ್ಳಿ: ಇಲ್ಲದ್ದನ್ನು ಇದ್ದಂತೆಯೇ ಸೃಷ್ಟಿಸಿ ದಾರಿ ತಪ್ಪಿಸುವ ಸಾಮಾಜಿಕ ಜಾಲತಾಣಗಳ ಮಾಹಿತಿಗಳ ಬಗ್ಗೆ ಮಾಧ್ಯಮದವರು ಅಗತ್ಯ ಜಾಗೃತಿ ವಹಿಸುವ ಅನಿವಾರ್ಯತೆ ಇದೆ ಎಂದು ಟಿಎಸ್‌ಆರ್‌ ಪ್ರಶಸ್ತಿ ಪುರಸ್ಕೃತ ಹಿರಿಯ ಪತ್ರಕರ್ತ ನಾಗೇಶ ಹೆಗಡೆ ಹೇಳಿದರು. ಧಾರವಾಡ ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘ ರವಿವಾರ ಆಯೋಜಿಸಿದ್ದ ಪತ್ರಿಕಾ ದಿನಾಚರಣೆ, ಪ್ರಶಸ್ತಿ ವಿತರಣೆ ಹಾಗೂ ಪ್ರತಿಭಾ ಪುರಸ್ಕಾರ ಸಮಾರಂಭದಲ್ಲಿ ಅವರು ಮಾತನಾಡಿದರು.
ಇಂದು ಸಾಮಾಜಿಕ ಜಾಲತಾಣಗಳಾದ ವಾಟ್ಸ್‌ಆ್ಯಪ್‌, ಫೇಸ್‌ಬುಕ್‌ಗಳಲ್ಲಿ ಇಲ್ಲಸಲ್ಲದ ವಿಷಯಗಳನ್ನು ಮಾಹಿತಿ ರೂಪದಲ್ಲಿ ಹಾಕಲಾಗುತ್ತದೆ. ಎಲ್ಲಿಯದೋ ಚಿತ್ರ, ಇನ್ನೆಲ್ಲಿಯದೋ ಮಾಹಿತಿಯನ್ನು ತಮ್ಮಿಷ್ಟದಂತೆ ಜೋಡಿಸಿ ನೀಡಲಾಗುತ್ತಿದೆ. ಇದನ್ನು ನಂಬಿ ಘಟನೆ ನಡೆದಿರಬಹುದು ಎಂದು ಸುದ್ದಿ ನೀಡುವ ಕಾರ್ಯ ಆಗಬಾರದು. ಈ ಬಗ್ಗೆ ಜಾಗೃತಿ ಮೂಡಿಸುವ ಜವಾಬ್ದಾರಿ ಮಾಧ್ಯಮದವರ ಮೇಲಿದೆ ಎಂದರು.
ಮಾಧ್ಯಮವರಿಗೆ ಸಕಾಲಿಕ ಹಾಗೂ ಸರಿಯಾದ ಅವಕಾಶಗಳು ಸಿಕ್ಕರೆ ಅನೇಕ ಸಾಧನೆಗಳನ್ನು ಮಾಡಬಲ್ಲರು. ಇಂತಹ ಸಾಧನೆಗೆ ಸದಾ ಎಚ್ಚರ ಹಾಗೂ ದೃಷ್ಟಿಕೋನ ಅವಶ್ಯ ಎಂದರು. ತಮಗೆ ಟಿಎಸ್‌ಆರ್‌ ಪ್ರಶಸ್ತಿ ಬಂದಾಗ ಅಭಿನಂದಿಸಿ ಪತ್ರ ಬರೆದ ಇಬ್ಬರು ರಾಜಕಾರಣಿಗಳಲ್ಲಿ ಒಬ್ಬರು ಆರ್‌.ವಿ.ದೇಶಪಾಂಡೆ ಹಾಗೂ ಇನ್ನೊಬ್ಬರು ಬಸವರಾಜ ಹೊರಟ್ಟಿ ಅವರಾಗಿದ್ದಾರೆ ಎಂದು ಹೇಳಿದರು.
ಸಮಾಜ ಬದಲಾವಣೆ ಶಕ್ತಿ: ಸಮಾರಂಭ ಉದ್ಘಾಟಿಸಿದ ವಿಧಾನಪರಿಷತ್‌ ಸದಸ್ಯ ಬಸವರಾಜ ಹೊರಟ್ಟಿ ಮಾತನಾಡಿ, ಮಾಧ್ಯಮ ಸಮಾಜ ಬದಲಾಯಿಸುವ ಶಕ್ತಿ ಹೊಂದಿದೆ. ಮಾಧ್ಯಮ ಹಾಗೂ ಪೊಲೀಸ್‌ ಕ್ಲಿಷ್ಟ ಸ್ಥಿತಿಗಳನ್ನು ಎದುರಿಸಬೇಕಾಗುತ್ತದೆ. ಕರ್ನಾಟಕದಲ್ಲಿ ಮಾಧ್ಯಮ ಸದೃಢವಾಗಿದೆ. ಎಲ್ಲೋ ಕೆಲವರು ಮಾಧ್ಯಮಕ್ಕೆ ಕೆಟ್ಟ ಹೆಸರು ತರುವ ಕಾರ್ಯದಲ್ಲಿ ತೊಡಗಿದ್ದಾರೆ ಎಂದರು. ಸಮಾಜದಲ್ಲಿ ವಿವಿಧ ರಂಗಗಳು ದಾರಿ ತಪ್ಪಿದಾಗ ಅದನ್ನು ಎಚ್ಚರಿಸಿ ಸರಿದಾರಿಗೆ ತರುವ ಕಾರ್ಯವನ್ನು ಮಾಧ್ಯಮ ಮಾಡುತ್ತದೆ.
ಪ್ರಶಸ್ತಿಗಳ ಬೆನ್ನಿಗೆ ಬಿದ್ದು ಅಡ್ಡಾಡಿ, ಕಂಡ ಕಂಡ ಶಿಫಾರಸು ಮಾಡಿಸಿ ಪ್ರಶಸ್ತಿ ಪಡೆದರೆ ಅದಕ್ಕೆ ಬೆಲೆ ಇಲ್ಲ. ಸಾಧನೆಗಳನ್ನು ಗುರುತಿಸಿ ಪ್ರಶಸ್ತಿಗಳೇ ಹುಡುಕಿ ಬರುವಂತಾಗಬೇಕು ಎಂದು ಹೇಳಿದರು. ಮೊಹರೆ ಹನುಮಂತರಾಯ ಪ್ರಶಸ್ತಿಗೆ ಆಯ್ಕೆಯಾಗಿರುವ ಗಂಗಾಧರ ಹಿರೇಗುತ್ತಿ ಮಾತನಾಡಿ, ತಮ್ಮ ಪತ್ರಿಕಾ ಬದುಕಿನ ಹಲವು ಸಂಘರ್ಷ, ಏರಿಳಿತ, ಅವಮಾನ, ಸಂಕಷ್ಟಗಳನ್ನು ಎದುರಿಸಿದ ಬಗೆಯನ್ನು ಬಿಚಿrಟ್ಟರು.
ಜೀವಮಾನ ಪ್ರಶಸ್ತಿ ಪ್ರದಾನ: ಇದೇ ಸಂದರ್ಭದಲ್ಲಿ ಹಿರಿಯ ಪತ್ರಕರ್ತ ನಾರಾಯಣ ಘಳಗಿ ಅವರಿಗೆ ಜೀವಮಾನ ಸಾಧನೆ ಪ್ರಶಸ್ತಿ ನೀಡಿ ಗೌರವಿಸಲಾಯಿತು. ಸನ್ಮಾನ ಸ್ವೀಕರಿಸಿ ಅವರು ಮಾತನಾಡಿದರು. ವಿವಿಧ ಸಾಧನೆ ತೋರಿದ ಪತ್ರಕರ್ತರಾದ ಮರಿದೇವ ಹೂಗಾರ, ನವೀನ ಬಿಲ್ಗುಣಿ, ದತ್ತಾತ್ರೇಯ ಪಾಟೀಲ, ಹೇಮಂತ ದೊಡ್ಡಮನಿ, ನಿಂಗಪ್ಪ ಕಡಪಟ್ಟಿ , ಗುರುರಾಜ ಸಬನೀಸ್‌ ಅವರನ್ನು ಸನ್ಮಾನಿಸಲಾಯಿತು.
ಹಿರಿಯ ಪತ್ರಕರ್ತರಾದ ಲಕ್ಷ್ಮೀಕಾಂತ ಬೀಳಗಿ, ಅನಂತ ಸುಂಕದ, ನಾರಾಯಣ ಶಾಸ್ತ್ರೀ, ಪ್ರಭಾಕರ ನಾಯಕ, ಬಸವರಾಜ ಕುಬಸದ, ರಾಜಶೇಖರ ಸುಣಗಾರ ಅವರನ್ನು ಸನ್ಮಾನಿಸಲಾಯಿತು. ಸಂಘದ ಸದಸ್ಯರ ಮಕ್ಕಳಿಗೆ ಪ್ರತಿಭಾ ಪುರಸ್ಕಾರ ನೀಡಿ ಗೌರವಿಸಲಾಯಿತು. ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘದ ಅಧ್ಯಕ್ಷ ಗಣಪತಿ ಗಂಗೊಳ್ಳಿ ಅಧ್ಯಕ್ಷತೆ ವಹಿಸಿ ಮಾತನಾಡಿದರು. ಪತ್ರಕರ್ತರ ಸಂಘ ಸಂಘದ ರಾಜ್ಯ ಕಾರ್ಯದರ್ಶಿ ಲೋಚನೇಶ ಹೂಗಾರ ವೇದಿಕೆಯಲ್ಲಿದ್ದರು. ಗಿರೀಶ ಪಟ್ಟಣಶೆಟ್ಟಿ ಪ್ರಾಸ್ತಾವಿಕ ಮಾತನಾಡಿದರು. ವೀರೇಶ ಹಂಡಿಗಿ ನಿರೂಪಿಸಿದರು.
