ಸಂಸತ್‌ನಲ್ಲೂ ಕಾಸ್ಟಿಂಗ್‌ ಕೌಚ್‌: ರೇಣುಕಾ ಚೌಧರಿಯ ಅಚ್ಚರಿಯ ಹೇಳಿಕೆ

ಹೊಸದಿಲ್ಲಿ: ದೇಶಾದ್ಯಂತ ಸುದ್ದಿಯಾಗುತ್ತಿರುವ ‘ಕಾಸ್ಟಿಂಗ್‌ ಕೌಚ್‌’ (ಲೈಂಗಿಕ ತೃಷೆಗಾಗಿ ಆಮಿಷ ಒಡ್ಡುವುದು) ಚಿತ್ರರಂಗದಲ್ಲಷ್ಟೇ ಅಲ್ಲ, ಎಲ್ಲಾ ಕ್ಷೇತ್ರಗಳಲ್ಲಿಯೂ ಇದೆ. ಸಂಸತ್‌ ಕೂಡ ಇದರಿಂದ ಹೊರತಾಗಿಲ್ಲ ಎಂಬ ಅಚ್ಚರಿಯ ಹೇಳಿಕೆಯನ್ನು ಸಂಸತ್‌ನ ಮಾಜಿ ಸದಸ್ಯೆ, ಕಾಂಗ್ರೆಸ್‌ ನಾಯಕಿ ರೇಣುಕಾ ಚೌಧರಿ ನೀಡಿದ್ದಾರೆ.

ಬಾಲಿವುಡ್‌ ಕೊರಿಯೋಗ್ರಾಫ‌ರ್‌ ಸರೋಜ್‌ ಖಾನ್‌, ಚಲನಚಿತ್ರ ಕ್ಷೇತ್ರದಲ್ಲಿನ ‘ಕಾಸ್ಟಿಂಗ್‌ ಕೌಚ್‌’ ಸಂಸ್ಕೃತಿ ಸಮರ್ಥಿಸಿಕೊಂಡ ಬೆನ್ನಲ್ಲೇ ರೇಣುಕಾರಿಂದ ಈ ಹೇಳಿಕೆ ಹೊರಬಿದ್ದಿದೆ. ‘ಕಾಸ್ಟಿಂಗ್‌ ಕೌಚ್‌ ಕೇವಲ ಚಿತ್ರರಂಗದಲ್ಲಷ್ಟೇ ಅಲ್ಲ. ಎಲ್ಲಾ ಕಡೆ ಇದೆ. ಅಷ್ಟಕ್ಕೂ ಇದು ಯಾರಿಗೂ ಗೊತ್ತಿರದ ಸತ್ಯವೇನಲ್ಲ. ಊಹಿಸಿಕೊಳ್ಳಲಿಕ್ಕೆ ಸಾಧ್ಯವಿಲ್ಲದ ರೀತಿ ಸಂಸತ್‌ನಲ್ಲೂ ಇದು ಬೆಳೆದುಬಂದಿದೆ. ಈ ಬಗ್ಗೆ ಎಲ್ಲರೂ ಎಚ್ಚೆತ್ತುಕೊಳ್ಳಬೇಕಿದೆ. ಇದಕ್ಕೆ ಇದು ಸಕಾಲ” ಎಂದಿದ್ದಾರೆ ರೇಣುಕಾ. 

ಸರೋಜ್‌ ಖಾನ್‌ ಹೇಳಿದ್ದೇನು?: ಕೊರಿಯೋಗ್ರಾಫ‌ರ್‌ ಸರೋಜ್‌ ಖಾನ್‌ ಮಂಗಳವಾರ ಕಾಸ್ಟಿಂಗ್‌ ಕೌಚ್‌ ಅನ್ನು ಸಮರ್ಥಿಸಿಕೊಂಡಿದ್ದಾರೆ. ಇದರಿಂದ ಕಡೇ ಪಕ್ಷ ಜೀವನೋಪಾಯಕ್ಕೆ ಕೆಲಸವಾದರೂ ಲಭ್ಯವಾಗುತ್ತದೆ. ಕಾಸ್ಟಿಂಗ್‌ ಕೌಚ್‌ ಹೆಸರಿನಲ್ಲಿ ನಡೆಯುವ ಲೈಂಗಿಕತೆಯ ಬೇಡಿಕೆಗಳು ಪರೋಕ್ಷ ಸಮ್ಮತಿಯ ನಂತರವೇ ನಡೆವಂಥ‌ದ್ದು. ಬಲವಂತವಾಗಿ ಆಗುವಂಥದ್ದಲ್ಲ. ಕೇವಲ ಚಿತ್ರರಂಗವನ್ನಷ್ಟೇ ಟಾರ್ಗೆಟ್‌ ಮಾಡುವುದೇಕೆ? ಚಿತ್ರರಂಗ ಕನಿಷ್ಠಪಕ್ಷ ಅನ್ನವನ್ನಾದರೂ ನೀಡುತ್ತದೆ, ರೇಪ್‌ ಮಾಡಿ ಬಿಟ್ಟು ಓಡಿಹೋಗುವುದಿಲ್ಲ ಎಂದಿದ್ದಾರೆ.