ʻಪ್ರಾಜೆಕ್ಟ್‌ Kʼಯ ರಿಲೀಸ್‌ ಡೇಟ್‌ ಹೊರಕ್ಕೆ: ಬಿಗ್‌ ಬಿ, ದೀಪಿಕಾ, ಪ್ರಭಾಸ್‌ ಅಭಿನಯದ ಚಿತ್ರ

ಮುಂಬೈ: ಬಾಲಿವುಡ್‌ ತಾರೆಗಳಾದ ಅಮಿತಾಬ್‌ ಬಚ್ಚನ್‌, ದೀಪಿಕಾ ಪಡುಕೋಣೆ, ತೆಲುಗು ಸೂಪರ್‌ಸ್ಟಾರ್‌  ಪ್ರಭಾಸ್‌ ಅಭಿನಯದ ಬಹುನಿರೀಕ್ಷಿತ ಚಿತ್ರ ʻಪ್ರಾಜೆಕ್ಟ್‌ Kʼಯ ರಿಲೀಸ್‌ ದಿನಾಂಕ ಹೊರಬಿದ್ದಿದೆ.

ಶಿವರಾತ್ರಿಯ ಶುಭದಿನದಂದೇ ಚಿತ್ರತಂಡ ʻಪ್ರಾಜೆಕ್ಟ್‌ Kʼಯ ಬಿಡುಗಡೆ ದಿನಾಂಕ ಘೋಷಿಸಿದ್ದು, ಅಭಿಮಾನಿಗಳಲ್ಲಿ ಉತ್ಸಾಹ ಹೆಚ್ಚಿಸಿದೆ. ʻಪ್ರಾಜೆಕ್ಟ್‌ Kʼ ಚಿತ್ರ 2024ರ ಜನವರಿ 12ರಂದು ತೆರೆಗೆ ಅಪ್ಪಳಿಸಲಿದೆ ಎಂದು ಚಿತ್ರತಂಡ ಹೇಳಿದೆ.

ಅಲ್ಲದೇ ಈ ಬಗ್ಗೆ ಇನಸ್ಟಾಗ್ರಾಮ್‌ನಲ್ಲಿ ಸಿನೆಮಾದ ಪೋಸ್ಟರ್‌ ಹಂಚಿಕೊಂಡಿರುವ ದೀಪಿಕಾ ಪಡುಕೋಣೆ “12.1.2024 #Project K.. Happy Mahashivaratri”  ಎಂದು ಬರೆದುಕೊಂಡಿದ್ದಾರೆ.

ಸಿನೆಮಾದ ಪೋಸ್ಟರ್‌ನಲ್ಲಿ ಕೈಯೊಂದು ತನ್ನ ತೋರು ಬೆರಳನ್ನು ತೋರಿಸುತ್ತಿದ್ದು, ಯುದ್ಧ ಭೂಮಿಯಂತಿರುವ ಪ್ರದೇಶದಲ್ಲಿ ಮೂರು ಜನ ಬಂದೂಕು ಹಿಡಿದುಕೊಂಡಿರುವ ದೃಶ್ಯ ಕಂಡುಬಂದಿದೆ.

 

ದೀಪಿಕಾ ಮಾತ್ರವಲ್ಲದೆ ಬಿಗ್‌ ಬಿ, ಪ್ರಭಾಸ್‌ ಕೂಡಾ ಪೋಸ್ಟರ್‌ ಹಂಚಿಕೊಂಡಿದ್ದಾರೆ.

ನಾಗ್‌ ಅಶ್ವಿನ್‌ ಅವರ ನಿರ್ದೇಶನದಲ್ಲಿ ಮೂಡಿಬರುತ್ತಿರುವ ʻಪ್ರಾಜೆಕ್ಟ್‌ Kʼ ಚಿತ್ರ ದ್ವಿಭಾಷಾ ಚಿತ್ರವಾಗಿರಲಿದ್ದು, ಹಿಂದಿ ಮತ್ತು ತೆಲುಗಿನಲ್ಲಿ ಏಕಕಾಲದಲ್ಲಿ ಚಿತ್ರೀಕರಣ ನಡೆಯುತ್ತಿದೆ. ಅಲ್ಲದೇ ಈ ಚಿತ್ರ ದೀಪಿಕಾ ಅಭಿನಯದ ಮೊದಲ ತೆಲುಗು ಚಿತ್ರವಾಗಿರಲಿದೆ ಎಂಬುದು ವಿಶೇಷ.

ಜನವರಿಯಲ್ಲಿ ದೀಪಿಕಾ ಪಡುಕೋಣೆಯ ಹುಟ್ಟುಹಬ್ಬದಂದು ದೀಪಿಕಾಳ ಫಸ್ಟ್‌ಲುಕ್‌ ಪೋಸ್ಟರ್‌ ಹೊರಬಿಟ್ಟಿದ್ದ ಚಿತ್ರತಂಡ ಸಿನಿಪ್ರಿಯರ ಎದೆಬಡಿತ ಹೆಚ್ಚಿಸಿತ್ತು. ಅದರಲ್ಲಿ ಮಹಿಳೆಯೊಬ್ಬಳು ಯುದ್ಧಭೂಮಿಯಲ್ಲಿರುವಂತೆ ಭಾಸವಾಗುತ್ತಿದ್ದು ಮಹಿಳೆಯ ಮುಖ ಕಾಣಿಸುತ್ತಿಲ್ಲ. ಗಿಡ್ಡ ಕೂದಲುಗಳನ್ನು ಹೊಂದಿದ್ದು ಯುದ್ಧದ ಉಡುಗೆಯನ್ನು ತೊಟ್ಟಂತಿದೆ.

ಸದ್ಯಕ್ಕೆ ಸಿನೆಮಾಗೆ ʻಪ್ರಾಜೆಕ್ಟ್‌ Kʼ ಎಂದು ಹೆಸರಿಟ್ಟಿದ್ದು ಟೈಟಲ್‌ ಬದಲಾಗುವ ಸಂಭವವಿದೆ ಎಂದು ಹೇಳಲಾಗುತ್ತಿದೆ. ಬಾಲಿವುಡ್‌ ಬೆಡಗಿ ದಿಶಾ ಪಟಾನಿ ಕೂಡಾ ಚಿತ್ರತಂಡದ ಭಾಗವಾಗಿರಲಿದ್ದಾರೆ ಎಂದು ಚಿತ್ರತಂಡ ಹೇಳಿಕೊಂಡಿದೆ.

ಇದನ್ನೂ ಓದಿ: ವಿಚಾರಣೆ ವೇಳೆ ʻಪೃಥ್ವಿ ಶಾ ಯಾರೆಂದೇ ಗೊತ್ತಿಲ್ಲʼ ಎಂದ ಸ್ವಪ್ನಾ ಗಿಲ್‌