ಲಿಂಗಾಯಿತ ಮಹಾರ್ಯಾಲಿ ಯಶಸ್ಸಿಗೆ ಸಿದ್ಧತೆ

ಕಲಬುರಗಿ: ಲಿಂಗಾಯತ ಸ್ವತಂತ್ರ ಧರ್ಮದ ಮಾನ್ಯತೆಗೆ ಆಗ್ರಹಿಸಿ ಸೆ. 24ರಂದು ನಗರದ ನೂತನ ಮಹಾ ವಿದ್ಯಾಲಯದಲ್ಲಿ ಆಯೋಜಿಸಲಾಗಿರುವ ಲಿಂಗಾಯತ ಮಹಾರ್ಯಾಲಿ ಮಹಾಸಭೆಗೆ ವ್ಯಾಪಕ ಸಿದ್ಧತೆ ಹಾಗೂ ಪ್ರಚಾರದ ಕಾರ್ಯ ಜೋರಾಗಿ ನಡೆಯುತ್ತಿದ್ದು, ಸಾವಿರಾರು ಸಮಾಜದ ಮುಖಂಡರು-ಯುವಕರು ಸಕ್ರಿಯವಾಗಿ ಪಾಲ್ಗೊಂಡಿದ್ದು, ಮಹಾರ್ಯಾಲಿ ಯಶಸ್ವಿಯ ಲಕ್ಷಣಗಳು ಕಂಡು ಬರುತ್ತಿವೆ.

ಕಳೆದ ಸೆ. 10ರಂದು ನಿಗದಿಯಾಗಿದ್ದ ಮಹಾರ್ಯಾಲಿ ಅಗತ್ಯ ಸಿದ್ಧತೆ ಆಗಿಲ್ಲವೆಂದು ಸೆ. 24ಕ್ಕೆ ಮುಂದೂಡಲಾಗಿತ್ತು. ಈ ನಡುವೆ ವೀರಶೈವ-ಲಿಂಗಾಯತ ನಡುವೆ ಭಿನ್ನಮತ ಉಂಟಾಗಿ ಆರೋಪ-ಪ್ರತ್ಯಾರೋಪ ನಡೆದ ಪರಿಣಾಮ ಜತೆಗೆ ವೈದ್ಯಕೀಯ ಶಿಕ್ಷಣ ಸಚಿವ ಡಾ| ಶರಣಪ್ರಕಾಶ ಪಾಟೀಲ ಅವರ ಬೆಂಗಳೂರಿನ ಮನೆಯಲ್ಲಿ ಸಭೆ ನಡೆದು ಸಮನ್ವಯ ಸಮಿತಿ ರಚನೆ ಕುರಿತಾಗಿ ನಿರ್ಣಯ ಕೈಗೊಂಡ ನಂತರ ಮಹಾರ್ಯಾಲಿ ಕಾವು ಸ್ವಲ್ಪ ಕುಸಿತವಾಗಿತ್ತು.

ಕಳೆದ ನಾಲ್ಕು ದಿನಗಳಿಂದ ಲಿಂಗಾಯತ ಧರ್ಮ ಸಮನ್ವಯ ಸಮಿತಿ ಪದಾಧಿಕಾರಿಗಳು, ಸಚಿವರಾದ ಎಂ.ಬಿ.ಪಾಟೀಲ, ಡಾ| ಶರಣಪ್ರಕಾಶ ಪಾಟೀಲ, ಶಾಸಕ ಬಿ.ಆರ್‌. ಪಾಟೀಲ ಸೇರಿದಂತೆ ಇತರರು ಹಗಲಿರಳು ಸಮಾಜ ಸಂಘಟಕರ ನಿರಂತರ ಸಭೆಗಳನ್ನು ನಡೆಸುವುದರ ಮುಖಾಂತರ ಸಮಾವೇಶದ ಯಶಸ್ವಿಗೆ ಹುರಿದುಂಬಿಸಿದ್ದರಿಂದ, ಜತೆಗೆ ನಾಡಿನ ವಿವಿಧ ಮಠಾಧೀಶರು, ಶ್ರೀ ಶೈಲ ಸಾರಂಗಧರೇಶ್ವರ ಮಹಾಸ್ವಾಮಿಗಳು ಸೇರಿದಂತೆ ಇತರರು ಸಮಾವೇಶ ಯಶಸ್ವಿಗೆ ಶ್ರಮಿಸುತ್ತಿದ್ದಾರೆ.