ಆಸೀಸ್‌ ನೆಲದಲ್ಲಿ ನಡೆಯುವ ಟೆಸ್ಟ್‌ ಸರಣಿಯಲ್ಲಿ ಭಾರತದ ವೇಗಿಗಳ ಮೇಲುಗೈ: ರವಿಶಾಸ್ತ್ರಿ

ಸಿಡ್ನಿ: ಮುಂಬರುವ ನಾಲ್ಕು ಪಂದ್ಯಗಳ ಟೆಸ್ಟ್‌ ಸರಣಿಯಲ್ಲಿ ಆತಿಥೇಯ ಆಸ್ಟ್ರೇಲಿಯ ತಂಡವನ್ನು ಸೋಲಿಸುವ ಸಾಮರ್ಥ್ಯ ನಮ್ಮ ತಂಡದ ವೇಗಿಗಳಿಗೆ ಇದೆ ಎಂದು ಭಾರತ ತಂಡದ ಮುಖ್ಯ ಕೋಚ್‌ ರವಿಶಾಸ್ತ್ರಿ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.

ಬಾರ್ಡರ್‌ ಗವಾಸ್ಕರ್‌ ಟೆಸ್ಟ್‌ ಸರಣಿಯನ್ನು ಭಾರತ ತನ್ನ ಬಳಿಯೇ ಉಳಿಸಿಕೊಳ್ಳುವಲ್ಲಿ ಯಶಸ್ವಿಯಾಗುವುದರಲ್ಲಿ ಯಾವುದೇ ಅನುಮಾನವಿಲ್ಲ ಆಸೀಸ್‌ ತಂಡದಲ್ಲಿ ಈ ಬಾರಿ ವಾರ್ನರ್‌, ಸ್ಮಿತ್‌ ಇದ್ದರೂ ನಮ್ಮ ತಂಡದಲ್ಲಿ ಯುವ ವೇಗಿಗಳಿದ್ದಾರೆ ಅವರು ತಂಡದ ಗೆಲುವಿಗೆ ನೆರವಾಗಲಿದ್ದಾರೆಂದು ರವಿಶಾಸ್ತ್ರಿ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.

ಇಶಾಂತ್‌ ಶರ್ಮಾ ಪ್ರಸ್ತುತ ಬೆಂಗಳೂರಿನ ನ್ಯಾಷನಲ್‌ ಕ್ರಿಕೆಟ್‌ ಅಕಾಡೆಮಿಯಲ್ಲಿ ಪುನಶ್ಚೇತನ ಕಾರ್ಯದಲ್ಲಿ ತೊಡಗಿದ್ದಾರೆ. ಅವರು ತಡವಾಗಿ ಟೀಮ್‌ ಇಂಂಡಿಯಾಗೆ ಸೇರ್ಪಡೆಯಾಗುವ ಸಾಧ್ಯತೆ ದಟ್ಟವಾಗಿದೆ ಎಂದರು.

“ಉಮೇಶ್‌ ಯಾದವ್‌ ಅನುಭವಿ ವೇಗಿ. ಸೈನಿ ಯುವ ವೇಗಿ. ಬುಮ್ರಾ ಅತ್ಯುತ್ತಮ ವೇಗದ ಬೌಲರ್‌. ಮೊಹಮ್ಮದ್‌ ಶಮಿ ಆಸೀಸ್‌ ನೆಲದಲ್ಲಿ ಮಾರಕ ದಾಳಿ ನಡೆಸಲು ಕಾಯುತ್ತಿದ್ದಾರೆ. ಮೊಹಮ್ಮದ್‌ ಸಿರಾಜ್‌ ಚೊಚ್ಚಲ ಟೆಸ್ಟ್‌ ಪಂದ್ಯದಲ್ಲಿ ಶ್ರೇಷ್ಠ ಪ್ರದರ್ಶನ ತೋರಲು ಉತ್ಸುಕರಾಗಿದ್ದಾರೆ. ನಮ್ಮ ವೇಗಿಗಳು ಆಸೀಸ್‌ ಆಟಗಾರರ ವಿಕೆಟ್‌ ಬೇಟೆಯಾಡುವುದನ್ನು ನೋಡಲು ಎದುರು ನೋಡುತ್ತಿದ್ದೇನೆ’ ಎಂದು ರವಿಶಾಸ್ತ್ರಿ ಹೇಳಿದ್ದಾರೆ.