ರಣವೀರ್‌ಗೆ ಬಿಗ್‌ ಬಿ ಮೆಚ್ಚುಗೆ ಪತ್ರ 

ವಾಷಿಂಗ್ಟನ್‌: “ಪದ್ಮಾವತ್‌’ ಚಿತ್ರದಲ್ಲಿ ನಟ ರಣವೀರ್‌ ಸಿಂಗ್‌ ಅಭಿನಯ ನೋಡಿ ಮೆಚ್ಚಿರುವ ಹಿಂದಿ ಚಿತ್ರರಂಗದ ಸೂಪರ್‌ ಸ್ಟಾರ್‌ ಅಮಿತಾಭ್‌ ಬಚ್ಚನ್‌, ತಮ್ಮ ಕೈಬರಹದಲ್ಲೇ ಒಂದು ಪ್ರಶಂಸೆಯ ಪತ್ರ ಬರೆದು ಅದನ್ನು ರಣವೀರ್‌ ಅವರಿಗೆ ತಲುಪಿಸಿದ್ದಾರೆ. 

ಇದನ್ನು ಟ್ವಿಟರ್‌ನಲ್ಲಿ ಖುದ್ದು ಹೇಳಿಕೊಂಡಿರುವ ರಣವೀರ್‌, “”ನನಗೆ ನನ್ನ ಪ್ರಶಸ್ತಿ ಸಿಕ್ಕಾಯ್ತು” ಎಂದಿದ್ದಾರಲ್ಲದೆ, ಅಮಿತಾಭ್‌ ಅವರು ತಮಗೆ ಬರೆದಿರುವ ಪತ್ರವನ್ನೂ ಅಪ್‌ಲೋಡ್‌ ಮಾಡಿದ್ದಾರೆ. ರಣವೀರ್‌ ಅವರು ಪದ್ಮಾವತ್‌ನಲ್ಲಿ “ಅಲ್ಲಾವುದ್ದೀನ್‌ ಖೀಲ್ಜಿ’ಯ ಪಾತ್ರ ನಿರ್ವಹಿಸಿದ್ದಾರೆ. 

ಅಮೆರಿಕದಲ್ಲಿ ದಾಖಲೆ:  ಬಿಡುಗಡೆಯಾದ ನಾಲ್ಕೇ ದಿನಗಳಲ್ಲಿ “ಪದ್ಮಾವತ್‌’ ಚಿತ್ರವು ಉತ್ತರ ಅಮೆರಿಕದಲ್ಲಿ 27 ಕೋಟಿ ರೂ. ಗಳಿಕೆ ಮಾಡಿ, ಹೊಸ ದಾಖಲೆ ನಿರ್ಮಿಸಿದೆ. ಈ ಹಿಂದೆ, ಆಮಿರ್‌ ಖಾನ್‌ ಅಭಿನಯದ “ಪಿಕೆ’ ಚಿತ್ರ, ಬಿಡುಗಡೆಯಾದ ಮೂರೇ ದಿನಗಳಲ್ಲಿ 22 ಕೋಟಿ ರೂ. ಬಾಚಿಕೊಂಡು ದಾಖಲೆ ನಿರ್ಮಿಸಿತ್ತು. ಇದೀಗ, ಆ ದಾಖಲೆಯನ್ನು “ಪದ್ಮಾವತಿ’ ಮುರಿದಿದೆ. ಅಮೆರಿಕದಲ್ಲಿ ಒಟ್ಟು 326 ಚಿತ್ರಮಂದಿರಗಳಲ್ಲಿ ಚಿತ್ರವು ಬಿಡುಗಡೆಯಾಗಿ ಯಶಸ್ವಿ ಪ್ರದರ್ಶನ ಕಾಣುತ್ತಿದೆ.

ಇನ್ನೊಂದೆಡೆ, ಪದ್ಮಾವತ್‌ ಚಿತ್ರ ವೀಕ್ಷಿಸಿರುವ ಕರ್ಣಿ ಸೇನಾದ ಇಬ್ಬರು ಇತಿಹಾಸಕಾರರು, ಚಿತ್ರದಲ್ಲಿ ಯಾವುದೇ ವಿವಾದಾತ್ಮಕ ಅಂಶವಿಲ್ಲ ಎಂದು ಹೇಳಿದ್ದಾರೆ. ಇವರು ಬೆಂಗಳೂರಿನಲ್ಲಿ ಚಿತ್ರ ವೀಕ್ಷಿಸಿದರು.