ಹಳಿ ತಪ್ಪಿದ ರಾಂಚಿ-ರಾಜಧಾನಿ ಎಕ್ಸ್‌ಪ್ರೆಸ್‌: ಒಂದೇ ದಿನ 2 ಅವಘಡ

ಹೊಸದಿಲ್ಲಿ : ರಾಂಚಿ-ನ್ಯೂ ಡೆಲ್ಲಿ ರಾಜಧಾನಿ ಎಕ್ಸ್‌ಪ್ರೆಸ್‌ ರೈಲು ದಿಲ್ಲಿಯ ಶಿವಾಜಿ ಸೇತುವೆಯ ಬಳಿ ಹಳಿ ತಪ್ಪುವುದರೊಂದಿಗೆ ಇಂದು ಗುರುವಾರ ಒಂದೇ ದಿನ ಎರಡು ರೈಲುಗಳು ಹಳಿತಪ್ಪಿದ ದುರಂತ ಸಂಭವಿಸಿದಂತಾಗಿದೆ. 

ಎಎನ್‌ಐ ಸುದ್ದಿ ಸಂಸ್ಥೆಯ ಪ್ರಕಾರ ರಾಂಚಿ ರಾಜಧಾನಿ ಎಕ್ಸ್‌ಪ್ರೆಸ್‌ ರೈಲಿನ ಇಂಜಿನ್‌ ಮತ್ತು ಪವರ್‌ ಕಾರ್‌ ಹಳಿ ತಪ್ಪಿದೆ. ಈ ದುರ್ಘ‌ಟನೆ ಬೆಳಗ್ಗೆ 11.45ರ ಹೊತ್ತಿಗೆ ಸಂಭವಿಸಿದ್ದು ಯಾವುದೇ ಜೀವಹಾನಿಯಾದ ವರದಿಗಳಿಲ್ಲ. 

ಇಂದು ಬೆಳಗ್ಗೆ ಉತ್ತರ ಪ್ರದೇಶದಲ್ಲಿ ಇನ್ನೊಂದು ರೈಲು ಹಳಿ ತಪ್ಪಿದ ದುರಂತ ಸಂಭವಿಸಿತ್ತು. ಅದರಲ್ಲೂ ಯಾವುದೇ ಜೀವಹಾನಿ ಆಗಿರಲಿಲ್ಲ. 

ಪೂರ್ವ ಉತ್ತರ ಪ್ರದೇಶದ ಸೋನಭದ್ರಾ ಜಿಲ್ಲೆಯ ಓಬ್ರಾ ಎಂಬಲ್ಲಿಗೆ ಸಮೀಪ ಹೌರಾ-ಜಬಲ್ಪುರ ಶಕ್ತಿಕುಂಜ್‌ ಎಕ್ಸ್‌ಪ್ರೆಸ್‌ ರೈಲಿನ ಏಳು ಕೋಚ್‌ಗಳು ಹಳಿ ತಪ್ಪಿದ್ದವು. ಈ ಘಟನೆ ಬೆಳಗ್ಗೆ 6.25ರ ಹೊತ್ತಿಗೆ ಸಂಭವಿಸಿತ್ತು. 

ಪರಿಣಾಮವಾಗಿ ರೈಲಿನ ಎಲ್ಲ ಪ್ರಯಾಣಿಕರನ್ನು ಉಳಿದ ಕೋಚ್‌ಗಳಲ್ಲಿ ವ್ಯವಸ್ಥೆಗೊಳಿಸಲಾಗಿ 7.28ರ ಹೊತ್ತಿಗೆ ರೈಲು ತನ್ನ ಮುಂದಿನ ಪ್ರಯಾಣವನ್ನು ಆರಂಭಿಸಿತು ಎಂದು ರೈಲ್ವೇ ಸಚಿವಾಲಯದ ವಕ್ತಾರ ಅನಿಲ್‌ ಸಕ್ಸೇನಾ ಹೇಳಿದ್ದಾರೆ.