Kannada Cinema: ಟ್ರೇಲರ್ ನಲ್ಲಿ ಮಿಂಚಿದ ‘ರಾಜ ರಾಣಿ’

‘ರಾಜ ರಾಣಿ’ ಸಿನಿಮಾದ ಟ್ರೇಲರ್‌ ಇತ್ತೀಚೆಗೆ ಬಿಡುಗಡೆಯಾಯಿತು. ವಿಜಯ್‌ ಬಳ್ಳಾರಿ ಹಾಗೂ ನೇತ್ರಾವತಿ ಮಲ್ಲೇಶ್‌ ಜಂಟಿಯಾಗಿ ಈ ಚಿತ್ರಕ್ಕೆ ಬಂಡವಾಳ ಹೂಡಿದ್ದಾರೆ. ಇವರೊಂದಿಗೆ ಮಧುಸೂಧನ್‌, ಲೀಲಾ ನಿರ್ಮಾಣದಲ್ಲಿ ಕೈ ಜೋಡಿಸಿದ್ದಾರೆ. ಬಳ್ಳಾರಿ ಮೂಲದ ರಣಧೀರ್‌ ನಾಯಕರಾಗಿ ನಟಿಸುವ ಜೊತೆಗೆ ನಿರ್ದೇಶನದ ಜವಾಬ್ದಾರಿಯನ್ನು ಹೊತ್ತುಕೊಂಡಿದ್ದಾರೆ.

ನಿರ್ದೇಶಕ ಕಂ ನಾಯಕ ರಣಧೀರ್‌ ಮಾತನಾಡಿ,”ಪುದಿಯವರುಗಳ್‌’ ತಮಿಳು ಚಿತ್ರಕ್ಕೆ ನಾಯಕನಾಗಿ ಅವಕಾಶ ಒದಗಿಬಂತು. ನಂತರ ಕನ್ನಡದಲ್ಲಿ ಮೂರು ಚಿತ್ರಗಳಲ್ಲಿ ನಟಿಸಿದೆ. ಈ ಅನುಭವದಿಂದಲೇ ಸಿನಿಮಾಕ್ಕೆ ಕಥೆ, ಚಿತ್ರಕಥೆ ಬರೆದು ನಿರ್ದೇಶಿಸಿ, ನಾಯಕನಾಗಿಯೂ ನಟಿಸಿದ್ದಾರೆ. ಲೂಸ್‌ ಮಾದ ಯೋಗಿ ಅವರು ಆಂಜನೇಯನ ಹಾಡಿನಲ್ಲಿ ಕಾಣಿಸಿಕೊಂಡಿದ್ದಾರೆ. ಅನಾಥನಾಗಿದ್ದ ನನಗೆ ಅಜ್ಜಿ ಯಾವಾಗಲೂ ನಿನಗೆ ರಾಣಿ ಸಿಕ್ತಾಳೆ. ಅವಳ ಮೂಲಕ ಎಲ್ಲವು ಸಿಗುತ್ತದೆಂದು ಹೇಳಿರುತ್ತಾಳೆ. ಅದರಂತೆ ಚಿತ್ರ ಆಕೆಯ ಸುತ್ತ ಸಾಗುತ್ತದೆ’ ಎಂದರು.

ಮಂಡ್ಯ ಮೂಲದ ರಿತನ್ಯಾ ಶೆಟ್ಟಿ ನಾಯಕಿ. ಜೀವನ್‌ ಚಿತ್ರದ ಮತ್ತೂಬ್ಬ ನಾಯಕ. ಉಳಿದಂತೆ ಗಿರಿಜಾ ಲೋಕೇಶ್‌, ಶೋಭರಾಜ್, ಬಿರಾದಾರ್‌, ಕಿಲ್ಲರ್‌ ವೆಂಕಟೇಶ, ಚಂದ್ರಪ್ರಭ ಮುಂತಾದವರು ನಟಿಸಿದ್ದಾರೆ. ಸುಧನ್‌ ಪ್ರಕಾಶ್‌ ಚಿತ್ರಕ್ಕೆ ಸಂಗೀತ ನೀಡಿದ್ದಾರೆ. ಬೆಂಗಳೂರು, ಮಂಗಳೂರು, ಮಾಲೂರು, ಕೋಲಾರ, ಚಿಕ್ಕಮಗಳೂರು, ದೊಡ್ಡಬಳ್ಳಾಪುರ ಕಡೆಗಳಲ್ಲಿ 75 ದಿನಗಳ ಕಾಲ ಶೂಟಿಂಗ್‌ ನಡೆಸಲಾಗಿದೆ.