ಮಳೆಯೋ, ಭೂಕಂಪವೋ?

ಬಜಪೆ: ವಿಮಾನ ನಿಲ್ದಾಣದ ಪರಿಸರದಲ್ಲಿ ಶುಕ್ರವಾರ ರಾತ್ರಿ ಸುರಿದ ಜಡಿಮಳೆಗೆ ಬಜಪೆಯಿಂದ ಹಳೆ ವಿಮಾನ ನಿಲ್ದಾಣವಾಗಿ ಉಣಿಲೆ- ಕೊಳಂಬೆ ಅದ್ಯಪಾಡಿ ಜಿಲ್ಲಾ ಪಂಚಾಯತ್‌ ರಸ್ತೆಯ ಡಾಮರು ಸಂಪೂರ್ಣ ಎದ್ದು ಹೋಗಿದ್ದು, ಭೂಕಂಪವಾದ ಪ್ರದೇಶದಂತಾಗಿದೆ. ಶುಕ್ರವಾರ ಸಂಜೆಯವರೆಗೂ ಉತ್ತಮ ಸ್ಥಿತಿಯಲ್ಲಿದ್ದ ರಸ್ತೆ ರಾತ್ರಿ ಬೆಳಗಾಗುವುದರೊಳಗೆ ಈ ಸ್ಥಿತಿಗೆ ತಲುಪಿದ್ದನ್ನು ಕಂಡ ಗ್ರಾಮಸ್ಥರು ಹೌಹಾರಿದ್ದಾರೆ. ವಿಶೇಷ ಎಂದರೆ 15 ದಿನಗಳ ಹಿಂದೆಯಷ್ಟೆ ಗ್ರಾಮ  ಪಂಚಾಯತ್‌ ಈ ರಸ್ತೆಯನ್ನು ದುರಸ್ತಿ ಮಾಡಿತ್ತು. 

ಈ ಪ್ರದೇಶದಲ್ಲಿ ರಾತ್ರಿಪೂರ್ತಿ ಉತ್ತಮ ಮಳೆಯಾಗಿ, ಗುಡ್ಡ ಕುಸಿದು ನೀರು ರಸ್ತೆ ಮೇಲೆ ಹರಿಯಿತು. ಮಣ್ಣು ಸಡಿಲವಾಗಿದ್ದರಿಂದ ನೀರು ಹರಿಯುತ್ತಲೇ ಡಾಮರು ಪದರ, ಪದರವಾಗಿ ಎದ್ದಿದೆ. ಯಾವುದೇ ಕ್ಷಣ ರಸ್ತೆ ಕುಸಿಯುವ ಅಪಾಯವೂ ಇದೆ.

ರಸ್ತೆ ಬದಿಯಲ್ಲಿದ್ದ ಪಂಚಾಯತ್‌ನ ನೀರಿನ ಪೈಪ್‌ಗ್ೂ ಹಾನಿಯಾಗಿದೆ. ಈ ಪರಿಸರದ ಹಲವು ಮನೆಗಳಿಗೆ ನೀರು ನುಗ್ಗಿದೆ. ರಸ್ತೆ ಸಂಪರ್ಕ ಕಡಿತಗೊಂಡಿರುವುದರಿಂದ ಅದ್ಯಪಾಡಿ, ಕೊಳಂಬೆ ಗ್ರಾಮಸ್ಥರು ಬಜಪೆ ಕೆಂಜಾರು ಮೂಲಕ ಸಂಚರಿಸುವುದು ಅನಿ ವಾರ್ಯವಾಗಿದೆ.