ರೈಲು ಪ್ರಯಾಣಿಕರಿಗೆ ಸಿಹಿ ಸುದ್ದಿ: ಪ್ರಯಾಣಿಕ ರೈಲುಗಳ ಕನಿಷ್ಠ ಟಿಕೆಟ್‌ ದರ 10ರೂ.ಗೆ ಇಳಿಕೆ

ಹೊಸದಿಲ್ಲಿ: ರೈಲು ಪ್ರಯಾಣಿಕರಿಗೆ ಭಾರತೀಯ ರೈಲ್ವೇ ಸಿಹಿಸುದ್ದಿ ನೀಡಿದ್ದು, ಪ್ರಯಾಣಿಕ ರೈಲುಗಳ ಕನಿಷ್ಠ ಟಿಕೆಟ್‌ ದರವನ್ನು 10 ರೂ.ಗಳಿಗೆ ತಗ್ಗಿಸಿದೆ. ಫೆ. 27ರಿಂದಲೇ ಈ ದರಗಳು ಅನ್ವಯವಾಗಲಿವೆ.

ಕೊರೊನಾ ಸಂದರ್ಭದಲ್ಲಿ ರೈಲ್ವೇ ಇಲಾಖೆಯು ಪ್ರಯಾಣಿಕ ರೈಲುಗಳ ಹೆಸರನ್ನು “ಎಕ್ಸ್‌ಪ್ರಸ್‌ ಸ್ಪೆಷಲ್ಸ್‌’ ಅಥವಾ “ಮೆಮು/ಡೆಮು ಎಕ್ಸ್‌ಪ್ರೆಸ್‌’ ಎಂದು ಬದಲಾಯಿಸಿ ದರ ಹೆಚ್ಚಳ ಮಾಡಿತ್ತು.

ಆ ಸಮಯದಲ್ಲಿ ಪ್ರಯಾಣಿಕ ರೈಲುಗಳಲ್ಲಿ 10 ರೂ. ಇದ್ದ ಕನಿಷ್ಠ ಟಿಕೆಟ್‌ ದರವನ್ನು 30 ರೂ.ಗೆ ಹೆಚ್ಚಿಸಲಾಗಿತ್ತು. ಈ ಮೂಲಕ ಒಂದೇ ಬಾರಿ 20 ರೂ. ಏರಿಕೆ ಮಾಡಲಾಗಿತ್ತು. ಆದರೆ ಈಗ ಈ ರೈಲುಗಳ ಸೆಕೆಂಡ್‌ ಕ್ಲಾಸ್‌ನ ಸಾಮಾನ್ಯ ಟಿಕೆಟ್‌ ದರವನ್ನು ಮತ್ತೆ ಈ ಹಿಂದಿನ 10 ರೂ.ಗೆ ಇಳಿಸಲಾಗಿದೆ. ಜತೆಗೆ ಟಿಕೆಟ್‌ ದರಗಳನ್ನು ಶೇ. 40ರಿಂದ ಶೇ. 50ರಷ್ಟು ಕಡಿತಗೊಳಿಸಿದೆ. ಇದರಿಂದ ಪ್ರಯಾಣಿಕ ರೈಲುಗಳಲ್ಲಿ ಓಡಾಡುವ ಸಾಮಾನ್ಯ ಜನರಿಗೆ ಉಪಯೋಗವಾಗಲಿದೆ.