ರಾಹುಲ್‌ ಒಬ್ಬ ಬಚ್ಚಾ, ಅವರಿಂದ ಮೋದಿ ಪಾಠ ಕಲಿಯಬೇಕಿಲ್ಲ

ಬೀದರ: ಕಾಂಗ್ರೆಸ್‌ ಉಪಾಧ್ಯಕ್ಷ ರಾಹುಲ್‌ ಗಾಂಧಿ ಒಬ್ಬ ಬಚ್ಚಾ. ವಿಶ್ವವೇ ಭಾರತದ ಕಡೆಗೆ ನೋಡುತ್ತಿರುವಾಗ ರಾಹುಲ್‌ ಗಾಂಧಿ  ಅವರಿಂದ ನರೇಂದ್ರ ಮೋದಿ ಪಾಠ ಕಲಿಯಬೇಕಿಲ್ಲ ಎಂದು ಬಿಜೆಪಿ ರಾಜ್ಯ ಪ್ರಧಾನ ಕಾರ್ಯದರ್ಶಿ, ಸಂಸದೆ ಶೋಭಾ ಕರಂದ್ಲಾಜೆ ವ್ಯಂಗ್ಯವಾಡಿದ್ದಾರೆ.

ನಗರದ ದಲಿತರ ಮನೆಯಲ್ಲಿ ಚಹಾ ಸೇವನೆ ಬಳಿಕ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, “ಭಾರತಕ್ಕೊಬ್ಬ ದುರ್ಬಲ ಪ್ರಧಾನಿ ಸಿಕ್ಕಿದ್ದಾರೆ’ ಎಂಬ ರಾಹುಲ್‌ ಟ್ವೀಟ್‌ಗೆ ಪ್ರತಿಕ್ರಿಯಿಸಿ, ಪ್ರಧಾನಿ ಮೋದಿ ಬಗ್ಗೆ ರಾಹುಲ್‌ ಗಾಂ ಧಿಗೆ ನಾನು ಉತ್ತರ ಹೇಳುವುದಿಲ್ಲ. ಪ್ರಪಂಚ ಉತ್ತರ ಹೇಳುತ್ತದೆ ಎಂದು ತಿರುಗೇಟು ನೀಡಿದರು.

ಟ್ರಂಪ್‌ ಅಮೆರಿಕಾದಲ್ಲಿ ಹೇಗೆ ನಡೆದು ಕೊಂಡರು, ಇಸ್ರೇಲ್‌ ಪ್ರವಾಸ ಹೇಗಾಯಿತು ಎಂಬುದು ಎಲ್ಲರಿಗೂ ಗೊತ್ತಿದೆ. ದೇಶದ ಅಭಿವೃದ್ಧಿ ಬಗ್ಗೆ ವಿಶ್ವವೇ ಭಾರತದತ್ತ ನೋಡುತ್ತಿದೆ. ಹೀಗಾಗಿ ರಾಹುಲ್‌ ಗಾಂಧಿ  ಅವರಿಂದ ಕಲಿಯಲು ಏನೂ ಇಲ್ಲ. ರಾಹುಲ್‌ ಮೊದಲು ಅವರ ಪಕ್ಷದಲ್ಲಿರುವ ಹುಳುಕು ಸರಿ ಮಾಡಿಕೊಳ್ಳಲಿ. ಸಿಎಂ ಸಿದ್ದರಾಮಯ್ಯ ಜತೆ ಮಾತನಾಡಿ ರೈತರ ಸಮಸ್ಯೆ ಬಗೆಹರಿಸಲು ಸೂಚಿಸಲಿ ಎಂದು ಹೇಳಿದರು.