ರಾಹುಲ್‌ಗಾಂಧಿ ಸ್ವದೇಶಕ್ಕೆ, ಬಂದ ಕೂಡಲೇ ನಿರಂತರ ಸಭೆ

ನವದೆಹಲಿ: ತಮ್ಮ ಹೊಸ ವರ್ಷದ ವಿದೇಶಯಾತ್ರೆ ಮುಗಿಸಿ ಕಾಂಗ್ರೆಸ್‌ ಉಪಾಧ್ಯಕ್ಷ ರಾಹುಲ್‌ ಗಾಂಧಿ ಸ್ವದೇಶಕ್ಕೆ ವಾಪಸಾಗಿದ್ದಾರೆ. ಮರಳಿ ಬಂದ ತಕ್ಷಣವೇ ಅವರು ಪಕ್ಷದ ನಾಯಕರ ಜತೆ ಸರಣಿ ಸಭೆಗಳನ್ನು ಆರಂಭಿಸಿದ್ದಾರೆ.

ಪಂಜಾಬ್‌ ಚುನಾವಣೆ ಟಿಕೆಟ್‌ ಹಂಚಿಕೆಗೆ ಸಂಬಂಧಿಸಿದಂತೆ ಅವರು ಮಂಗಳವಾರ ಅಮರೀಂದರ್‌ ಸಿಂಗ್‌ ಸೇರಿದಂತೆ ಪಕ್ಷದ ಮುಖಂಡರ ಜತೆ ಗಹನ ಸಮಾಲೋಚನೆ ನಡೆಸಿ ದರು. ಪಂಜಾಬ್‌ನಲ್ಲಿ ಕಾಂಗ್ರೆಸ್‌ ಅಧಿಕಾರಕ್ಕೆ ಬರುವ ಆಶಾಭಾವನೆ ತೀವ್ರವಾಗಿದೆ. ಬಿಜೆಪಿಯ ಮಾಜಿ ಮುಖಂಡ, ಕ್ರಿಕೆಟಿಗ ನವಜೋತ್‌ ಸಿಧು ಕಾಂಗ್ರೆಸ್‌ಗೆ 1-2 ದಿನಗಳಲ್ಲಿ ಸೇರುವ ನಿರೀಕ್ಷೆಯಿದ್ದು, ಈ ಬಗ್ಗೆಯೂ ಸಭೆ ಚರ್ಚಿಸಿತು.

ಇದಕ್ಕೂ ಮುನ್ನ ಕಾಂಗ್ರೆಸ್‌ ಅಧ್ಯಕ್ಷೆ ಸೋನಿಯಾ ಗಾಂಧಿ ಮತ್ತು ಅವರ ಪುತ್ರಿ ಪ್ರಿಯಾಂಕಾ ಗಾಂಧಿ ಅವರು ರಾಹುಲ್‌ರನ್ನು ಭೇಟಿ ಮಾಡಿದರು.

ಈ ನಡುವೆ ತಮ್ಮ ವಿದೇಶ ಭೇಟಿಗೆ ಸ್ವತಃ ಕಾಂಗ್ರೆಸ್‌ ವಲಯದಿಂದಲೇ ಅಸಮಾಧಾನ ವ್ಯಕ್ತವಾಗಿರುವ ಹಿನ್ನೆಲೆಯಲ್ಲಿ ಜ.15ರಿಂದ ಕೈಗೊಳ್ಳಬೇಕಿದ್ದ ಚೀನಾ ಪ್ರವಾಸವನ್ನು ರಾಹುಲ್‌ ರದ್ದುಪಡಿಸುವ ಸಾಧ್ಯತೆ ಇದೆ ಎನ್ನಲಾಗಿದೆ.