ಗೋಧ್ರಾ ರೈಲು ಹತ್ಯಾಕಾಂಡ: 19 ವರ್ಷಗಳ ನಂತರ ಪ್ರಮುಖ ಆರೋಪಿ ಬಂಧನ

ಅಹಮದಾಬಾದ್‌: 2002ರ ಫೆ.27ರಂದು ನಡೆದಿದ್ದ ಗೋಧ್ರಾ ರೈಲು ಹತ್ಯಾಕಾಂಡ ಪ್ರಕರಣದ ಪ್ರಮುಖ ಆರೋಪಿ ರಫೀಕ್‌ ಹುಸೇನ್‌ ಭಾತುಕ್‌ 19 ವರ್ಷಗಳ ನಂತರ ಪೊಲೀಸರಿಗೆ ಸೆರೆಸಿಕ್ಕಿದ್ದಾನೆ.

ಗೋಧ್ರಾದ ರೈಲ್ವೆ ನಿಲ್ದಾಣದಲ್ಲಿ ನೌಕರಿ ಮಾಡುತ್ತಿದ್ದ ರಫೀಕ್‌, ಬೋಗಿಗಳ ಮೇಲೆ ಕಲ್ಲೆಸೆದು, ಪೆಟ್ರೋಲ್‌ ಸುರಿದಿದ್ದ. ಗಲಭೆಗೂ ಪ್ರಚೋದನೆ ನೀಡಿದ್ದ ಆತ, ರೈಲು ಬೋಗಿಗಳಿಗೆ ಬೆಂಕಿ ಹಚ್ಚಲು ತನ್ನ ಜತೆಗಿರುವವರಿಗೆ ಪೆಟ್ರೋಲ್‌ ಪೂರೈಕೆ ಮಾಡಿದ್ದ. ಈ ಕ್ರೂರ ಘಟನೆಯಲ್ಲಿ 59 ಕರಸೇವಕರ ಸಜೀವದಹನವಾಗಿತ್ತು. ಘಟನೆಯ ನಂತರ ತನಿಖೆಯಲ್ಲಿ ತನ್ನ ಹೆಸರು ಬರುತ್ತಿದ್ದಂತೆಯೇ ರಫೀಕ್‌ ದೆಹಲಿಗೆ ಪರಾರಿಯಾಗಿದ್ದ ಎನ್ನಲಾಗಿತ್ತು.

ರಫೀಕ್‌ ಭಾತುಕ್‌ ಗುಜರಾತ್‌ನ ಸಿಗ್ನಲ್‌ ಫಾಲಿಯಾ ಪ್ರದೇಶದಲ್ಲಿದ್ದಾನೆ ಎಂಬ ರಹಸ್ಯ ಸಂದೇಶ ತಲುಪಿದ್ದೇ, ಆತ ಅಡುಗಿದ್ದ ಮನೆಯ ಮೇಲೆ ಪೊಲೀಸರು ದಾಳಿ ಮಾಡಿ ಬಂಧಿಸಿದ್ದಾರೆ.

ಇದನ್ನೂ ಓದಿ:ರಾಮ ಜನ್ಮಭೂಮಿಯ ನಿಧಿ ಸಂಗ್ರಹ ವಿಚಾರ :HDK ಅವರದ್ದು ಆಧಾರ ರಹಿತ ಆರೋಪ :ಪೇಜಾವರ ಶ್ರೀ