ಅಶ್ವಿ‌ನ್‌ ಐಸಿಸಿ ತಿಂಗಳ ಕ್ರಿಕೆಟಿಗ : ಭಾರತಕ್ಕೆ ಒಲಿಯಿತು ಸತತ ಎರಡು ಪ್ರಶಸ್ತಿ

ದುಬಾೖ: ಅಂತಾರಾಷ್ಟ್ರೀಯ ಕ್ರಿಕೆಟ್‌ ಮಂಡಳಿ (ಐಸಿಸಿ) ಫೆಬ್ರವರಿ ತಿಂಗಳ ಆಟಗಾರ ಪ್ರಶಸ್ತಿಯನ್ನು ಘೋಷಿಸಿದೆ. ಈ ಬಾರಿಯೂ ಈ ಪ್ರಶಸ್ತಿ ಭಾರತೀಯ ಕ್ರಿಕೆಟಿಗನಿಗೆ ಒಲಿದಿರುವುದು ವಿಶೇಷವಾಗಿದೆ. ಇದು ಟೀಮ್‌ ಇಂಡಿಯಾದ ಅನುಭವಿ ಸ್ಪಿನ್ನರ್‌ ಆರ್‌. ಅಶ್ವಿ‌ನ್‌ ಪಾಲಾಗಿದೆ. ಜನವರಿ ತಿಂಗಳ ಪ್ರಶಸ್ತಿಗೆ ರಿಷಭ್‌ ಪಂತ್‌ ಆಯ್ಕೆಯಾಗಿದ್ದರು.

ತಿಂಗಳ ಪ್ರಶಸ್ತಿಗಾಗಿ ಅಶ್ವಿ‌ನ್‌ ಜತೆಗೆ ಇಂಗ್ಲೆಂಡ್‌ ಕ್ರಿಕೆಟ್‌ ತಂಡದ ನಾಯಕ ಜೋ ರೂಟ್‌, ವೆಸ್ಟ್‌ ಇಂಡೀಸ್‌ನ ಯುವ ಆಟಗಾರ ಕೈಲ್‌ ಮೇಯರ್ ಕೂಡ ನಾಮ ನಿರ್ದೇಶನಗೊಂಡಿದ್ದರು.

ಇಂಗ್ಲೆಂಡ್‌ ವಿರುದ್ಧದ ಟೆಸ್ಟ್‌ ಮುಖಾಮುಖೀಯಲ್ಲಿ ಅಶ್ವಿ‌ನ್‌ ಸರಣಿಶ್ರೇಷ್ಠ ಗೌರವಕ್ಕೆ ಪಾತ್ರರಾಗಿದ್ದರು. ನಾಲ್ಕರಲ್ಲಿ 3 ಪಂದ್ಯಗಳು ಫೆಬ್ರವರಿಯಲ್ಲಿ ನಡೆದಿದ್ದವು. 400 ಟೆಸ್ಟ್‌ ವಿಕೆಟ್‌ಗಳನ್ನೂ ಅಶ್ವಿ‌ನ್‌ ಪೂರ್ತಿಗೊಳಿಸಿದ್ದರು. ಸರಣಿಯಲ್ಲಿ 24 ವಿಕೆಟ್‌ ಕಿತ್ತ ಸಾಧನೆ ಅಶ್ವಿ‌ನ್‌ ಅವರದಾಗಿತ್ತು.

ವನಿತಾ ವಿಭಾಗದ ತಿಂಗಳ ಪ್ರಶಸ್ತಿ ಇಂಗ್ಲೆಂಡಿನ ಟಾಮಿ ಬ್ಯೂಮಂಟ್‌ ಪಾಲಾಯಿತು. ನ್ಯೂಜಿಲ್ಯಾಂಡ್‌ ಎದುರಿನ ಸರಣಿಯಲ್ಲಿ ಇವರ ಸಾಧನೆ ಅಮೋಘ ಮಟ್ಟದಲ್ಲಿತ್ತು.