ಮಗಳಿಗೆ ಆಕರ್ಷಕ ಹೆಸರಿಟ್ಟ ಪ್ರಿಯಾಂಕಾ ಚೋಪ್ರಾ-ನಿಕ್ ದಂಪತಿ

ನ್ಯೂಯಾರ್ಕ್: ಖ್ಯಾತ ನಟಿ ಪ್ರಿಯಾಂಕಾ ಚೋಪ್ರಾ, ಪಾಪ್ ಸ್ಟಾರ್ ಪತಿ ನಿಕ್ ಜೋನಾಸ್ ದಂಪತಿ ತಮ್ಮ ಮಗಳಿಗೆ ಮಾಲತಿ ಮೇರಿ ಚೋಪ್ರಾ ಜೋನಾಸ್ ಎಂದು ಹೆಸರಿಟ್ಟಿದ್ದಾರೆ ಎಂದು ವರದಿಯಾಗಿದೆ.

ಈ ವರ್ಷದ ಜನವರಿಯಲ್ಲಿ, ಬಾಡಿಗೆ ತಾಯ್ತನದ ಮೂಲಕ ತಮ್ಮ ಮೊದಲ ಮಗುವಿಗೆ ಪೋಷಕರಾಗಿದ್ದೇವೆ ಎಂದು ದಂಪತಿಗಳು ಸಾಮಾಜಿಕ ಮಾಧ್ಯಮದ ಮೂಲಕ ಘೋಷಿಸಿದ್ದರು. ಮಗುವಿನ ಜನನ ಪ್ರಮಾಣಪತ್ರವನ್ನು ಪಡೆದಿರುವ ಅಮೆರಿಕನ್ ಮನರಂಜನಾ ವೆಬ್‌ಸೈಟ್ TMZ, ದಂಪತಿ ಮಗಳಿಗೆ ‘ಮಾಲತಿ ಮೇರಿ ಚೋಪ್ರಾ ಜೋನಾಸ್’ ಎಂದು ಹೆಸರಿಟ್ಟಿದ್ದಾರೆ ಎಂದು ಹೇಳಿದೆ. ಮಗು ಜನವರಿ 15 ರಂದು ಸ್ಯಾನ್ ಡಿಯಾಗೋದ ಆಸ್ಪತ್ರೆಯಲ್ಲಿ ಜನಿಸಿತ್ತು.

ಹೆಸರಿನಲ್ಲಿ ಭಾರತೀಯತೆಯ ಅರ್ಥವಿದ್ದು, ಈಗ ಮಾಲತಿ  ಅಷ್ಟೊಂದು ಪ್ರಚಲಿತ ಹೆಸರಲ್ಲದೆ ಹೋದರೂ ಹಿಂದೆ ಭಾರತದ ಮಹಿಳೆಯರ ಸಾಮಾನ್ಯ ಹೆಸರಾಗಿದ್ದು, ಮಾಲತಿ ಹೆಸರಿನ ಅರ್ಥ ಸಂಸ್ಕೃತದಲ್ಲಿ ಮಲ್ಲಿಗೆ ಎನ್ನುವುದಾಗಿದೆ.

39 ರ ಹರೆಯದ ಪ್ರಿಯಾಂಕಾ,  ಗಾಯಕ 29 ರ ಹರೆಯದ ಜೋನಾಸ್ ಅವರನ್ನು ಡಿಸೆಂಬರ್ 2018 ರಲ್ಲಿ ಜೋಧ್‌ಪುರದಲ್ಲಿ ವಿವಾಹವಾಗಿದ್ದರು.