ಪ್ರಥಮ್‌ ಬಿಲ್ಡಪ್‌ ಟೈಟಲ್‌ ಲಾಂಚ್‌

“ಬಿಗ್‌ಬಾಸ್‌’ನಿಂದ ಬಂದ ಪ್ರಥಮ್‌ ಸಿನಿಮಾ ಮೇಲೆ ಒಪ್ಪಿಕೊಳ್ಳುತ್ತಲೇ ಇದ್ದಾರೆ. ಆದರೆ, ಅವರು “ಬಿಗ್‌ಬಾಸ್‌’ಗೆ ಹೋಗುವ ಮುನ್ನ ಆರಂಭಿಸಿದ “ದೇವ್ರವ್ನೆ ಬುಡು ಗುರು’ ಚಿತ್ರ ಮಾತ್ರ ಇನ್ನೂ ಮುಗಿದಿಲ್ಲ. ಈ ನಡುವೆಯೇ ಒಂದಷ್ಟು ಸಿನಿಮಾಗಳನ್ನು ಪ್ರಥಮ್‌ ಒಪ್ಪಿಕೊಂಡು ತಾನು, ಬಿಝಿ ಎಂಬಂತೆ ಓಡಾಡುತ್ತಿದ್ದಾರೆ. ಈಗ ಪ್ರಥಮ್‌ ಅವರ ಹೊಸ ಸಿನಿಮಾವೊಂದರ ಟೈಟಲ್‌ ಲಾಂಚ್‌ ಆಗಿದೆ.

ಅದು “ಬಿಲ್ಡಪ್‌’. ಹೌದು, ಈ ಹಿಂದೆಯೇ ಪ್ರಥಮ್‌ ತಾನು “ಬಿಲ್ಡಪ್‌’ ಎಂಬ ಸಿನಿಮಾದಲ್ಲಿ ನಟಿಸುತ್ತಿರುವುದಾಗಿ ಹೇಳಿಕೊಂಡಿದ್ದ ಪ್ರಥಮ್‌ ಚಿತ್ರದ ಟೈಟಲ್‌ ಲಾಂಚ್‌ ಅನ್ನು ವಿಶೇಷ ವ್ಯಕ್ತಿಯಿಂದ ಬಿಡುಗಡೆ ಮಾಡಿಸುವುದಾಗಿ ಹೇಳಿದ್ದಾರೆ. ಈಗ ಆ ವಿಶೇಷ ವ್ಯಕ್ತಿ ಬಿಡುಗಡೆ ಮಾಡಿದ್ದಾರೆ. ಆ ವ್ಯಕ್ತಿ ಶಿವರಾಜಕುಮಾರ್‌. ಶಿವರಾಜಕುಮಾರ್‌ “ಬಿಲ್ಡಪ್‌’ ಚಿತ್ರದ ಟೈಟಲ್‌ ಲಾಂಚ್‌ ಮಾಡಿ,ಪ್ರಥಮ್‌ಗೆ ಶುಭ ಕೋರಿದ್ದಾರೆ.  

ಈ ಹಿಂದಿನ ತಮ್ಮ ಸಿನಿಮಾಗಳ ಮುಹೂರ್ತವನ್ನು ರಾಜಕಾರಣಿಗಳಿಂದ ಮಾಡಿಸಿದ ಪ್ರಥಮ್‌ ಈ ಬಾರಿ ಟೈಟಲ್‌ ಲಾಂಚ್‌ ಅನ್ನು ಶಿವಣ್ಣನಿಂದ ಮಾಡಿಸಿದ್ದಾರೆ. ಈ ಚಿತ್ರವನ್ನು ಸ್ವತಃ ಪ್ರಥಮ್‌ ನಿರ್ದೇಶಿಸಿ, ನಾಯಕರಾಗಿ ನಟಿಸಲಿದ್ದಾರೆ. ಚಿತ್ರ ಯಾವಾಗ ಆರಂಭವಾಗುತ್ತದೆ, ಯಾರೆಲ್ಲಾ ನಟಿಸುತ್ತಾರೆ ಎಂಬ ಮಾಹಿತಿ ಸದ್ಯಕ್ಕೆ ಲಭ್ಯವಿಲ್ಲ. ಸದ್ಯ ಪ್ರಥಮ್‌ ನಟಿಸಿರುವ “ಎಂಎಲ್‌ಎ’, “ದೇವ್ರಂಥ ಮನುಷ್ಯ’ ಚಿತ್ರಗಳು ಚಿತ್ರೀಕರಣದಲ್ಲಿವೆ.