ದಿಲ್ಲಿಯಲ್ಲಿ ಗಾರುಡಿ ಗೊಂಬೆ ಮೋಡಿ!

ಹೊಸದಿಲ್ಲಿ: ರಾಷ್ಟ್ರ ರಾಜಧಾನಿಯ ದಕ್ಷಿಣ ದಿಕ್ಕಿಗಿರುವ ಐತಿಹಾಸಿಕ ಹೌಝ್ ಖಾಸ್‌ನ ಆರ್ಟ್‌ ಕನ್ಸಲ್ಟ್ ಗ್ಯಾಲರಿಯಲ್ಲಿ ‘ಗೊಂಬೆ’ಗಳ ಮೇಳ. ಅವು ಅಂತಿಂಥ ಗೊಂಬೆಗಳಲ್ಲ ಕನ್ನಡಿಗರ ಕಲಾ ಶ್ರೀಮಂತಿಕೆ ಯನ್ನು ಜಾಗತಿಕ ಮಟ್ಟದಲ್ಲಿ ಸಾರಿದ ಕನ್ನಡ ಮಣ್ಣಿನ ‘ಗಾರುಡಿ ಗೊಂಬೆ’ಗಳು.

ಗ್ಯಾಲರಿ ತುಂಬೆಲ್ಲ ಗೊಂಬೆಗಳೇ ಗೊಂಬೆಗಳು. ಸೃಷ್ಟಿಕರ್ತ ಬ್ರಹ್ಮ, ಈಶ್ವರ-ಮಹೇಶ್ವರ, ಅಂಬೆ-ಭವಾನಿ, ಕುದುರೆ, ಆನೆ -ಅಂಬಾರಿ ನೋಡುತ್ತಾ ಹೋದಷ್ಟೂ ಬೆಳೆಯುವ ವಿಧಗಳು ಕಲಾಪ್ರೇಮಿಗಳ ಮನತಣಿಸಿದವು. ಮ್ಯಾನೇಜ್‌ಮೆಂಟ್‌ ಆಫ್ ಆರ್ಟ್‌ ಟ್ರಶ್ಯೂರ್ ಆಫ್ ಇಂಡಿಯಾ (ಮಾಟಿ) ಆಯೋಜಿಸಿದ್ದ ಪ್ರದರ್ಶನಕ್ಕೆ ಕನ್ನಡದ ‘ಗೊಂಬೆ’ ಹೆಸರನ್ನೇ ಇರಿಸಿದ್ದು ವಿಶೇಷವಾದರೆ, ಈ ಗೊಂಬೆಗಳನ್ನು ತಯಾರಿಸಿದ್ದು ಕೊಪ್ಪಳ ಜಿಲ್ಲೆಯ ಕನ್ನಾಲ್‌ ಗ್ರಾಮದ ಕಲಾವಿದರು. ಮರದಿಂದ ಮಾಡುವ ಈ ಗೊಂಬೆಗಳು, ದೆಹಲಿ ನೋಡುಗರಿಗೆ ಹೊಸ ಆಕರ್ಷಣೆಯಾಗಿದ್ದವು. ಗಾರುಡಿ ಗೊಂಬೆಗಳ ಕುರಿತು ಮಾತನಾಡಿದ ಪ್ರೊ| ಆನಿಂದ್ಯ ಕಂತಿ ವಿಸ್ವಾಸ್‌ ಅವರು, ‘ಈ ಗೊಂಬೆ ಕಲೆ ಕರ್ನಾಟಕದ ಶ್ರೀಮಂತ ಸಂಸ್ಕೃತಿಯ ಪ್ರತಿಬಿಂಬವಾಗಿದ್ದು, ಒಡಿಶಾದ ‘ಪಟ್ಟಚಿತ್ರ’ ಮತ್ತು ಗುಜರಾತ್‌ನ ‘ವರ್ಲಿ’ ಕಲೆಯೊಂದಿಗೆ ಹಲವು ಸಾಮ್ಯತೆಗಳನ್ನು ಹಂಚಿಕೊಂಡಿದೆ’ ಎನ್ನುತ್ತಾರೆ.