Polali Rajarajeshwari Temple: 9 ಸಾವಿರ ಹರಕೆ ಸೀರೆಗಳ ಹಂಚಿಕೆ

ಬಂಟ್ವಾಳ: ಪೊಳಲಿ ಶ್ರೀ ರಾಜರಾಜೇಶ್ವರೀ ದೇವಸ್ಥಾನದಲ್ಲಿ ನವರಾತ್ರಿ ಮಹೋತ್ಸವದ ಲಲಿತಾ ಪಂಚಮಿಯ ದಿನವಾದ ಗುರುವಾರ ರಾತ್ರಿ ದೇವಸ್ಥಾನಕ್ಕೆ ಹರಕೆ ರೂಪದಲ್ಲಿ ಸಂದಾಯವಾದ ಸೀರೆಗಳನ್ನು ಹಂಚಲಾಗಿದ್ದು, ಸುಮಾರು 9 ಸಾವಿರ ಸೀರೆಗಳನ್ನು 18 ವರ್ಷ ಮೇಲ್ಪಟ್ಟ ಮಹಿಳೆಯರು ಪ್ರಸಾದ ರೂಪದಲ್ಲಿ ಪಡೆದುಕೊಂಡರು.

ಸೀರೆಯು ತಾಯಿಯ ಪ್ರಸಾದವೆಂದು ಭಕ್ತರು ತಾಸುಗಟ್ಟಲೆ ಕಾದು ಕುಳಿತು ಸ್ವೀಕರಿಸಿದರು. ದೇವಸ್ಥಾನದ ಆನುವಂಶಿಕ ಆಡಳಿತ ಮೊಕ್ತೇಸರ ಡಾ| ಮಂಜಯ್ಯ ಶೆಟ್ಟಿ ಅಮ್ಮುಂಜೆಗುತ್ತು, ಮೊಕ್ತೇಸರರಾದ ಯು. ತಾರಾನಾಥ ಆಳ್ವ, ಚೇರ ಸೂರ್ಯನಾರಾಯಣ ರಾವ್‌, ಪವಿತ್ರಪಾಣಿ ಮಾಧವ ಭಟ್‌, ಅರ್ಚಕರಾದ ಕೆ. ರಾಮ ಭಟ್‌, ನಾರಾಯಣ ಭಟ್‌, ಪರಮೇಶ್ವರ್‌ ಭಟ್‌, ಕಾರ್ಯನಿರ್ವಹಣಾಧಿಕಾರಿ ಪ್ರವೀಣ್‌ ಅವರು ಸೀರೆ ವಿತರಿಸಿದರು.

ಪೊಳಲಿ ಕ್ಷೇತ್ರದಲ್ಲಿ ನವರಾತ್ರಿ ಹಿನ್ನೆಲೆಯಲ್ಲಿ ಪ್ರತೀದಿನ ಬೆಳಗ್ಗೆ ಭಕ್ತರ ಹರಕೆಯ ಚಂಡಿಕಾ ಹೋಮ ನಡೆಯುತ್ತಿದ್ದು, ರಾತ್ರಿ ನವರಾತ್ರಿ ಪೂಜೆ ನಡೆಯುತ್ತದೆ. ಗುರುವಾರ ಸಂಜೆ ಸಾಂಸ್ಕೃತಿಕ ಕಾರ್ಯಕ್ರಮದಲ್ಲಿ ಸುಗಮ ಸಂಗೀತ, ದಾಸ ಕೀರ್ತನೆ, ಭಕ್ತಿ ಗಾಯನ, ದೇವರ ನಾಮ ಸಂಕೀರ್ತನೆ, ವಿದ್ವಾನ್‌ ಗಣರಾಜ ಭಟ್‌ ಬಂಟ್ವಾಳ ಮತ್ತು ಬಳಗದವರಿಂದ ಶಾಸ್ತ್ರೀಯ ಸಂಗೀತ ಕಾರ್ಯಕ್ರಮ ನಡೆಯಿತು.