ಆತ್ಮಶಕ್ತಿ ತುಂಬಿದ ಪ್ರಧಾನಿ ಮೋದಿ

ನವದೆಹಲಿ: “ಆತ್ಮವಿಶ್ವಾಸದಿಂದ ಮಹತ್ವದ್ದನ್ನು ಸಾಧಿಸಬಹುದು. ಮಾತ್ರೆ, ಗಿಡಮೂಲಿಕೆಗಳಿಂದ ಆತ್ಮವಿಶ್ವಾಸ ಬರುವುದಿಲ್ಲ. ಅದನ್ನು ನಾವು ಮಾನಸಿಕವಾಗಿ ಸಿದ್ಧಗೊಳಿಸಿ, ಕಾಪಾಡಿ ಇಟ್ಟುಕೊಳ್ಳಬೇಕು…’  ತಮ್ಮೊಂದಿಗೆ ಸಂವಾದದಲ್ಲಿ ಭಾಗಿಯಾಗಲು ದೇಶದ ಮೂಲೆಮೂಲೆಗಳಿಂದ  ಆಗಮಿಸಿದ್ದ ವಿದ್ಯಾರ್ಥಿಗಳಿಗೆ ಪ್ರಧಾನಿ ಮೋದಿ, ಪರೀಕ್ಷೆ ಗಳನ್ನು ಎದುರಿಸಲು ಕೊಟ್ಟ ಸಲಹೆ ಇದು. 

ಸದ್ಯದಲ್ಲೇ ಪರೀಕ್ಷೆ ಎದುರಿಸಲಿರುವ 10ನೇ ಹಾಗೂ 12ನೇ ತರಗತಿಯ ವಿದ್ಯಾರ್ಥಿಗಳಿಗಾಗಿ  ದಿಲ್ಲಿಯ ಟಾಲ್ಕಟೋರಾ ಕ್ರೀಡಾಂಗಣದಲ್ಲಿ ವಿಶೇಷ ಸಂವಾದದಲ್ಲಿ ಮೋದಿ ಅವರು ವಿದ್ಯಾರ್ಥಿಗಳಲ್ಲಿ ಸ್ಫೂರ್ತಿ ತುಂಬುವ ಮಾತುಗಳನ್ನಾಡಿದರು.
 
ವಿದ್ಯಾರ್ಥಿಗಳೊಂದಿಗಿನ ಈ ಸಂವಾದವೇ ನನ್ನ ಇಂದಿನ ಪರೀಕ್ಷೆ ಎನ್ನುತ್ತಲೇ ಮಾತು ಆರಂಭಿಸಿದ ಅವರು, ತಾವು ವಿದ್ಯಾರ್ಥಿಯಾಗಿದ್ದಾಗ ತಮ್ಮ ಮೇಲೆ ಪ್ರಭಾವ ಬೀರಿದ ಶಿಕ್ಷಕರನ್ನು ಸ್ಮರಿಸಿ, ತಮ್ಮಲ್ಲಿನ್ನೂ ಆ ವಿದ್ಯಾರ್ಥಿ ಜಾಗೃತವಾಗಿ ರುವಂತೆ ರೂಪಿಸಿದ ಅವರಿಗೆ ಧನ್ಯ ವಾದ ಅರ್ಪಿಸಿದರು. ಇದೇ ವೇಳೆ, ಅಂದು ಕೊಂಡಿದ್ದನ್ನು ಹೇಗೆ ಸಾಧಿಸ ಬೇಕೆಂದು ಸೂಕ್ತವಾಗಿ ನಿರ್ಧರಿಸುವ ಮಕ್ಕಳೇ ಹುಟ್ಟು ರಾಜಕಾರಣಿಗಳು ಎಂದು ಶ್ಲಾ ಸಿದರು.

ಸಂವಾದದ ಕೊನೆಯಲ್ಲಿ ವಿದ್ಯಾರ್ಥಿಯೊಬ್ಬ ಮುಂದಿನ ಲೋಕಸಭೆ ಪರೀಕ್ಷೆಗೆ (ಚುನಾವಣೆಗೆ) ನಿಮ್ಮ ಆತ್ಮವಿಶ್ವಾಸ ಹೇಗಿದೆ ಎಂಬ ಪ್ರಶ್ನೆಗೆ ಉತ್ತರಿಸಿದ ಮೋದಿ, ಪರೀಕ್ಷೆಯಲ್ಲಿ ಉತ್ತೀರ್ಣನಾಗುವ ವಿಶ್ವಾಸವಿದೆ ಎಂದರು. 

ಮೋದಿ ನೀಡಿದ ಸಲಹೆಗಳು
ನಮ್ಮಲ್ಲಿ ಆತ್ಮವಿಶ್ವಾಸವಿಲ್ಲದಿದ್ದರೆ ನಮ್ಮ ಮೇಲಿನ ದೇವರ ಕೃಪೆ ನಿರರ್ಥಕವಾಗುತ್ತದೆೆ ಎಂದು ಸ್ವಾಮಿ ವಿವೇಕಾನಂದರು ತಿಳಿಸಿದ್ದಾರೆ. ಹಾಗಾಗಿ, ನಮ್ಮಲ್ಲಿ ಆತ್ಮಶಕ್ತಿ ಜಾಗೃತಗೊಳಿಸುವುದು ಅನಿವಾರ್ಯ. 

ಪ್ರತಿಯೊಂದು ಮಗುವೂ ವಿಭಿನ್ನ. ಪೋಷಕರು ಮಕ್ಕಳಲ್ಲಿನ ಪ್ರತಿಭೆ ಅನುಸಾರ ಅವರನ್ನು ಪ್ರೋತ್ಸಾಹಿಸಬೇಕು. ಅನಾವಶ್ಯಕವಾಗಿ ತಮ್ಮ ಕನಸುಗಳನ್ನು ಮಕ್ಕಳ ಮೇಲೆ ಹೇರಬಾರದು. 

ಐಕ್ಯು (ಬುದ್ಧಿಮತ್ತೆ) ಜತೆಗೆ ಇಕ್ಯು (ಭಾವುಕತೆ) ಸೇರಿದಾಗ ಮಾತ್ರ ಬದುಕು ಪರಿಪೂರ್ಣ. ಐಕ್ಯು ನಿಮ್ಮನ್ನು ಸಾಧನೆಯತ್ತ ಕೊಂಡೊಯ್ದರೆ, ಇಕ್ಯು ನಿಮ್ಮ ಜೀವನವನ್ನು ಸಮೃದ್ಧಗೊಳಿಸುತ್ತದೆ.
 
ಏಕಾಗ್ರತೆ ಸಾಧಿಸುವ ಮುನ್ನ ಅನಾವಶ್ಯಕ ವಿಚಾರಗಳ ಕಡೆಗೆ ವೈರಾಗ್ಯ ಹೊಂದುವುದನ್ನು ಕಲಿಯಬೇಕು. 

ಅನ್ಯರು ಸವೆಸಿದ ಹಾದಿಯಲ್ಲೇ ನಡೆಯಲು ನಿರ್ಧರಿಸದೆ, ನಿಮ್ಮದೇ ಪ್ರತ್ಯೇಕ ಮಾರ್ಗ ಸೃಷ್ಟಿಸಲು ಮುಂದಾಗಿ.