ಪಿಂಕ್‌ ನೋಟಿಗೂ ದಾವೂದ್‌ ಕಣ್ಣು!

ಹೊಸದಿಲ್ಲಿ: ಎರಡು ಸಾವಿರ ರೂಪಾಯಿಯ ಗರಿಗರಿ ನೋಟಿನ ಮೇಲೂ ನಕಲಿ ನೆರಳು ಬಿದ್ದಿದೆ. ಭಾರತ ಸರಕಾರ ಮತ್ತು ಆರ್‌ಬಿಐಗೆ ಮುಜುಗರ ಸೃಷ್ಟಿಸುವ ರೀತಿಯಲ್ಲಿ ನಕಲಿ ನೋಟುಗಳನ್ನು ದಂಧೆ ಕೋರರು ಸೃಷ್ಟಿಸಿದ್ದು, ಎಟಿಎಂ ಒಡಲಿಗೂ ಸೇರಿವೆ. ಈ ದಂಧೆಯ ಹಿಂದೆ ಭೂಗತ ಪಾತಕಿ ದಾವೂದ್‌ ಇಬ್ರಾಹಿಂ ಕೈವಾಡ ಇದೆ ಎಂಬ ಶಂಕೆ ದಟ್ಟವಾಗಿದೆ.

ದಿಲ್ಲಿಯ ಎಟಿಎಂ ಯಂತ್ರದಿಂದ ಬಂದ ಪಿಂಕ್‌ ಬಣ್ಣದ ನೋಟಿನಲ್ಲಿ ಆರ್‌ಬಿಐ ಹೆಸರೇ ಕಣ್ಮರೆ ಯಾಗಿದ್ದು, “ಚಿಲ್ಡ್ರನ್ಸ್‌ ಬ್ಯಾಂಕ್‌ ಆಫ್ ಇಂಡಿಯಾ’ ಎಂದು ಮುದ್ರಿಸಲಾಗಿದೆ! ಆರ್‌ಬಿಐನ ಮುದ್ರೆ ಇರಬೇಕಾದ ಜಾಗದಲ್ಲಿ “ಪಿಕೆ’ ಎಂಬ ಹೆಸರು ಅಚ್ಚಾಗಿದೆ. ಸಾಲದೆಂಬಂತೆ ನೋಟಿನ ಮೇಲ್ಭಾಗದ ಎಡ ಮೂಲೆಯಲ್ಲಿ “ಭಾರತೀಯ ಮನೋರಂಜನ್‌ ಬ್ಯಾಂಕ್‌’ ಎಂಬ ವ್ಯಂಗ್ಯಶೀರ್ಷಿಕೆ. ಈ ನೋಟಿನ ಸೀರಿಯಲ್‌ ಸಂಖ್ಯೆ “0000000′! ಇಲ್ಲಿ ರುಪೀ ಚಿಹ್ನೆಯೇ ಇಲ್ಲ, ಗವರ್ನರ್‌ ಸಹಿಯೂ ಇಲ್ಲ!

500, 1000 ಮುಖಬೆಲೆಯ ನೋಟು ನಿಷೇಧದ ವೇಳೆ ಪ್ರಧಾನಿ ನರೇಂದ್ರ ಮೋದಿ ಪಾಕಿಸ್ಥಾನದಿಂದ ಪೂರೈಕೆ ಆಗುತ್ತಿರುವ ನಕಲಿ ನೋಟುಗಳ ಬಗ್ಗೆ ಪ್ರಸ್ತಾವಿಸಿದ್ದರು. ಇದಕ್ಕೆ ಪ್ರತೀಕಾರವಾಗಿ ಈಗ ಮುಂಬಯಿನಲ್ಲಿನ ದಾವೂದ್‌ ಸಹಚರರು ನಕಲಿ ನೋಟಿನ ದಂಧೆ ನಡೆಸುತ್ತಿದ್ದು, ಬಾಂಗ್ಲಾದೇಶ ಮತ್ತು ನೇಪಾಲದ ಕಾಣದ ಕೈಗಳೂ ಇದರಲ್ಲಿ ಭಾಗಿಯಾಗಿವೆ ಎನ್ನಲಾಗಿದೆ. ಇವೆಲ್ಲವನ್ನೂ ಪಾಕಿಸ್ಥಾನದ ಗುಪ್ತಚರ ಇಲಾಖೆ ಐಎಸ್‌ಐ ನಿಯಂತ್ರಿಸುತ್ತಿದೆ ಎಂದು ಆಂಗ್ಲ ಪತ್ರಿಕೆಯೊಂದು  ವರದಿ ಮಾಡಿದೆ.  

ಪತ್ತೆ ಹೇಗಾಯಿತು?:
ಹಲವು ವ್ಯಂಗ್ಯಗಳ ಲೋಪ ತುಂಬಿಕೊಂಡ 2 ಸಾವಿರ ರೂ.ನ ನೋಟುಗಳು ಸಂಗಮ್‌ ವಿಹಾರ್‌ನ ಎಟಿಎಂನಲ್ಲಿ ಪತ್ತೆಯಾಗಿದ್ದು, ರೋಹಿತ್‌ ಕುಮಾರ್‌ ಎಂಬವರು ಫೆ.6ರಂದು ಡ್ರಾ ಮಾಡಿಕೊಂಡಿದ್ದರು. ಒಟ್ಟು 8 ಸಾವಿರ ರೂ. ನೋಟುಗಳಲ್ಲಿ ನಾಲ್ಕೂ ನೋಟುಗಳು ನಕಲಿಯಾಗಿವೆ. ಎಲ್ಲದರ ಮೇಲೂ ದೋಷಗಳು ತುಂಬಿಕೊಂಡಿವೆ.