ಲಸಿಕೆ ಗುರಿ ತಲುಪಲು ಪಿಂಕ್‌ ಬೂತ್‌

ಗುಂಡ್ಲುಪೇಟೆ: ಕೊರೊನಾ ಲಸಿಕೆ ಪಡೆಯುವಂತೆ ಮಹಿಳೆಯರಿಗೆ ಉತ್ತೇಜಿಸಲು ಪಟ್ಟಣದಲ್ಲಿ ಸಾರ್ವಜನಿಕ ಆಸ್ಪತ್ರೆಯಲ್ಲಿ “ಪಿಂಕ್‌ ಬೂತ್‌’ತೆರೆಯಲಾಗಿದೆ.

ಲಸಿಕೆ ಪಡೆಯಲುಮಹಿಳೆಯರು ಹಿಂದೇಟು ಹಾಕುತ್ತಿದ್ದರು. ಜೊತೆಗೆ ಜಿಲ್ಲೆಯಲ್ಲಿ ಲಸಿಕೆ ಪಡೆದುಕೊಂಡ ಮಹಿಳೆಯರ ಪ್ರಮಾಣ ಕಡಿಮೆ ಇರುವುದನ್ನು ಮನಗಂಡ ಜಿಲ್ಲಾಡಳಿತ “ಪಿಂಕ್‌ ಬೂತ್‌’ ಎಂಬನೂತನ ಕಾರ್ಯಕ್ರಮ ರೂಪಿಸಿದ್ದು, ಪ್ರತಿ ತಾಲೂಕಿಗೂ ವಿಸ್ತರಿಸಿದೆ.

ಈ ಹಿನ್ನೆಲೆ ತಾಲೂಕಿನಲ್ಲಿ ಸೋಮವಾರದಿಂದ ಆರಂಭಗೊಂಡ ಪಿಂಕ್‌ಬೂತ್‌ಗೆ ಉತ್ತಮ ಸ್ಪಂದನೆ ದೊರೆತಿದೆ. ಪಿಂಕ್‌ ಬೂತ್‌ ಕೇಂದ್ರವನ್ನು ಮಹಿಳೆಯರಿಗೆಂದೆ ತೆರೆದಿರುವ ಹಿನ್ನೆಲೆ ಮುಕ್ತವಾಗಿ ಬಂದ ಲಸಿಕೆ ಪಡೆಯಬಹುದಾಗಿದೆ. ಇದರಿಂದ ಪುರುಷರ ಜೊತೆ ಸರದಿ ನಿಲ್ಲುವ ಕಿರಿಕಿರಿ ತಪ್ಪಿದಂತಾಗಿದೆ. ಮೊದಲ ಹಂತದಲ್ಲಿ ಬೀದಿ ಬದಿ ವ್ಯಾಪಾರಿಗಳು,ಮುಖ್ಯ ವಾಹಿನಿಯಲ್ಲಿ ಕಾರ್ಯ ನಿರ್ವಹಿಸುವ ಮಹಿಳೆಯರಿಗೆ ಲಸಿಕೆ ನೀಡುತ್ತಿದ್ದು, ನಂತರಸ್ವ-ಸಹಾಯ ಸಂಘ ಸಂಸ್ಥೆಗಳು, ಖಾಸಗಿ ಕಂಪನಿ, ಹೋಟೆಲ್‌ನಲ್ಲಿ ಕೆಲಸ ಮಾಡುವವರು ಸೇರಿದಂತೆ ಇತರೆ ಹಲವು ವರ್ಗಕ್ಕೆ ವಿಸ್ತರಿಸಲಾಗುತ್ತದೆ.

45 ವರ್ಷ ಮೇಲ್ಪಟ್ಟ ಮಹಿಳೆಯರಿಗೆ ಮೊದಲಆದ್ಯತೆ ನೀಡಲಾಗಿದ್ದು, ಜೂ.21ರ ನಂತರ 18ವರ್ಷ ತುಂಬಿದವರಿಗೂ ಲಸಿಕೆ ಹಾಕಲಾಗುವುದು.ಉತ್ತಮ ಸ್ವಂದನೆ ವ್ಯಕ್ತವಾದರೆ ಹೋಬಳಿಮಟ್ಟದಲ್ಲೂ ವಿಸ್ತರಿಸುವ ಯೋಚನೆ ಇದೆ ಎಂದು ಆರೋಗ್ಯಾಧಿಕಾರಿ ರವಿಕುಮಾರ್‌ ತಿಳಿಸಿದರು.