Flight ಶೌಚಾಲಯದಲ್ಲಿ ಮೃತಪಟ್ಟ ಪೈಲಟ್: 271 ಪ್ರಯಾಣಿಕರಿದ್ದ ವಿಮಾನ ತುರ್ತು ಲ್ಯಾಂಡಿಂಗ್!

ಪನಾಮ: ಒಟ್ಟು 271 ಮಂದಿ ಪ್ರಯಾಣಿಕರಿದ್ದ ವಿಮಾನದ ಪೈಲಟ್ ಒಬ್ಬರು ಮಾರ್ಗಮಧ್ಯೆ ಮೃತಪಟ್ಟಿದ್ದು, ಸಹ ಪೈಲಟ್ ವಿಮಾನವನ್ನು ತುರ್ತು ಲ್ಯಾಂಡಿಂಗ್ ಮಾಡಿದ ಘಟನೆ ನಡೆದಿದೆ. ಮಿಯಾಮಿಯಿಂದ ಚಿಲಿಗೆ ತೆರಳುತ್ತಿದ್ದ ಕಮರ್ಷಿಯಲ್ ಫ್ಲೈಟ್ ನಲ್ಲಿ ಈ ಘಟನೆ ನಡೆದಿದೆ.

ವಿಮಾನವನ್ನು ಪನಾಮದಲ್ಲಿ ತುರ್ತು ಲ್ಯಾಂಡ್ ಮಾಡಲಾಗಿದೆ. ಲ್ಯಾಟಂ ಏರ್ ಲೈನ್ಸ್ ನ ಮುಖ್ಯ ಪೈಲಟ್ 56 ವರ್ಷದ ಇವಾನ್ ಅಂದೂರ್ ಅವರಿಗೆ ವಿಮಾನದಲ್ಲಿ ಹಠಾತ್ ಹೃದಯ ಸ್ಥಂಭನವಾಗಿದೆ.

ವಿಮಾನದ ಸಹ-ಪೈಲಟ್‌ ಪನಾಮ ನಗರದ ಟೊಕುಮೆನ್ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ತುರ್ತು ಲ್ಯಾಂಡಿಂಗ್ ಮಾಡಿದರು. ಅಲ್ಲಿ ಅವರಿಗೆ ತ್ವರಿತವಾಗಿ ವೈದ್ಯಕೀಯ ನೆರವು ನೀಡಲು ವ್ಯವಸ್ಥೆ ಮಾಡಲಾಗಿತ್ತು.

ವಿಮಾನ ತುರ್ತು ಲ್ಯಾಂಡ್ ಮಾಡಲು ಅನುವಾಗುತ್ತಿದ್ದಂತೆ ವಿಮಾನದಲ್ಲಿದ್ದ ಪ್ರಯಾಣಿಕರಲ್ಲಿದ್ದ ಇಬ್ಬರು ವೈದ್ಯರು ಮತ್ತು ಓರ್ವ ನರ್ಸ್, ಪೈಲಟ್ ಗೆ ತುರ್ತು ಚಿಕಿತ್ಸೆ ನೀಡಲು ಮುಂದಾಗಿದ್ದಾರೆ. ಅವರ ಪ್ರಯತ್ನದ ಹೊರತಾಗಿಯೂ ಪೈಲಟ್ ಇವಾನ್ ಅವರನ್ನು ಉಳಿಸಲು ವಿಫಲರಾದರು ಎಂದು ವರದಿ ಹೇಳಿದೆ.

ಪ್ರಯಾಣಿಕರಿಗೆ ಪನಾಮದ ಹೋಟೆಲ್ ನಲ್ಲಿ ಉಳಿದುಕೊಳ್ಳಲು ವ್ಯವಸ್ಥೆ ಮಾಡಲಾಗಿದ್ದು, ಬಳಿಕ ಮರುದಿನ ಅವರಿಗೆ ಬೇರೆ ವಿಮಾನದಲ್ಲಿ ಪ್ರಯಾಣ ಕಲ್ಪಿಸಲಾಯಿತು ಎಂದು ವರದಿಯಾಗಿದೆ.