ಮೇ 11ರಿಂದ ಮುಂಬಯಿ –ಕರಾಚಿ ಪಿಐಎ ವಿಮಾನ ಹಾರಾಟ ಇಲ್ಲ

ಮುಂಬಯಿ : ಮುಂಬಯಿ – ಕರಾಚಿ ನಡುವೆ ವಾರಕ್ಕೊಂದು ದಿನ (ಪ್ರತೀ ಗುರುವಾರ) ವಿಮಾನ ಯಾನ ಕೈಗೊಳ್ಳುವ ಪಾಕಿಸ್ಥಾನ್‌ ಇಂಟರ್‌ನ್ಯಾಶನಲ್‌ ಏರ್‌ಲೈನ್ಸ್‌ (ಪಿಐಎ) ಇದೇ ಮೇ 11ರಿಂದ ತನ್ನ ಸೇವೆಯನ್ನು ಸ್ಥಗಿತಗೊಳಿಸುವುದಾಗಿ ತಿಳಿಸಿದೆ. ಆದರೆ ಇದಕ್ಕೆ ಕಾರಣವೇನೆಂಬುದನ್ನು ಅದು ತಿಳಿಸಿಲ್ಲ.

ಭಾರತ – ಪಾಕಿಸ್ಥಾನ ನಡುವೆ ತಲೆದೋರಿರುವ ಗಡಿ ಉದ್ರಿಕ್ತತೆ ಇದಕ್ಕೆ ಕಾರಣವಿರಬಹುದೇ ಅಥವಾ ವಾಣಿಜ್ಯ ಕಾರಣಕ್ಕೆ ಪಿಎಐ ತನ್ನ ಮುಂಬಯಿ-ಕರಾಚಿ ಹಾರಾಟವನ್ನು ನಿಲ್ಲಿಸಲು ನಿರ್ಧರಿಸಿರಬಹುದೇ ಎಂಬುದು ಗೊತ್ತಾಗಿಲ್ಲ. 

ಮೇ 11ರ ಬಳಿಕ ಕರಾಚಿ – ಮುಂಬಯಿ ವಿಮಾನಯಾನದ ಯಾವುದೇ ಟಿಕೆಟ್‌ಗಳನ್ನು ಮಾರಕೂಡದೆಂದು ಪಿಐಎ ಸಂಬಂಧಿತ ಅಧಿಕಾರಿಗಳಿಗೆ ತಿಳಿಸಿದೆ. ಈ ನಡುವೆ ನಿನ್ನೆ ಮೇ 4ರಂದು ಕೂಡ ಪಿಐಎ ವಿಮಾನ ಹಾರಾಟ ನಡೆದಿಲ್ಲ. ಆದರೆ ಇದನ್ನು ಮುಂಚಿತವಾಗಿಯೇ ಅದು ತಿಳಿಸಿದೆ ಎಂದು ಗೊತ್ತಾಗಿದೆ.