ಒಂದು ಪೆಗಾಸಸ್ ಸ್ಪೈವೇರ್ ಬೆಲೆ ಎಷ್ಟು ? ಇದು ಸರ್ಕಾರದ ಬೇಹುಗಾರಿಕೆಯ ರಹಸ್ಯ ಅಸ್ತ್ರ!

ಕಳೆದ ಹಲವು ದಿನಗಳಿಂದ ಜಗತ್ತಿನಾದ್ಯಂತ ಪೆಗಾಸಸ್ ಎಂಬ ಸ್ಪೈವೇರ್ ನ ಹೆಸರು ಹೆಚ್ಚು ಪ್ರಚಲಿತದಲ್ಲಿದೆ.    ರಾಜಕೀಯ ವಲಯದಲ್ಲೂ ಚರ್ಚೆಗೆ ಮತ್ತು ಪ್ರತಿಭಟನೆಗೆ ಗ್ರಾಸವಾಗಿದೆ. ಇಸ್ರೇಲಿ ಮೂಲದ ಎನ್ ಎಸ್ ಓ ಗ್ರೂಪ್ ಸಿದ್ದಪಡಿಸಿದ ಈ ಸ್ಪೈವೇರ್ ಅಷ್ಟೊಂದು ಪ್ರಮಾಣದಲ್ಲಿ ಕುಖ್ಯಾತಿಯಾಗಲು ಕಾರಣವೇನು ? ಒಟ್ಟಾರೆ ಪೆಗಾಸಸ್ ನ ಕಾರ್ಯವೇನು ? ಮುಂತಾದ ಹಲವು ಮಾಹಿತಿಗಳು ಇಲ್ಲಿವೆ.

ಎನ್ ಎಸ್ ಓ ಗ್ರೂಪ್ ಅಭಿವೃದ್ದಿಪಡಿಸಿದ ಸ್ಪೈವೇರ್ ಅನ್ನು ಮೊಬೈಲ್ ಸೇರಿದಂತೆ ಇತರೆ ಡಿವೈಸ್ ಗಳಲ್ಲಿ ಅಳವಡಿಸಲಾಗುತ್ತದೆ. ಐಓಎಸ್ ಮತ್ತು ಆ್ಯಂಡ್ರಾಯ್ಡ್ ಡಿವೈಸ್ ಗಳಲ್ಲಿ ಇತರ ಕಾರ್ಯನಿರ್ವಹಣೆ ಅಧಿಕವಾಗಿರುತ್ತದೆ. ಪೆಗಾಸಸ್ ಮೂಲಕ ಕರೆಗಳನ್ನು ಕದ್ದಾಲಿಸಬಹುದು, ಪಾಸ್ ವರ್ಡ್ ಗಳನ್ನು ಸಂಗ್ರಹಿಸಬಹುದು. ಎಸ್ ಎಂಎಸ್ ಮಾಹಿತಿ, ಲೊಕೇಶನ್ ಗಳನ್ನು ಪತ್ತೆಹಚ್ಚಬಹುದು. ಇದಲ್ಲದೆ ಮೈಕ್ರೋಫೋನ್, ಕ್ಯಾಮರ ಹಾಗೂ ಆ್ಯಪ್ ಗಳನ್ನು ನಿಯಂತ್ರಿಸುವ ಕೆಲಸವನ್ನು ಕೂಡ ಇದು ಮಾಡುತ್ತದೆ.

ಪೆಗಾಸಸ್ ಎಂಬುದು ಪೌರಾಣಿಕ ಕಥೆಗಳಲ್ಲಿ ಬರುವ ರೆಕ್ಕೆಯುಳ್ಳ ಹಾರುವ ಕುದುರೆಯ ಹೆಸರು. ಪೆಗಾಸಸ್ ಎಂಬುದು ಕಂಪ್ಯೂಟರ್ ಭಾಷೆಯಲ್ಲಿ ಟ್ರೋಜನ್ ಹಾರ್ಸ್ ಎಂಬುದಾಗಿದ್ದು ಉದ್ದೇಶಪೂರ್ವಕವಾಗಿ ಜನರನ್ನು ದಾರಿತಪ್ಪಿಸುವ ಕೆಲಸ ಮಾಡುತ್ತದೆ ಎಂಬ ಅರ್ಥ ನೀಡುತ್ತದೆ. ಎನ್ ಎಸ್ ಓ ಗ್ರೂಪ್ ಮೇಲೆ ಮೊದಲು ಅಮೆರಿಕಾದ ಖಾಸಗಿ ಈಕ್ವಿಟಿ ಸಂಸ್ಥೆ ಫ್ರಾನ್ಸಿಸ್ಕೋ ಪಾಟ್ನಾರ್ಸ್ ನ ಒಡೆತನವಿತ್ತು. ಆದರೆ 2019 ರಲ್ಲಿ ಮತ್ತೆ ಎನ್ ಎಸ್ ಓ ಗ್ರೂಪ್ ನ ಅಧೀನಕ್ಕೆ ಬಂತು. ಭಯೋತ್ಪಾದನೆ ಮತ್ತು ಅಪರಾಧ ಕೃತ್ಯಗಳನ್ನುಎದುರಿಸಲು ಸಹಾಯ ಮಾಡುವ ತಂತ್ರಜ್ಞಾನವನ್ನು ಸರ್ಕಾರಗಳಿಗೆ ಒದಗಿಸುತ್ತೇವೆ ಎಂದು ಕಂಪನಿ ಹೇಳಿಕೊ‍ಳ್ಳುತ್ತದೆ. 2018ರಲ್ಲಿ ಪೆಗಾಸಸ್ ಮೊದಲ ಬಾರಿಗೆ ಪತ್ತೆಹಚ್ಚಲಾಯಿತು.

ಮಾನವ ಹಕ್ಕುಗಳ ಕಾರ್ಯಕರ್ತರೊಬ್ಬರ ಐಪೋನ್ installation ಪ್ರಕ್ರಿಯೆ ಸಂದರ್ಭದಲ್ಲಿ ತೊಡಕುಂಟಾದಾಗ ಈ ಪೆಗಾಸಸ್ ಎಂಬ ಸ್ಪೈವೇರ್ ಬೆಳಕಿಗೆ ಬಂದಿದ್ದವು. ಇದು ಆ ವರುಷ ದೊಡ್ಡ ಮಟ್ಟದ ಮಾಧ್ಯಮ ಚರ್ಚೆಗೆ ಕಾರಣವಾಗಿತ್ತು. ಮಾತ್ರವಲ್ಲದೆ ಅತೀದೊಡ್ಡ ಅತ್ಯಾಧುನಿಕ ಸ್ಮಾರ್ಟ್ ಫೋನ್ ಅಟ್ಯಾಕ್ ಎಂದಾಗಿ ಬಿಂಬಿಸಲ್ಪಟ್ಟಿತ್ತು. ಐಫೋನ್ ನೊಳಗೆ ಅನಧಿಕೃತವಾಗಿ ನುಸುಳಿದ ಮೊದಲ ಸ್ಪೈವೇರ್ ಇದಾಗಿದೆ.

ಆಗಸ್ಟ್ 23 2020ರಂದು ಇಸ್ರೇಲ್ ಪತ್ರಿಕೆಯ ತನಿಖಾ ವರದಿಯ ಪ್ರಕಾರ, ಎನ್ ಎಸ್ ಓ ಗ್ರೂಪ್ ಪೆಗಾಸಸ್ ಸ್ಪೈವೇರ್ ಸಾಫ್ಟ್ ವೇರ್ ಅನ್ನು ನೂರಾರು ಮಿಲಿಯನ್ ಅಮೆರಿಕನ್ ಡಾಲರ್ ಗೆ ಯುಏಇ ಸೇರಿದಂತೆ ಇತರ ಗಲ್ಫ್ ರಾಷ್ಟ್ರಗಳಿಗೆ ಮಾರಾಟ ಮಾಡಿದೆ.

ಪೆಗಾಸಸ್ ಎಂಬ ಟೂಲ್ ಬಳಕೆ ಮಾಡಿ ಬೇಹುಗಾರಿಕೆ ಮಾಡಬಹುದು. ಭಾರತದಲ್ಲೇ ಸುಮಾರು 50,000 ಮೊಬೈಲ್ ಗಳಿಗೆ ಪೆಗಾಸಸ್  ಲಿಂಕ್ ಅಗಿದ್ದು ರಾಜಕಾರಣಿಗಳು, ಪತ್ರಕರ್ತರು, ಸಾಮಾಜಿಕ ಕಾರ್ಯಕರ್ತರು ಸೇರಿದಂತೆ ಇತರ ಗಣ್ಯ ವ್ಯಕ್ತಿಗಳ ಮೊಬೈಲ್ ಗಳ ಮಾಹಿತಿ ಪಡೆಯುತ್ತಿದೆ. ಕದ್ದಾಲಿಕೆಯಲ್ಲಿ ಸುಮಾರು 11 ದೇಶಗಳ ಸರ್ಕಾರಗಳು ಕೂಡ ಭಾಗಿಯಾಗಿದೆ ಎಂಬ ಮಾಹಿತಿಯೂ ಇದೆ. ಭಾರತ ಸರ್ಕಾರ ಕೂಡ ಇದರಲ್ಲಿ ಭಾಗಿಯಾಗಿವೆ ಎನ್ನಲಾಗುತ್ತಿದ್ದು, ಅದರೆ ಯಾವ ರಾಜ್ಯದ ಸರ್ಕಾರ ಎಂದು ಖಚಿತವಾಗಿಲ್ಲ.

ಪೆಗಾಸಸ್ ಕಾರ್ಯನಿರ್ವಹಣೆ:

ಪೆಗಾಸಸ್ ಟೆಕ್ಸ್ಟ್ ಅಥವಾ ಇಮೇಲ್ ಲಿಂಕ್ ಗಳ ಮೂಲಕ ಮತ್ತೊಬ್ಬರ ಡಿವೈಸ್ ಅನ್ನು ಪ್ರವೇಶಿಸುತ್ತದೆ‌‌. ಪೆಗಾಸಸ್ ತಂತ್ರಜ್ಞಾನ ಅತ್ಯಾಧುನಿಕವಾಗಿದ್ದು ಕೆಲವೊಮ್ಮೆ ಈ ತೆರೆನಾದ ಅನುಮಾನಸ್ಪದ ಲಿಂಕ್‌ ಗಳನ್ನು  ತೆರೆಯದಿದ್ದರೂ, ಈ ಸ್ಪೈ ವೇರ್ ಇನ್ ಸ್ಟಾಲ್  ಅಗುತ್ತದೆ. ಹಾಗಾಗಿ ಇದನ್ನು ಜೀರೋ ಕ್ಲಿಕ್ ಇನ್ ಸ್ಟಾಲೇಶನ್ ಎಂದು ಕೂಡ ಕರೆಯುತ್ತಾರೆ.

ಇದು ರಹಸ್ಯವಾಗಿ ಮಾಹಿತಿ ಕಲೆಹಾಕುವ ದುರುದ್ದೇಶಪೂರಿತ ಸಾಫ್ಟ್ ವೇರ್ ಅದ್ದರಿಂದ, ಇದು ಬಳಕೆದಾರರನ ಅನುಮತಿ ಪಡೆಯದೆ ಡೇಟಾಗಳನ್ನು ಮೂರನೇಯ ವ್ಯಕ್ತಿಗೆ ಕಳುಹಿಸಿಕೊಡುವುದು. ಇದರಿಂದ ಎಸ್ ಎಂಎಸ್, ಇ-ಮೇಲ್, ಸ್ಕ್ರೀನ್ ಶಾಟ್, ಪಾಸ್ ವರ್ಡ್  ಸೇರಿದಂತೆ ಸಂಪೂರ್ಣ ಮಾಹಿತಿ ಸಂಗ್ರಹಿಸಬಹುದು.

ಪೆಗಾಸಸ್ ಮೂಲಕ ‘ಹೈ ಪ್ರೊಪೈಲ್‌’ ವ್ಯಕ್ತಿಗಳ ಮೇಲೆ ಬೇಹುಗಾರಿಕೆಯನ್ನು ನಿರಂತರವಾಗಿ ಮಾಡಲಾಗುತ್ತಿದೆ. ಪ್ರಜಾಪ್ರಭುತ್ವ ರಾಷ್ಟ್ರದಲ್ಲಿ ಪ್ರತಿಯೊಬ್ಬರಿಗೂ ಅವರ ಖಾಸಗಿತನವನ್ನು ಕಾಪಾಡಿಕೊಳ್ಳುವ ಸ್ವಾತಂತ್ರ್ಯವಿದೆ. ಈ ಪೆಗಾಸಸ್ ನಂತಹ ಮಾರಕವನ್ನು ವಿಶ್ವಮಾರುಕಟ್ಟೆಗೆ ಒದಗಿಸುತ್ತಿರುವುದು ಇಸ್ರೇಲ್ ಮತ್ತು ಬ್ರಿಟನ್ ನಂತಹ ಪ್ರಜಾಪ್ರಭುತ್ವ ರಾಷ್ಟ್ರಗಳು.

ಪೆಗಾಸಸ್ ಮೂಲ: ಜಗತ್ತಿನಲ್ಲಿ ಸ್ಪೈವೇರ್ ಗಳನ್ನು ಈ ಹಿಂದೆಯೂ  ಬೇಹುಗಾರಿಕೆ ‌ಮಾಡಲು ಬಳಸಲಾಗುತ್ತಿತ್ತು. ಪ್ರಮುಖವಾಗಿ ಶತ್ರುರಾಷ್ಟ್ರಗಳ ಬಲಾಬಲವನ್ನು ತಿಳಿಯಲು ಸರ್ಕಾರಿ ಸಂಸ್ಥೆಗಳು ಇದನ್ನು ಬಳಸುತ್ತಿದ್ದವು. ಎನ್ ಎಸ್ ಓ ಗ್ರೂಪ್ (ಕಾರ್ಪೋರೇಟ್ ಕಂಪೆನಿ) ಈ ತೆರೆನಾದ ಸಾಕಷ್ಟು ಸ್ಪೈವೇರ್ ಗಳನ್ನು ಸೃಷ್ಟಿಸಿ ವಿಶ್ವದ 60ಕ್ಕೂ ಹೆಚ್ಚಿನ ರಾಷ್ಟ್ರಗಳಿಗೆ ಮಾರಾಟ ಮಾಡಿದೆ.  ಇದನ್ನು ಇಸ್ರೇಲ್ ಸರ್ಕಾರದ ಒಪ್ಪಿಗೆ ಇಲ್ಲದೆ ಯಾರಿಗೂ ಕೊಡುವಂತಿಲ್ಲ. ಹಾಗೂ ಸರ್ಕಾರಕ್ಕೆ, ಸರ್ಕಾರಿ ಸಂಸ್ಥೆಗಳಿಗೆ ಮಾತ್ರ ಮಾರಾಟ ಮಾಡಬೇಕು. ಖಾಸಗಿಯವರೆಗೆ ಮಾರಾಟ ಇಲ್ಲ ಎಂಬ ನಿಯಮವಿದೆ.

ಈ ಸಾಫ್ಟ್ ವೇರ್ ದೇಶದ ರಕ್ಷಣೆಗೆ, ಭಯೋತ್ಪಾದಕ ಕೃತ್ಯಗಳ ಕುರಿತು ಮಾಹಿತಿ‌ ಸಂಗ್ರಹಣೆ ಮುಂತಾದ ಉತ್ತಮ ವಿಷಯಗಳಿಗೆ ಬಳಕೆಯಾಗಬೇಕು. ಖಾಸಗಿಯವರಿಗೆ ನೀಡಿದರೆ ದುಷ್ಟ ಮತ್ತು ವೈಯಕ್ತಿಕ ಕೆಲಸಗಳಿಗೆ ಬಳಕೆ ಮಾಡಲಾಗುತ್ತದೆ ಎಂಬುದು ತಿಳಿದಿದ್ದರೂ ಸರ್ಕಾರಗಳೇ ಇದರ ಬಳಕೆಯಲ್ಲಿ ಎಡವಿದೆ. ಇದೇ ಇಂದಿನ ಜಾಗತಿಕ ಚರ್ಚೆಗೆ ಕಾರಣ.

ಕೋಟಿ ಕೋಟಿ ವಹಿವಾಟು: ಇಂದು ಪೆಗಾಸಸ್ ಸ್ಪೈವೇರ್ ಇನ್ ಸ್ಟಾಲ್ ಮಾಡಲು ಹಲವು ದೇಶಗಳು/ವ್ಯಕ್ತಿಗಳು ದಾಂಗುಡಿಯಿಡುತ್ತಿದ್ದಾರೆ. ಇದಕ್ಕಾಗಿ ಕೋಟಿ ಕೋಟಿ ಹಣವನ್ನು ವ್ಯಯಮಾಡುತ್ತಿದ್ದಾರೆ. ಪೆಗಾಸಸ್ ಇನ್ ಸ್ಟಾಲ್ ಮಾಡಲು ವಿವಿಧ ಡಿವೈಸ್ ಗಳಿಗೆ ಇಂತಿಷ್ಟೆ ಪ್ರಮಾಣದ ಹಣ ನಿಗದಿ‌ಮಾಡಲಾಗಿದೆ. ಕೆಲವೊಮ್ಮೆವ್ಯಕ್ತಿಗಳ ಜನಪ್ರಿಯತೆಯ ಮೇಲೆ ಬೆಲೆ ನಿರ್ಧರಿಸಲಾಗುತ್ತಿದೆ ಎಂದು ವರದಿಯೊಂದು ತಿಳಿಸಿದೆ.

*ಮಿಥುನ್ ಪಿ.ಜಿ.