ಗುಜರಾತ್‌ಗೆ ಅರ್ಹ ಗೆಲುವು

ಕೋಲ್ಕತಾ: ಈಗಾಗಲೇ “ಎ’ ಗುಂಪಿನಿಂದ ಅಗ್ರಸ್ಥಾನಿಯಾಗಿ ನಾಕೌಟ್‌ ಸುತ್ತಿಗೆ ಪ್ರವೇಶಿಸಿರುವ ಗುಜರಾತ್‌ ಫಾರ್ಚೂನ್‌ಜೈಂಟ್ಸ್‌ 37-29 ಅಂಕಗಳ ಅಂತರದಿಂದ ಪಾಟ್ನಾ ಪೈರೇಟ್ಸ್‌ ತಂಡದ ವಿರುದ್ಧ ಗೆಲುವು ಸಾಧಿಸಿದೆ. ತನ್ನ ಒಟ್ಟಾರೆ ಅಂಕವನ್ನು ಮತ್ತಷ್ಟು ಹೆಚ್ಚಿಸಿಕೊಂಡಿದೆ. “ಬಿ’ ಗುಂಪಿನಿಂದ 3ನೇ ತಂಡವಾಗಿ ನಾಕೌಟ್‌ ಸುತ್ತಿಗೆ ಪ್ರವೇಶಿಸುವ ಕನಸು ಕಾಣುತ್ತಿದ್ದ ಪಾಟ್ನಾ ಪೈರೇಟ್ಸ್‌ಗೆ ತೀವ್ರ ಹಿನ್ನಡೆಯಾಗಿದೆ.

ರೋಹಿತ್‌, ಅಜಯ್‌ ಗರ್ಜನೆ: ಬುಧವಾರ ನೇತಾಜಿ ಒಳಾಂಗಣ ಕ್ರೀಡಾಂಗಣದಲ್ಲಿ ನಡೆದ ಪಂದ್ಯದಲ್ಲಿ ಗುಜರಾತ್‌ ಫಾರ್ಚೂನ್‌ಜೈಂಟ್ಸ್‌ ಸಾಮರ್ಥ್ಯಕ್ಕೆ ತಕ್ಕ ಆಟ ಪ್ರದರ್ಶಿಸಿತು. ರೋಹಿತ್‌ ಗುಲಿಯಾ (9 ಅಂಕ) ಹಾಗೂ ಅಜಯ್‌ ಕುಮಾರ್‌ (8 ಅಂಕ) ರೈಡಿಂಗ್‌ನಿಂದ ಎದುರಾಳಿ ಪಡೆಯನ್ನು ನಡುಗಿಸಿದರು. ಸುನೀಲ್‌ಕುಮಾರ್‌ (5 ಅಂಕ) ಹಾಗೂ ಲಲಿತ್‌ ಚೌಧರಿ (5 ಅಂಕ) ಉತ್ತಮ ಟ್ಯಾಕಲ್‌ ನಡೆಸಿ ಸಾಥ್‌ ನೀಡಿದರು. ಈ ನಾಲ್ವರಿಂದ ಹೊಮ್ಮಿದ ಅದ್ಭುತ ಪ್ರದರ್ಶನ ಗುಜರಾತ್‌ಗೆ ಜಯದ ನಗು ಬೀರಿತು.

ಹಾಲಿ ಚಾಂಪಿಯನ್ನರಿಗೆ ಆಘಾತ: ಸೋಲಿನೊಂದಿಗೆ ಹಾಲಿ ಚಾಂಪಿಯನ್‌ ಪಾಟ್ನಾ ಪೈರೇಟ್ಸ್‌ಗೆ ಮುಖಭಂಗವಾಯಿತು. ತಂಡದ ತಾರಾ ಆಟಗಾರ ಪ್ರದೀಪ್‌ ನರ್ವಾಲ್‌ (10 ಅಂಕ) ಪ್ರಚಂಡ ರೈಡಿಂಗ್‌ ಪ್ರದರ್ಶಿಸಿದರಷ್ಟೆ. ಉಳಿದಂತೆ ವಿಕಾಸ್‌ ಜಗ್ಲಾನ್‌ (5 ಅಂಕ) ಆಲ್‌ರೌಂಡರ್‌ ಆಟದ ಮೂಲಕ ಸ್ವಲ್ಪ ಮಟ್ಟಿಗೆ ಗಮನ ಸೆಳೆದರು. ಆದರೆ ಇತರೆ ಆಟಗಾರರ ವೈಫ‌ಲ್ಯದಿಂದಾಗಿ ಪಾಟ್ನಾ ನೆಲಕ್ಕುರುಳಿತು.