ಪಾರ್ಕಿಂಗ್‌ ತಾಣದ ಸುತ್ತ ವಾಹನ ನಿಲುಗಡೆ ನಿಷೇಧ!

ಬೆಂಗಳೂರು: ರಾಜಧಾನಿ ಬೆಂಗಳೂರಿನಲ್ಲಿರುವ ಬಹುಮಹಡಿ ವಾಹನ ನಿಲುಗಡೆ ತಾಣಗಳಿಂದ 500 ಮೀಟರ್‌ ಸುತ್ತಳತೆಯ ಸಂಪರ್ಕ ರಸ್ತೆಗಳಲ್ಲಿ ವಾಹನ ನಿಲುಗಡೆ ನಿಷೇಧ!

ಬಿಬಿಎಂಪಿ ಹಾಗೂ ಬಿಎಂಟಿಸಿ ವತಿಯಿಂದ ನಿರ್ಮಾಣಗೊಂಡಿರುವ ಬಹುಮಹಡಿ ವಾಹನ ನಿಲುಗಡೆ ತಾಣಗಳ ಪರಿಣಾಮಕಾರಿ ಬಳಕೆ ಹಾಗೂ ಸಂಚಾರ ದಟ್ಟಣೆ ಸಮಸ್ಯೆಗೆ ಪರಿಹಾರಕ್ಕಾಗಿ ನಗರದ ಸಂಚಾರ ಪೊಲೀಸರು ಇಂತಹ ಕ್ರಮಕ್ಕೆ ಮುಂದಾಗಿದ್ದು, ಅದರಂತೆ ಇನ್ನು ಮುಂದೆ ವಾಹನ ನಿಲುಗಡೆ ತಾಣಗಳ 500 ಮೀಟರ್‌ ಸುತ್ತಳತೆಯ ವ್ಯಾಪ್ತಿಯ ರಸ್ತೆಬದಿ ವಾಹನ ನಿಲುಗಡೆ ನಿಷೇಧಿಸಿದೆ.

ಸ್ಥಳೀಯ ಸಂಸ್ಥೆಗಳಿಂದ ಕೋಟ್ಯಂತರ ರೂ. ವೆಚ್ಚದಲ್ಲಿ ಬಹುಮಹಡಿ ವಾಹನ ನಿಲುಗಡೆ ಕಟ್ಟಡಗಳನ್ನು ನಿರ್ಮಿಸಲಾಗಿದ್ದರೂ, ಸಾರ್ವಜನಿಕರು ಅವುಗಳ ಬಳಕೆಗೆ ಮುಂದಾಗುತ್ತಿಲ್ಲ. ಇದರಿಂದಾಗಿ ಸ್ಥಳೀಯ ಸಂಸ್ಥೆಗಳು ಆರ್ಥಿಕ ನಷ್ಟ ಅನುಭವಿಸುವಂತಾಗಿರುವುದು ಒಂದೆಡೆಯಾದರೆ, ಸಾರ್ವಜನಿಕರು ವಾಹನಗಳನ್ನು ರಸ್ತೆಬದಿ ಅಡ್ಡಾದಿಡ್ಡಿಯಾಗಿ ನಿಲುಗಡೆ ಮಾಡುವುದರಿಂದ ದಟ್ಟಣೆ ಉಂಟಾಗಿ ಜನರು ತೊಂದರೆ ಅನುಭವಿಸುವಂತಾಗಿದೆ.

ಬಿಬಿಎಂಪಿ ಹಾಗೂ ಬಿಎಂಟಿಸಿ ವತಿಯಿಂದ ನಗರದ 12 ಕಡೆ ಬಹುಮಹಡಿ ವಾಹನ ನಿಲುಗಡೆ ಕಟ್ಟಡಗಳನ್ನು ನಿರ್ಮಿಸಲಾಗಿದೆ. ಆದರೆ, ಶೇ.30ರಷ್ಟು ಜನರಷ್ಟೇ ಇದನ್ನು ಬಳಸುತ್ತಿದ್ದು, ಬಹುತೇಕ ವಾಹನ ನಿಲುಗಡೆ ಕಟ್ಟಡಗಳು ವಾಹನಗಳಿಲ್ಲದೆ ಖಾಲಿ ಆವರಣದಂತಿವೆ. ಆ ಹಿನ್ನೆಲೆಯಲ್ಲಿ ಸ್ಥಳೀಯ ಸಂಸ್ಥೆಗಳ ಸಹಕಾರದೊಂದಿಗೆ ಪಾರ್ಕಿಂಗ್‌ ತಾಣದ 500 ಮೀಟರ್‌ ವ್ಯಾಪ್ತಿಯಲ್ಲಿ ರಸ್ತೆಬದಿ ವಾಹನ ನಿಲುಗಡೆ ನಿಷೇಧಿಸಲು ಸಂಚಾರ ಪೊಲೀಸರು ಮುಂದಾಗಿದ್ದಾರೆ. 

ಸಮರ್ಪಕ ಬಳಕೆ ಇಲ್ಲ: ಪಾಲಿಕೆಯ ಒಡೆತನದಲ್ಲಿರುವ ಎರಡು ಹಾಗೂ ಬಿಎಂಟಿಸಿಯ 9 ಟಿಟಿಎಂಸಿಗಳಲ್ಲಿ ಏಕಕಾಲಕ್ಕೆ 1200 ಕಾರುಗಳು ಹಾಗೂ 3500 ದ್ವಿಚಕ್ರ ವಾಹನ ನಿಲುಗಡೆಗೆ ಅವಕಾಶವಿದೆ. ಆದರೆ, ನಿತ್ಯ ಶೇ.20ರಿಂದ ಶೇ.30ರಷ್ಟು ವಾಹನಗಳಷ್ಟೇ ಪಾರ್ಕಿಂಗ್‌ ತಾಣಗಳಲ್ಲಿ ನಿಲುಗಡೆಯಾಗುತ್ತಿದ್ದು,

ಬಹಳಷ್ಟು ಸಾರ್ವಜನಿಕರು ವಾಹನಗಳನ್ನು ರಸ್ತೆಬದಿಯಲ್ಲೇ ನಿಲುಗಡೆ ಮಾಡುತ್ತಿದ್ದಾರೆ. ಕೆ.ಆರ್‌.ಮಾರುಕಟ್ಟೆಯ ನೆಲಮಹಡಿಯಲ್ಲಿ 70 ಕಾರು ಹಾಗೂ 300 ದ್ವಿಚಕ್ರ ವಾಹನಗಳ ನಿಲುಗಡೆಗೆ ಅವಕಾಶವಿದ್ದರೂ, ನಿತ್ಯ 25 ಕಾರು ಹಾಗೂ 150 ಬೈಕ್‌ಗಳಷ್ಟೇ ನಿಲುಗಡೆಯಾಗುತ್ತಿವೆ ಎಂದು ತಿಳಿದುಬಂದಿದೆ.

ಮುಖ್ಯ ಕಾರ್ಯದರ್ಶಿಗಳಿಂದ ಸೂಚನೆ: ನಗರದಲ್ಲಿ ವಿವಿಧ ಸಮಸ್ಯೆಗಳ ಕುರಿತು ಸ್ಥಳೀಯ ಸಂಸ್ಥೆಗಳೊಂದಿಗೆ ಸಭೆ ನಡೆಸಿದ ರಾಜ್ಯ ಸರ್ಕಾರದ ಮುಖ್ಯ ಕಾರ್ಯದರ್ಶಿಗಳು ನಗರದಲ್ಲಿರುವ ಬಹುಮಹಡಿ ವಾಹನ ನಿಲುಗಡೆ ತಾಣಗಳ ಸುತ್ತಮುತ್ತಲಿನ 500 ಮೀಟರ್‌ ವ್ಯಾಪ್ತಿಯ ರಸ್ತೆಬದಿ ನಿಲುಗಡೆ ನಿಷೇಧಕ್ಕೆ ಅಗತ್ಯ ಕ್ರಮಕೈಗೊಳ್ಳುವಂತೆ ಹೆಚ್ಚುವರಿ ಸಂಚಾರ ಪೊಲೀಸ್‌ ಆಯುಕ್ತರಿಗೆ ಆದೇಶಿಸಿದ್ದಾರೆ. ಅದರಂತೆ ಸಂಚಾರ ಪೊಲೀಸರು ಕ್ರಮಕ್ಕೆ ಮುಂದಾಗಿದ್ದಾರೆ. 

ಸಾರ್ವಜನಿಕರಲ್ಲಿ ಗೊಂದಲ: ಹೆಚ್ಚುವರಿ ಸಂಚಾರ ಪೊಲೀಸ್‌ ಆಯುಕ್ತರು ಪಾರ್ಕಿಂಗ್‌ ತಾಣಗಳ ಸುತ್ತಮುತ್ತಲಿನ ರಸ್ತೆಗಳಲ್ಲಿ ವಾಹನ ನಿಲುಗಡೆ ನಿಷೇಧ ನಿಯಮ ಜಾರಿಗೊಳಿಸುವಂತೆ ಅಧಿಕಾರಿಗಳಿಗೆ ಸೂಚನೆ ನೀಡಿದ್ದಾರೆ.

ಅದರಂತೆ ಯಶವಂತಪುರ, ವಿಜಯನಗರ, ಕೋರಮಂಗಲ ಸೇರಿದಂತೆ ಹಲವೆಡೆ ನಿಯಮ ಜಾರಿಗೊಳಿಸಲಾಗುತ್ತಿದೆ. ಆದರೆ, ಕೆ.ಆರ್‌.ಮಾರುಕಟ್ಟೆ, ಜೆ.ಸಿ.ನಗರ ಸೇರಿದಂತೆ ಹಲವೆಡೆ ದಿಢೀರ್‌ ನಿಯಮ ಜಾರಿಗೊಳಿಸಿದ್ದರಿಂದ ಜನರಲ್ಲಿ ಗೊಂದಲ ಸೃಷ್ಟಿಯಾಗಿದೆ. ದಿಢೀರ್‌ ಅನುಷ್ಠಾನ ಕಷ್ಟಕರ ಎಂದು ಸಂಚಾರ ಪೊಲೀಸ್‌ ಅಧಿಕಾರಿಗಳ ಅಭಿಪ್ರಾಯ.

ಬಹುಮಹಡಿ ವಾಹನ ನಿಲುಗಡೆ ತಾಣಗಳಿಂದ 500 ಮೀಟರ್‌ ವ್ಯಾಪ್ತಿಯಲ್ಲಿ ರಸ್ತೆಬದಿ ವಾಹನ ನಿಲುಗಡೆ ನಿಷೇಧಿಸುವಂತೆ ಮುಖ್ಯಕಾರ್ಯದರ್ಶಿಗಳು ಸೂಚನೆ ನೀಡಿದ್ದಾರೆ. ಅದರಂತೆ ತಾಣಗಳಿರುವ ಕಡೆಗಳಲ್ಲಿ ಕಟ್ಟುನಿಟ್ಟಾಗಿ ನಿಯಮ ಜಾರಿಗೊಳಿಸಲಾಗುತ್ತಿದೆ. 
-ಹಿತೇಂದ್ರ, ಹೆಚ್ಚುವರಿ ಪೊಲೀಸ್‌ ಆಯುಕ್ತ (ಸಂಚಾರ)

ಬಿಬಿಎಂಪಿ ವಾಹನ ನಿಲುಗಡೆ ತಾಣಗಳು
* ಮಹಾರಾಜಾ ಶಾಪಿಂಗ್‌ ಕಾಂಪ್ಲೆಕ್ಸ್‌ (30 ವರ್ಷಕ್ಕೆ ಗುತ್ತಿಗೆ ನೀಡಲಾಗಿದೆ) (60ಕಾರು ಹಾಗೂ 300 ಬೈಕ್‌ಗಳಿಗೆ ಅವಕಾಶ) 
* ಕೆ.ಆರ್‌.ಮಾರುಕಟ್ಟೆ (60 ಕಾರು ಹಾಗೂ 300 ಬೈಕ್‌ಗಳಿಗೆ ಅವಕಾಶ)
* ಜೆ.ಸಿ.ನಗರ (150 ಕಾರು ಹಾಗೂ 150 ಬೈಕ್‌ಗಳ ನಿಲುಗಡೆ ಅವಕಾಶ)

ಬಿಎಂಟಿಸಿ ವಾಹನ ನಿಲುಗಡೆ ತಾಣಗಳು
* ಯಶವಂತಪುರ 
* ವಿಜಯನಗರ 
* ಶಿವಾಜಿನಗರ 
* ದೊಮ್ಮಲೂರು 
* ಶಾಂತಿನಗರ 
* ಜಯನಗರ 
* ಕೆಂಗೇರಿ 
* ಬನಶಂಕರಿ 
* ಕೋರಮಂಗಲ 
(ಎಲ್ಲ ಪಾರ್ಕಿಂಗ್‌ ತಾಣಗಳಲ್ಲಿ 100 ಕಾರುಗಳು ಹಾಗೂ 300 ದ್ವಿಚಕ್ರ ವಾಹನಗಳ ನಿಲುಗಡೆ ಅವಕಾಶವಿದೆ)

* ವೆಂ.ಸುನೀಲ್‌ಕುಮಾರ್‌