ಪ್ಯಾರಾಲಿಂಪಿಯನ್‌ ದೀಪಾಗೆ “ಎಂ.ಜಿ.ಮೆಹ್ತಾ ಹ್ಯೂಮನ್‌ ಸ್ಪಿರಿಟ್‌’

ನವದೆಹಲಿ: ರಿಯೋ ಪ್ಯಾರಾಲಿಂಪಿಕ್ಸ್‌ ಬೆಳ್ಳಿ ಪದಕ ವಿಜೇತೆ ದೀಪಾ ಮಲಿಕ್‌ “ಎಂ.ಜಿ.ಮೆಹ್ತಾ ಹ್ಯೂಮನ್‌ ಸ್ಪಿರಿಟ್‌’ ಪ್ರಶಸ್ತಿಯನ್ನು ನ.21 ರಂದು ಸ್ವೀಕರಿಸಲಿದ್ದಾರೆ.

ಪ್ಯಾರಾಲಿಂಪಿಕ್‌ ಸೈಕ್ಲಿಸ್ಟ್‌ ಅದಿತ್ಯಾ ಮೆಹ್ತಾ ಸ್ಥಾಪಿಸಿರುವ ರತ್ನ ನಿಧಿ ಟ್ರಸ್ಟ್‌ ವತಿಯಿಂದ ಈ ಪ್ರಶಸ್ತಿಯನ್ನು ನೀಡಲಾಗುತ್ತಿದೆ. ಇದಕ್ಕೂ ಮುನ್ನ ಕೃತಕ ಕಾಲಲ್ಲಿ ಮೌಂಟ್‌ ಎವರೆಸ್ಟ್‌ ಶಿಖರ ಏರಿದ್ದ ಪದ್ಮಶ್ರೀ ಅರುಣಿಮಾ ಸಿನ್ಹಾ ಈ ಪ್ರಶಸ್ತಿ ಸ್ವೀಕರಿಸಿದ್ದರು. ಹೀಗಾಗಿ ದೀಪಾ ಮಲಿಕ್‌ ಈ ಪ್ರಶಸ್ತಿಯನ್ನು ಸ್ವೀಕರಿಸುತ್ತಿರುವ ದೇಶದ ಎರಡನೇ ಮಹಿಳೆಯಾಗಿದ್ದಾರೆ. 

ಈ ಬಗ್ಗೆ ಪ್ರತಿಕ್ರಿಯಿಸಿದ ದೀಪಾ ಮಲಿಕ್‌, ಪ್ರಶಸ್ತಿ ಸ್ವೀಕಾರವನ್ನು ಎದುರು ನೋಡುತ್ತಿದ್ದೇನೆ. ನನಗೆ ಈ ಪ್ರಶಸ್ತಿ ಬಂದಿರುವುದು ಖುಷಿ ಕೊಡುತ್ತಿದೆ ಎಂದು ಸಂತಸ ವ್ಯಕ್ತಪಡಿಸಿದ್ದಾರೆ. ದೀಪಾ ಮಲಿಕ್‌ ಇದಕ್ಕೂ ಮುನ್ನ 2012ರಲ್ಲಿ ಅರ್ಜುನ್‌ ಪ್ರಶಸ್ತಿ, ಕಳೆದ ವರ್ಷ ಪದ್ಮಶ್ರೀ ಪ್ರಶಸ್ತಿಯನ್ನು ಸ್ವೀಕರಿಸಿದ್ದಾರೆ.