ಮತ್ತೆ ಪಾಕ್‌ ಟೂಲ್‌ಕಿಟ್‌ ಕಿತಾಪತಿ; ಕುಟಿಲ ತಂತ್ರದ ಅಂಶಗಳು ಅನಾವರಣ

ನವದೆಹಲಿ: ಪಾಕಿಸ್ತಾನ ಜಮ್ಮು ಮತ್ತು ಕಾಶ್ಮೀರದ ಜನರ ಬೆಂಬಲಕ್ಕೆ ಯಾವತ್ತೂ ನಿಲ್ಲಲಿದೆ ಎಂದು ಹೇಳಿರುವ ಟೂಲ್‌ಕಿಟ್‌ನ ಅಂಶಗಳು ಈಗ ಬೆಳಕಿಗೆ ಬಂದಿವೆ.

ಆ.5ಕ್ಕೆ ವಿಶೇಷ ಸ್ಥಾನಮಾನ ರದ್ದು ಮಾಡಿ ಮೂರು ವರ್ಷ ಸಮೀಪಿಸುತ್ತಿರುವ ಬೆನ್ನಲ್ಲಿಯೇ ಆ ದೇಶದ ಕುಟಿಲ ತಂತ್ರದ ಅಂಶಗಳು ಅನಾವರಣಗೊಂಡಿವೆ.

ಆ.5 ಅನ್ನು ಕರಾಳ ದಿನ ಎಂದು ಆಚರಿಸಬೇಕು ಎಂಬಿತ್ಯಾದಿ ಸೂಚನೆ ಇರುವ 13 ಪುಟಗಳ ಭಾರತ ವಿರೋಧಿ ಅಂಶಗಳನ್ನು ಒಳಗೊಂಡಿರುವ ಕೈಪಿಡಿ ಅನಾವರಣಗೊಂಡಿದೆ. ಚೀನಾ, ಬೆಲ್ಜಿಯಂ, ಜಪಾನ್‌, ಉಕ್ರೇನ್‌, ಬರ್ಮಿಂಗ್‌ಹ್ಯಾಮ್‌, ದುಬೈ, ಆಸ್ಟ್ರೇಲಿಯಾ, ಇಟಲಿ, ಡೆನ್ಮಾರ್ಕ್‌ ಮತ್ತು ಜರ್ಮನಿಯಲ್ಲಿ ಇರುವ ಪಾಕಿಸ್ತಾನ ರಾಯಭಾರ ಕಚೇರಿಗಳ ಮೂಲಕ ಅಲ್ಲಿನ ಸಾಮಾಜಿಕ ಜಾಲತಾಣಗಳಲ್ಲಿ ಅದನ್ನು ಪ್ರಚಾರ ಮಾಡಲಾಗುತ್ತಿದೆ.

ಇದಲ್ಲದೆ ಗುರುವಾರ ಸಾಮಾಜಿಕ ಜಾಲತಾಣಗಳಲ್ಲಿ ಭಾರತದ ವಿರುದ್ಧ ದ್ವೇಷಮಯ ಅಂಶಗಳನ್ನು ಹೆಚ್ಚಿನ ಪ್ರಮಾಣದಲ್ಲಿ ಅಪ್‌ಲೋಡ್‌ ಮಾಡಲೂ ಪಾಕಿಸ್ತಾನ ಸಿದ್ಧತೆ ನಡೆಸಿದೆ.