ಮುಲ್ತಾನ್‌ ಟೆಸ್ಟ್‌: ಸುಲ್ತಾನ್‌ ಆಗುವವರು ಯಾರು?

ಮುಲ್ತಾನ್‌: ಮುಲ್ತಾನ್‌ ಟೆಸ್ಟ್‌ ಪಂದ್ಯದಲ್ಲಿ ಸುಲ್ತಾನ್‌ ಆಗುವವರು ಯಾರು? ಇಂಥದೊಂದು ಕುತೂಹಲದೊಂದಿಗೆ ಪಾಕಿಸ್ಥಾನ-ಇಂಗ್ಲೆಂಡ್‌ ನಡುವಿನ ದ್ವಿತೀಯ ಟೆಸ್ಟ್‌ ಪಂದ್ಯದ 3ನೇ ದಿನದಾಟ ಕೊನೆಗೊಂಡಿದೆ.

ಗೆಲುವಿಗೆ 355 ರನ್‌ ಗುರಿ ಪಡೆದಿರುವ ಪಾಕಿಸ್ಥಾನ 4 ವಿಕೆಟಿಗೆ 198 ರನ್‌ ಗಳಿಸಿದೆ. ಇನ್ನೂ 157 ರನ್‌ ಅಗತ್ಯವಿದೆ. ಸೌದ್‌ ಶಕೀಲ್‌ 54 ರನ್‌ ಮಾಡಿ ಬ್ಯಾಟಿಂಗ್‌ ಕಾಯ್ದುಕೊಂಡಿದ್ದಾರೆ.

ಅಬ್ದುಲ್ಲ ಶಫೀಕ್‌ (45)-ಮೊಹಮ್ಮದ್‌ ರಿಜ್ವಾನ್‌ (30) 66 ರನ್ನುಗಳ ಉತ್ತಮ ಅಡಿಪಾಯ ನಿರ್ಮಿಸಿದರೂ 17 ರನ್‌ ಅಂತರದಲ್ಲಿ 3 ವಿಕೆಟ್‌ ಕಳೆದುಕೊಂಡ ಪಾಕ್‌ ಸಂಕಟಕ್ಕೆ ಸಿಲುಕಿತು. ಇದರಲ್ಲಿ ನಾಯಕ ಬಾಬರ್‌ ಆಜಂ ಅವರ ವಿಕೆಟ್‌ ಕೂಡ ಸೇರಿತ್ತು. ಬಾಬರ್‌ ಗಳಿಕೆ ಕೇವಲ ಒಂದು ರನ್‌.

4ನೇ ವಿಕೆಟಿಗೆ ಜತೆಗೂಡಿದ ಸೌದ್‌ ಶಕೀಲ್‌-ಇಮಾಮ್‌ ಉಲ್‌ ಹಕ್‌ 108 ರನ್‌ ಪೇರಿಸಿ ಹೋರಾಟ ಸಂಘಟಿಸಿದರು. ಆದರೆ ದಿನದಾಟದ ಕೊನೆಯಲ್ಲಿ 60 ರನ್‌ ಮಾಡಿದ ಇಮಾಮ್‌ ವಿಕೆಟ್‌ ಉರುಳಿದ್ದು ಪಾಕ್‌ಗೆ ಭಾರೀ ಆಘಾತವಿಕ್ಕಿದೆ.