ಮೋದಿ ವಿಮಾನ ನ್ಯಾವಿಗೇಶನ್‌: 2.86 ಲಕ್ಷ ಶುಲ್ಕ ವಿಧಿಸಿದ ಪಾಕ್‌

ಹೊಸದಿಲ್ಲಿ: 2016ರಲ್ಲಿ ಪಾಕಿಸ್ಥಾನಕ್ಕೆ ಹಠಾತ್‌ ಭೇಟಿ ನೀಡಿದ ಪ್ರಧಾನಿ ಮೋದಿ ಅವರ ವಿಮಾನ ನ್ಯಾವಿಗೇಶನ್‌ ಮಾಡಿದ್ದಕ್ಕೆ ಪಾಕಿಸ್ಥಾನ 2.86 ಲಕ್ಷ ರೂ. ಶುಲ್ಕ ವಿಧಿಸಿದೆ. ರಷ್ಯಾ, ಅಫ್ಘಾನಿಸ್ಥಾನ, ಇರಾನ್‌ ಮತ್ತು ಕತಾರ್‌ ಪ್ರವಾಸದ ವೇಳೆ ಪಾಕಿಸ್ಥಾನದ ಆಗಿನ ಪ್ರಧಾನಿ ನವಾಜ್‌ ಷರೀಫ್ರ ಹುಟ್ಟುಹಬ್ಬಕ್ಕೆ ಶುಭಾಶಯ ಕೋರಲು ಪ್ರಧಾನಿ ಮೋದಿ ತೆರಳಿದ್ದರು. ಈ ವೇಳೆ ಮೋದಿ ಪ್ರಯಾಣಿಸಿದ ವಿಮಾನಕ್ಕೆ ನ್ಯಾವಿಗೇಶನ್‌ ಸೌಲಭ್ಯ ಕಲ್ಪಿಸಿದ್ದಕ್ಕಾಗಿ ಈ ಶುಲ್ಕವನ್ನು ಪಾಕ್‌ ವಿಧಿಸಿದೆ.  ಮಾಹಿತಿ ಹಕ್ಕು ಕಾಯ್ದೆಯನ್ವಯ ಸಾಮಾಜಿಕ ಕಾರ್ಯಕರ್ತ, ನಿವೃತ್ತ ಕಮಾಂಡರ್‌ ಲೋಕೇಶ್‌ ಬಾತ್ರಾ ಅವರು ಸಲ್ಲಿಸಿದ್ದ ಅರ್ಜಿಗೆ ಪಾಕಿಸ್ಥಾನ‌ದಲ್ಲಿರುವ ಭಾರತೀಯ ಹೈಕಮಿಷನ್‌ ಈ ಮಾಹಿತಿ ನೀಡಿದೆ. 

ಇದೇ ವೇಳೆ, 2016ರ ಜೂನ್‌ವರೆಗೆ ಪ್ರಧಾನಿ ಮೋದಿ ಅವರ 11 ರಾಷ್ಟ್ರಗಳ ಪ್ರವಾಸಕ್ಕೆ ಭಾರತೀಯ ವಾಯುಪಡೆಯ ವಿಮಾನವನ್ನು ಬಳಸಲಾಗಿತ್ತು ಎಂಬ ಮಾಹಿತಿಯೂ ಬಹಿರಂಗವಾಗಿದೆ. 2014ರಿಂದ 2016ರವರೆಗೆ ವಾಯುಪಡೆ ವಿಮಾನ ಬಳಸಿದ್ದಕ್ಕೆ 2 ಕೋಟಿ ರೂ. ವೆಚ್ಚವಾಗಿದೆ ಎಂದು ಹೇಳಲಾಗಿದೆ.