ರಾತ್ರಿ ಎಂಟಕ್ಕೇ ಪಾಕಿಸ್ತಾನ ಬಂದ್‌; ಕಾರಣ ಏನು ಗೊತ್ತೇ ?

ಇಸ್ಲಾಮಾಬಾದ್‌: ಪಾಕಿಸ್ತಾನದಾದ್ಯಂತ ಈಗ ವಿದ್ಯುತ್‌ ಸಮಸ್ಯೆ ಹೆಚ್ಚಾಗಿದೆ. ಹೀಗಾಗಿ, ಮುಂದಿನ ದಿನಗಳಲ್ಲಿ ರಾತ್ರಿ 8 ಗಂಟೆಯ ಒಳಗಾಗಿ ಮಾರುಕಟ್ಟೆ ಮತ್ತು ವಾಣಿಜ್ಯ ವಹಿವಾಟುಗಳನ್ನು ಕಡ್ಡಾಯವಾಗಿ ಮುಚ್ಚುವ ಬಗ್ಗೆ ಆದೇಶ ನೀಡಲು ಸರ್ಕಾರ ತೀರ್ಮಾನಿಸಿದೆ.

ಜತೆಗೆ ಅದ್ಧೂರಿ ವಿದ್ಯುತ್‌ ದೀಪಗಳನ್ನು ಬಳಕೆ ಮಾಡುವಂಥ ವಿವಾಹ ಕಾರ್ಯಕ್ರಮಗಳ ಮೇಲೆ ಕೂಡ ನಿಯಂತ್ರಣ ಹೇರುವ ಸಾಧ್ಯತೆ ಇದೆ. ಉಕ್ರೇನ್‌ ವಿರುದ್ಧ ರಷ್ಯಾ ನಡೆಸುತ್ತಿರುವ ದಾಳಿ, ಜೂನ್‌ನಲ್ಲಿ ಉಂಟಾಗಿದ್ದ ಭೀಕರ ಪ್ರವಾಹ ದೇಶದ ಅರ್ಥ ವ್ಯವಸ್ಥೆಗೆ ಭಾರೀ ಸಮಸ್ಯೆ ಉಂಟುಮಾಡಿದೆ.

ವಿದೇಶದಿಂದ ಖರೀದಿಸಲಾದ ವಿದ್ಯುತ್‌ಗೆ ನೀಡಬೇಕಾಗಿರುವ ಮೊತ್ತವನ್ನೂ ಪಾವತಿ ಮಾಡಲಾಗಿಲ್ಲ. ಅದಕ್ಕೆ ಪೂರಕವಾಗಿ ರಾಷ್ಟ್ರೀಯ ವಿದ್ಯುತ್‌ ಉಳಿತಾಯ ಯೋಜನೆಯನ್ನು ಜಾರಿ ಮಾಡಲಾಗಿದೆ.

ಪ್ರಾಂತೀಯ ಸರ್ಕಾರಗಳಿಗೆ ಕೂಡ ಅದನ್ನು ಪಾಲನೆ ಮಾಡುವಂತೆ ಆದೇಶ ನೀಡಲು ಪಾಕಿಸ್ತಾನ ಸರ್ಕಾರ ಯೋಚಿಸಿದೆ.